Hladansku słužbu přewzali
Erfurt/Ulm (B/SN). Pomocna słužba maltezow w Erfurće je 1. oktobra přewzała nošerstwo ambulantneje hladanskeje słužby „Pomocliwej ruce“ w durinskim Martinrodźe. „My přewozmjemy cyle wěsće hladansku słužbu při potrjebje tež z druhimi eksistowacymi słužbami, na přikład z našimi wopytami abo z našej ambulantnej hospicnej słužbu“, rjekny Winfried Weinrich, nawoda słužby maltezow w Erfurće.
Bjez cyrkwje žadyn přewrót
Köln/Lipsk (B/SN). K měrliwej rewoluciji 1989 njeby po posudku katolskeho Lipšćanskeho propsta Gregora Giele bjez cyrkwinskeho zasadźowanja dóšło. Ewangelska cyrkej bě „hłowny akter měrliweje rewolucije“. Wobě cyrkwi njeběštej tehdy jenož rumnosće přewostajiłoj, ale stej tež mnohich protagonistow zasadźiłoj, „kotřiž pokazachu iniciatiwu kaž předewšěm zmužitosć“.
Přilubja wosadam židow podpěru
Tydźeń wopominanja
Berlin (dpa/SN). Składnostnje 30. róčnicy powalenja murje je so dźensa w Berlinje wopomnjenski tydźeń z wjace hač 200 zarjadowanjemi zahajił. K zazběhej porěča knježacy měšćanosta Michael Müller (SPD) na Alexanderowym naměsće. Tam běchu so runje před 30 lětami, 4. nowembra 1989, statysacy wuchodnych Němcow zhromadźili, zo bychu za swobodu měnjenja a demokratiju demonstrowali. Dźens wječor su w Domje zapósłancow wo wuskutkach měrniweje rewolucije diskutowali.
Wopomnišćo wopytała
Zwickau (dpa/SN). Zwjazkowa kanclerka Angela Merkel (CDU) je dźensa w Zwickauwje dźesać woporow prawicarskoekstremneje teroristiskeje skupiny NSU wopominała. Wopomnišćo, wobstejace z dźesać sadźenych štomow, su wčera poswjećili. Čłonojo neonacistiskeje trójki, kotřiž zatřělichu dźesać ludźi – zwjetša z turkowskimi korjenjemi –, běchu wjacore lěta w Zwickauwje bydlili a tam swoje njeskutki planowali.
Awtowy wjeršk w stolicy
Chcedźa w Berlinje demonstrować
Grodk/Drježdźany (dpa/SN). Tójšto łužiskich gmejnow, městow a wokrjesow Braniborskeje a Sakskeje žada sej nuznje wjace pomocy ze stron Zwjazka, kak zmištrować skónčenje zmilinjenja brunicy. Strukturna změna móže so jenož poradźić, „hdyž nam zamołwići za to trěbne instrumenty přewostaja“, rjekny Grodkowska měšćanostka Christine Herntier (bjestronska) nowinarjam. „Za to su měšćanosća njeparujomni.“ Herntier ma spěchowanske srědki za jednotliwe předewzaća za wužitne, zo móhli wone spěchowanske programy zwoprawdźić. Tójšto komunow je w ćežkim połoženju.
Komuny, zjednoćene w tak mjenowanym Łužiskim kruhu w Braniborskej a Sakskej, su so njedawno z listom na zwjazkowu kanclerku Angelu Merkel (CDU) wobroćili. W nim žadaja sej změny w tak mjenowanym zakonju wo sylnjenju strukturow. Dale planuja demonstraciju před zwjazkowym sejmom 14. nowembra. (SN wo tym hižo rozprawjachu.)
Žada sej spěšne rozrisanje renty dla
Berlin (dpa/SN). Generalny sekretar SPD Lars Klingbeil žada sej w tuchwilnej diskusiji zakładneje renty dla spěšne rozrisanje. „Přichodnu póndźelu w koaliciskim wuběrku dyrbimy naležnosć wokoło zakładneje renty skónčnje wothóčkować“, rjekny Klingbeil dźensa w rańšim magacinje sćelaka ZDF. Wón je optimistiski, zo so unija a SPD w naležnosći dojednatej. Dale wotewrjenych prašenjow dla běchu za dźens wječor planowane wjerškowe zetkanje wulkeje koalicije na přichodnu njedźelu přestorčili.
Po měnjenju městopředsydy frakcije CDU/CSU w zwjazkowym sejmje Carstena Linnemanna drje zwjazkowe knježerstwo na diskusiji wokoło zakładneje renty njezwrěšći. „Njebych wulkej koaliciji w tym padźe rozpadnyć dał“, rjekny wón tohorunja w rańšim magacinje ZDF. Přiwšěm pak nochcył swoje přeswědčenje přeradźić, jenož, dokelž je SPD druheho měnjenja. Hłowny dypk zwady mjez CDU/CSU a SPD je dale prašenje pruwowanja potrěbnosće. Unija na nim wobstawa, SPD je wotpokazuje.
To a tamne (04.11.19)
Najwjetšu rybjacu soljanku swěta su w Heringsdorfje na kupje Usedom nawarili. Pod dohladom zastupnika instituta rekordow Němskeje je powołanski kuchar André Domke ze sto kilogramow ryby kaž tež z wulkeho mnóstwa papriki, tomatow, kórkow, cyble a korjeninow cyłkownje 268 litrow rybjaceje soljanki zhotowił. Tak bě wuměnjenje instituta spjelnjene, kotryž žadaše sej znajmjeńša 250 litrow. Dźěl poliwki su hnydom předali, zbytk su zawarili.
Jeničce spódnje cholowy a košlu woblečeny je 55lětny šofer wosoboweho awta na awtodróze 65 koleso wuměnił. Dokelž chětro za alkoholom wonješe, dyrbješe wón „duć“ a měješe wjace hač dwaj promilej. Zastojnicy zapodachu skóržbu wopiłstwa za wodźidłom dla. Hač měješe muž alkohola dla tak mało drasty na sebi, njemóžeše policija rjec.
Dojednanje tola móžne?
Berlin (dpa/SN). W koaliciskej rozmołwje nastupajo zakładnu rentu je dojednanje móžne. Dźěłowa skupina politikarjow stron CDU/CSU a SPD je po jědnaćehodźinskim wuradźowanju swoje dźěło dokónčiła, kaž powěsćernja dpa z kruhow wobdźělnikow zhoni. Póndźelu budźe planowany projekt po wšěm zdaću ze zwjazkowej kanclerku Angelu Merkel (CDU) wothłosowany. Jednotliwe dypki rozmołwy dotal znate njejsu.
Chcedźa wušo hromadźe dźěłać
New Delhi (dpa/SN). Němska a Indiska chcetej hladajo na temy digitalizacija, škit klimy a wobnowjomne energije bóle hromadźe dźěłać. Předewšěm we wobłuku digitalizacije a kumštneje inteligency ma Indiska wulki potencial, zdźěli zwjazkowa kanclerka Angela Merkel (CDU) dźensa po rozmołwach z indiskim knježerstwom w New Delhiju. Krajej stej strategisce a přećelsce ze sobu zwjazanej.
Nowe sankcije přećiwo Iranej
Ruski internetnět pod kontrolu stata
Syriska plan Němskeje wotpokazuje
Towaršnosćdźeń a brutalniša
Berlin (dpa/SN). Dagmar Freitag, předsydka sportoweho wuběrka zwjazkoweho sejma, wobkedźbuje we wšitkich towaršnostnych wobłukach „dospołnje njeakceptabelne, dźeń a brutalniše“ wobchadźenje mjez ludźimi. Po najnowšim nadpadźe na koparskeho sudnika minjeny tydźeń wona „wuraznje“ tomu přihłosuje, zo so Němski koparski zwjazk (DFB) tutej temje nětko aktiwnje wěnuje. To je politikarka SPD powěsćerni dpa zdźěliła.
DFB w lisće přiběracu namóc přećiwo amaterskim sudnikam wótrje zasudźa, přilubjejo potrjechenemu sudnikej połnu podpěru. Zasadnje je za aktualny pad najprjedy raz sportowe sudnistwo zamołwite, kotrež móže hrajerjow wuzamknyć a dale sahace chłostanja wukazać, Dagmar Freitag rjekny. Werbalne ranjenja abo zranjenja ćěła su chłostajomne njeskutki, kotrež maja „samozrozum- liwje“ sudnistwa chłostać. Tydźenja bě hrajer w hessenskej koparskej wokrjesnej lize sudnika z pjasću do womory zbił.
