Zo njeje wyši měšćanosta Choćebuza Holger Kelch (CDU) na swojim wčerawšim zetkanju ze Serbami w tamnišim Serbskim domje žane přilubjenja pjenježneho razu činić móhł, je zrozumliwe, wšako ma wo tym na kóncu měšćanska zhromadźizna rozsudźić. Kedźbyhódne pak je, zo je so tajke zetkanje scyła wotměło a zo je měšćanosta starosće a problemy Serbow na wědomje brał – a to nic prěni króć. By derje było, bychmy-li tež w Budyšinje tajke prawidłowne zetkanja mjez zamołwitymi města a Serbami měli, takrjec na najwyšej runinje. Słyšimy stajnje zaso argument, zo tajke styki we wšědnym komunalnym dźěle takrjec awtomatisce nastawaja, na přikład přez sobuskutkowanje krajneho rady Michaela Hariga w radźe Załožby za serbski lud. Přiwšěm wuchadźa z wosobinskich zetkanjow stajnje wažny signal mjezsobneho respekta. Dźiwy tak a tak nichtó njewočakuje. Marko Wjeńka

Žitawa (dpa/SN). Pod hesłom „Pózdnja změna“ přeprošeja wjacore předewzaća w Žitawje dźensa na dźeń wotewrjenych duri. Z akciju chcedźa wopytowarjow pohnuć so sylnišo z hospodarskej městnosću identifikować, kaž rěčnica města informuje. Cyłkownje jědnaće firmow lětsa tajki dźeń zarjaduje. Na programje steja mjez druhim wodźenja po zawodach. Młodostnym chcedźa na te wašnje powołanske móžnosće předstajić.

Kradnjene howjaze mjaso dale pře­dawał je 60lětny w delnjofrankskim Schwein­furće – a to we wulkim stilu. Kaž w policajskej rozprawje steji, bě to 370 kilogramow­ mjasa w hódnoće 5 500 eurow. Mjaso bě wón w předawarni spakosćił, hdźež móžeš žiwidła we wjetšich mnóstwach kupować. Zawčerawšim jeho lepichu a zajachu. Rubiznu wožeše paduch prawidłownje k tankowni, hdźež „kupc“ na njeho čakaše. Tón „pła­ćeše“ jemu­ dźesać eurow na kilogram.

Jako hororowy klawn předrasćeny muž je sej w porynsko-pfalcskim Frankenthalu wopačny wopor wupytał. Jako chcyše srjedu wječor młodu žonu nastróžić, kotraž bě z psom w parku po puću, kusny jeho dakl do nohi. K tomu jemu 25lětna do delnjeho ćěła kopny. Z dalšimi klawnami, kotrež w kerku čakachu, so muž spěšnje zminy.

London (dpa/K/SN). Organizacija za čłowjeske prawa Amnesty International winuje italsku policiju čwělowanja ćěkancow. Wěstotne mocy su migrantow z bićom a elektrošokami k tomu nuzowali, wotćišće porstow wotedać. Zdobom mjezynarodna organizacija italskim instancam wumjetuje, zo migrantow často tež na njedowolene wašnje wotsuwaja. Amnesty International powołuje so na woprašowanja něhdźe 170 ćěkancow w tak mjenowanych „hotspotach“.

Tysac policistow pušćili

Istanbul (dpa/SN). Dobre tři měsacy po pospytanym wojerskim puču w Turkowskej su tam 1 218 policistow pušćili. Mjez nimi je 419 oficěrow, kaž nutřkowne ministerstwo dźensa zdźěli. Zastojnikam wumjetuja zwiski k hibanju wokoło islamskeho prědarja Fethullaha Gülena, kiž bě puč 15. julija pječa naškarał. Turkowska je mjeztym 60 000 statnych při­stajenych pušćiła. Wjace hač 36 000 ludźi sedźi w přepytowanskej jatbje.

Wiki a konferencu wotewrěł