Konwoj ruskich nakładnych awtow z pomocnymi srědkami za wobydlerjow wuchodneje Ukrainy je wčera do Donjecka dojěł. Ruske ministerstwo za škit před katastrofami bě posyłku zestajało. Sobudźěłaćerjo ministerstwa wěcy wotkładuja a noša je do składa, zo móhli srědki rozdźělić. Je to mjeztym 77. humanitarna pomocna akcija ministerstwa za ludźi kónčiny wokoło ­Donjecka. Wobydlerjo su w dalokej měrje na pomoc pokazani, dokelž je region mjeztym izolowany. Foto: dpa/Sergej Awerin

Hamburg (dpa/SN). Awtomobilowy klub ADAC w Hamburgu kónc přichodneho tydźenja planowany zakaz jězdźenja dieselowych awtow k polěpšenju kwality powětra wotpokaza. Tak dyrbjeli šoferojo awtow zamołwitosć za zmylki awto­twarcow a za misnjenja politiki přewzać, praji rěčnik ADAC Christian Hieff powěsćerni dpa. Nimo toho je po wšej Němskej prěni zakaz staršich dieselowych awtow, kotrež wotpłunowu normu euro-6 njespjelnjeja, praktisce lědma přesadźomny. „Njewidźiš hnydom, hač ma awto euro-5 abo 6.“ Wuwzaća za wobydlerjow a transportne jězdźidła přesadźenje zakaza přidatnje poćežuja.

Zakazy jězdźenja su po słowach Hieffa „tak a tak wopačny puć. Wone chłostaja šoferow a bjeru ćišć wot awtoweje industrije.“ ADAC žada sej hnydomny techniski přetwar wot dieseloweho skandala potrjechenych awtow. „Hewak šoferojo kwitowanku za wobšudnistwo awtotwarcow a lěta dołhe ignorowanje politiki zapłaća.

Hamburgski wobswětowy zarjad bě wčera připowědźił, zo staršim dieselowym a nakładnym awtam wot 31. meje zakaza wšelake dróhi w měšćanskim dźělu Altona wužiwać.

Drježdźany (dpa/SN). Znješkódnjenje wulkeje bomby z Druheje swětoweje wójny w Drježdźanach so dale dliji. Po tym zo bě wona minjenu nóc při wotstronjenju zapalaka zdźěla rozbuchnyła, dyrbjachu wšitcy wobdźěleni dźensa dopołdnja čakać, zo bomba wochłódnje. Při detonaciji bě so material, z kotrejž bě rozbuchadło zawodźene, zapalił. Hdyž je bomba chłódna dosć, chcedźa fachowcy znowa spytać ju znješkódnić, zdźěli rěčnik policije Thomas Geithner. Dokładny termin wón dopołdnja hišće žadyn mjenować nochcyše. „To by ryzy spekulacija była.“ Za wobydlerjow to rěka, zo dyrbja dale w nuzowych kwartěrach wutrać. Něhdźe 8 700 ludźi dyrbješe swoje bydlenja wopušćić. Potrjechena kónčina leži wosrjedź sakskeje stolicy njedaloko hłowneho dwórnišća. 250 kilogramow ćežku bombu běchu zawčerawšim, wutoru, při twarskich dźěłach našli. Wot toho časa dochadźa w měsće k wulkim wobchadnym haćenjam. Mjeztym je so iniciatiwa wutworiła, kotraž ewakuowanym priwatne kwartěry poskića.

Zwada wobsadźenja a nadawkow brunicoweje komisije dla dale traje

Berlin/Choćebuz (dpa/SN). Wo perso­nalnym wobsadźenju a wo nadawku ­tak mjenowaneje brunicoweje komisije zwjazkoweho knježerstwa, kotraž ma kónc wudobywanja wuhla planować, so dale wadźa. Hospodarske křidło frakcije CDU/CSU sej žada, zo ma so komisija předewšěm hospodarskim prašenjam wě­nować. „Škit klimy a wobswěta njesměł dźěło komisije postajeć“, rjekny hospodarskopolitiski rěčnik frakcije unije w zwjazkowym sejmje Joachim Pfeiffer (CDU) powěsćerni dpa. „Wěstota zastaranja a wubědźowanjakmanosć dyrbjałoj w srjedźišću stać.“ Zeleni sej porno tomu žadaja, zo měł gremij wot wšeho spočatka na to wusměrjeny być brunicowe milinarnje w přichodnych lětach zawrěć, zo by Němska zaměry klimoweho škita z Pariskeho zrěčenja docpěła. Předsydka Zelenych Annalena Baerbock tuž žadanja Pfeiffera wotpokazuje: „Trjebamy lěpši škit klimy. Tuchwilu wróćo zhladowace hospodarske zajimy přewažuja, město toho zo by unija trěbnosć spěšneho a socialnje znjesliweho kónca wudobywanja brunicy připóznała.