Wojerowski FC II – ST Marijina hwězda 2:1 (1:0)
Zestawa hosći: Schmidt – Rab, Łušćanski, K. Pakoßnick, Lipič, Eldor (71. Čornak), Kuring, Jurš, Hawš, Winkler, J. Pakoßnick
W ekstremnje słabej hrě wokrjesneje ligi su koparjo ST Marijineje hwězdy pola rezerwy Wojerowskeho FC z 1:2 přěhrali. Prěnju wulku móžnosć za nich měješe Tomaš Jurš (7.). Město toho zo by bul do róžka sunył, pak třěli wón ze zdalenosće šěsć metrow na wrotarja. Za hru snano rozsudna scena bě w 19. min. Richard Hawš běžeše sam na wrotarja a bu krótko před šěsnatku wot poslednjeho muža Wojerowčanow potorhnjeny. Sudnik Christian Burek drje rozsudźi na wólny kop, čerwjenu kartu pak wón Wojerowčanej njepokaza. Z prěnim nadběhom docpě hosćićel po poł hodźinje 1:0, a to přez Motaza Ahmada Alkrazu. Hač do přestawki so ničo naspomnjenjahódneho wjace njesta.
