SJ Njebjelčicy – Nadrózna Hrabowka 3:2 (1:1)
Zestawa domjacych: Hahn – Čornak, Pawlik, Hanuza, Domš, Deleńk, Kral, Lejnart, Haška, Hrjehor (78. Frank Ričel), Korjeńk (90.+3 Šram)
W Njebjelčicach předstaji so wčera dotal njeznate mustwo w prěnjej domjacej dypkowej partiji hrajneje doby 2017/2018. Hosćo z Nadrózneje Hrabowki dachu so hnydom do boja. Hižo w 4. min. zjewi so srjedźny nadběhowar samlutki před Njebjelčanskej klětku, suny pak bul na zbožo nimo. Při dalšej přiležnosći spěšneho nadběha prasny bul do žerdźe. W 19. min. pak zhłójčkowa Handrij Korjeńk wótru přihrawku Gabriela Čornaka k 1:0 do saka hosći. Naslědnje steješe domjacy škit wjacekróć pod sylnym ćišćom. Wrotar Nico Hahn dwójce wurjadnje zakroči a zadźěwa tak wurunanju. Tola w 42. min. bě wón při wótrej třělwje ze zdalenosće bjezmócny. Tak steješe k přestawce 1:1.
