Leutkirch (dpa/SN). Zwjazkowe sudnistwo zaběra so wot dźensnišeho z lěta trajacej zwadu piwa dla. Sudnicy w Karlsruhe dyrbja rozsudźić, hač smě mała piwarnja w Allgäuju za swoju chmjelowu brěčku z argumentom wabić, zo je „tyjna“ (bekömmlich). Zwjazk za socialne wubědźowanje w Berlinje bě lěta 2015 z pomocu nachwilneho sudniskeho wukaza nawodźe Leutkirchskeje piwarnje Gottfriedej Härle zakazał, z tajkim wopřijećom za swoje piwo wabić. Wuraz móhł po měnjenju zwjazka alkoholizmej polěkować. Härtle da na to słowo na etiketach z pisakom přešmórnyć a zapoda rewiziju. Před Ravensburgskim krajnym a Stuttgartskim wyšim krajnym sudnistwom pak njemóžeše so přesadźić. Wuraz „tyjne“ je na strowotu poćahowace so słowo, kotrež njesmě so po prawidłach EU za alkoholiske napoje wužiwać, sudnicy rozsudźichu. Piwarc wobroći so na to na Zwjazkowe sudnistwo. Hdy wone doskónčnje rozsudźi, njeje znate.

Prěni cebrasmuhaty přechod za pěškow w formaće 3D w durinskim Schmalkaldenje ma so zaso zhubić. Krajny zarjadniski zarjad je městu zdźělił, zo dyrbi přechod hač do jutřišeho wotstronić, dokelž njewotpowěduje třidimensionalne zwobraznjenje nadróžnowobchadnym předpisam. Trojodimensionalny efekt nastawa přez kombinaciju běłych a ćmowych smuhow na dróze. Šoferojo awtow dóstawaja tak zaćišć, zo tam hrjady leža, a su nuzowani borzdźić.

Do swimmingpoola plumpsnyła je ćeknjena kruwa w delnjosakskim Lanhausenje pola Cuxhavena. Skoćo bě wčera rano z pastwy twochnyło. Přez kerčinu dósta so na ležownosć, hdźež padny do swimmingpoola. Wobydlerjam so poradźi kruwu njezranjenu z wody wućahnyć, a to hišće prjedy, hač přiwołana wohnjowa wobora dojědźe.

Berlin/Budyšin (SN/at). Budyska zapósłanča zwjazkoweho sejma Caren Lay (Lěwica) kritizuje, zo zwjazkowe knježerstwo w naćisku za etatowy zakoń 2018 žane srědki za nałožowanje serbskeje rěče w digitalnych medijach njepřewostaja. „To dalši raz pokazuje, zo zwjazkowe knježerstwo přechod do digitalneho wěka a přichod serbskeje rěče wohroža“, zwěsći zapósłanča. Lěwica sej žada „srědki zaso přewostajić, zo hodźał so přiměrjeny digitalny poskitk w serbskej rěči wuwić“. W etatowym naćisku je w tym nastupanju přispomnjenje zakótwjene, zo „wučinja suma hač do 31. decembra 2016 njepřetrjebanych srědkow samo­hospodarjenja 608 000 eurow“. Tež loni njeběchu žane pjenjezy za tón zaměr planowane, lěta 2016 bě jich 765 000 eurow.

Seoul (dpa/SN). Hněwajo so na wojerski manewer njedaloko swojeje mjezy Sewjerna Koreja hrozy, historiske zetkanje mócnarja Kima Jong Una z prezidentom USA Donaldom Trumpom wotprajić. Ze samsneje přičiny su tež za dźensa planowane wujednanske rozmołwy z Južnej Koreju wotprajili. Najebać politiske přibliženje je wójsko Južneje Koreje zhromadnje z jednotkami USA kóždolětny wojerski manewer zahajiło. Sewjerna Koreja ma jón za „wědomu prowokaciju“.

Diplomaća wupokazani

Istanbul (dpa/SN). Turkowske knježerstwo je po israelskim wulkopósłancu tež generalneho konsula kraja namołwiło kraj wopušćić, zdźěla turkowske wonkowne ministerstwo w Ankarje. Je to reakcija na razne postupowanje Israela přećiwo Palestinjanam w Gazaskim pasmje. Mjeztym je tež Israel turkowskeho wulkopósłanca z kraja wupokazał. Turkowski statny prezident Recep Tayyip ­Erdoğan bě postupowanje Israela „ge­nocid“ mjenował. Na to dóńdźe mjez Turkowskej a Israelom k diplomatiskej eskalaciji.

Nakładne awta do Gazy