Napjatosć w stolicy přiběra
Namócne rozestajenja w zwisku z pro-palestinskimi demonstracijemi
Berlin/Tel Aviv (dpa/SN). Druhu nóc zasobu je w zwisku z pro-palestinskimi demonstracijemi w Berlinje k namócnym rozestajenjam dóšło. W měšćanskim dźělu Neukölln palachu so w nocy na dźensa wjacore awta a nakładne awto. Hišće dźensa chce Berlinski wyši měšćanosta Kai Wegner (CDU) knježerstwowe wozjewjenje wo połoženju w stolicy Němskeje pod hesłom „Berlin dźerži hromadźe – zhromadnje za židowske žiwjenje a přećiwo antisemitizmej“ wozjewić. Po debaće zapósłancow chce parlament zdobom rezoluciju přećiwo antisemitizmej a antiisraelskej hidźe wobzamknyć. Israelski wulkopósłanc w Němskej Ron Prosor a zastupjerjo židowskeje zhromadnosće w Berlinje so na posedźenju parlamenta wobdźěla.
Policija warnuje
Mužakow (SN). Zwjazkowa inspekcija policije w Ludwigsdorfje přepytuje tuchwilu pokazki, kak běchu pašowarjo zaměrnje wobydlerjow Němskeje na hraničnym přechodźe Łęknicy do Mužakowa narěčeli. Kriminelni chcychu Němcow přerěčeć, ludźi sobu wzać, kotřiž žane trěbne dokumenty za připućowanje do Němskeje njewobsedźa.
Jelizo narěčeni tomu přizwola, potom je to ilegalne, wšako wukrajnikow do Němskeje pašuja. Policija tuž wobydlerjow warnuje a namołwja, zo maja kedźbliwi być a to konsekwentnje wotpokazać. Jelizo su ludźo tajke pady hižo dožiwili, móža so pod čisłom 03581 36260 přizjewić. Za kóžde dalše informacije, kotrež móhli pady wujasnić, su zastojnicy dźakowni.
Jeničce zawčerawšim je policija blisko Mužakowa cyłkownje dźesać Syričanow, Irakčana a Marokkočana zajała. Dalšich šěsć Syričanow je sakska policija w Běłej Wodźe lepiła. Hač su mjezu w Mužakowje jako přechod wužiwali, zastojnicy tuchwilu přepytuja. Blisko Niskeje je policija nimo toho sydom Indičanow a Pakistanjana popadnyła. Dalšeho Syričana a třoch Jemenitow nańdźechu w Zhorjelcu.
To a tamne (19.10.23)
Z awtomatizowanej analyzu zwěrjećich zwukow hodźi so po studiji derje wuwiće mnohotnosće družinow we wotpowědnej kónčinje sćěhować. Tole wuchadźa z wuhódnoćenja z pomocu kumštneje inteligency (KI). W tropiskich kónčinach, hdźež bu wjele lěsa zničene, so zaso dale a wjac zwěrjatow zaměstnja. Tole wozjewi team wokoło wědomostnika Jörga Müllera z Würzburgskeje uniwersity w fachowym žurnalu „Nature communications“. Fachowcy su z pomocu kumštneje inteligency zwuki ptačkow, amfibijow a cycakow wuhódnoćili.
Zwěrjenc w Barcelonje žaruje wo Pedra. Zwěrjo běše najstarši w Europje žiwy nosorohač a je minjenu póndźelu w starobje jasnje nad 50 lětami zemrěł, zdźěli zwěrjenc španiskeje metropole.
Politikarjo reaguja wustróženi
Berlin (dpa/SN). Pospyt zapalerskeho nadpada na twarjenje židowskeho zarjadnistwa w Berlinje je politikarjow wustróžił. Žadaja sej wjac angažementa přećiwo antisemitizmej. „W Němskej mamy problem z antisemitizmom, štož njejsmy dołho chutnje brali“, zwurazni jednaćelka frakcije Zelenych w zwjazkowym sejmje Irene Mihalic. Tež w Němskej dyrbja Židźa wěsće žiwi być. W nocy na dźensa spytachu njeznaći twarjenje zapalić, potrjechena gmejna wozjewi.
Płaćizny za wolij zaso stupaja
Singapur (dpa/SN). Płaćizny za wolij na wikach razantnje stupaja. Přičina toho je eskalacija na Bliskim wuchodźe. W prěnjej połojcy tydźenja mějachu wikowarjo hišće nadźiju, zo móhli politikarjo diplomatisce přiwótřenju napjatosćow mjez organizaciju Hamas a israelskim knježerstwom zadźěwać. Dale reagowachu wiki za wolij na konjunkturne daty z Chiny, kotrež su lěpše hač wočakowane. Tuž naprašowanje za wolijom zaso přiběra, štož so na płaćizny wuskutkuje.
Negatiwne myto knježerstwu
Po zemjerženjach w Afghanistanje trjebaja dźesaćitysacy ludźi w ...
Kónc bjez wučby
Eklat na zahajenju
Frankfurt nad Mohanom (dpa/SN). Narěč słowjenskeho filozofa Slavoja Žižeka je při zahajenju Frankfurtskich knižnych wikow napjatosće zawinowała. Žižek zwurazni, zo zasudźa teroristiske nadpady Hamas na israelsku ludnosć. Přiwšěm pak skedźbni na to, zo měli tež Palestinjanam připosłuchać a jich pozadk wobkedźbować, chceš-li konflikt zrozumić. Za čas narěče někotři hosćo žurlu wopušćichu. Hessenski społnomócnjeny za antisemitizm Uwe Becker znapřećiwi Žižekej direktnje na jewišću. Becker Žižekej wumjetowaše, zo złóstnistwa Hamas relatiwizuje.
Na 75. knižnych wikach w Frankfurće nad Mohanom wočakuja fachowcy nětko politisku debatu wo konflikće na wuchodźe.
Nadpad dokładnje přepytować
Berlin (dpa/SN). Zwjazkowy kancler Olaf Scholz (SPD) je jara potrjecheny hladajo na zahubny nadpad na chorownju w Gazaskim pasmje, hdźež su prawdźepodobnje sta ludźi zemrěli abo so zranili. „Wobrazy, kotrež mje docpěja, zatraša“, wozjewi wón dźensa na internetnej platformje X. Kancler sej žada, zo měli zamołwići tónle nadpad dokładnje přepytować.
Na konflikće w Israelu wobdźělene strony wuchadźeja wšitcy z toho, zo je škody raketa zawinowała. Islamistiska Hamas a někotre arabske kraje maja Israel za zamołwiteho. Israelske wójsko pak tole raznje wotpokaza a wozjewi nahrawanja z powětra, kotrež maja dopokazać, zo je misnjena palestinska raketa chorownju trjechiła. Njewotwisne přepruwowanje wobrazow dotal žane móžne njejsu.
Mjeztym žada sej generalny sekretar UN António Guterres, zo měłoj přećiwnej stronje nachwilnje wojować přestać, tak zo móhli ludźom w Gazaskim pasmje pomhać.
Projekty pospěšić
Berlin (dpa/SN). Frakcije amploweje koalicije chcedźa cyłkownje 138 projektow za awtodróhi w Němskej pospěšić. Tole wuchadźa z próstwy wo změnu naćiska zakonja, kotraž powěsćerni dpa předleži. Połojca projektow su w Sewjernorynsko-Westfalskej. Předewšěm dźe wo to, jězdne čary rozšěrić.
Frakcije knježerstwa dojednachu so zawčerawšim na wažne reformy wobchadneho wobłuka. Projekty w zjawnym zajimje měli w přichodźe spěšnišo přesadźić. Tak dźe wo to, planowanske časy přikrótšić. „Němska ma wjele wjetšich projektow, kotrež so spěšnje dosć njezwoprawdźeja“, měni prěni parlamentariski jednaćel frakcije FDP Johannes Vogel zawčerawšim w Berlinje.
Orbán so z Putinom zetkał
Peking (dpa/SN). Šef Krjemla Wladimir Putin je so na kromje wopyta w Pekingu z madźarskim ministerskim prezidentom Viktorom Orbánom zetkał. W rozmołwje dźěše předewšěm wo wójnu w Ukrainje. Putin sej chwali, zo je najebać napjatosće, přiwšěm hišće krajow w EU, kotrež zwisk do Ruskeje pěstuja. Orbán pak zwurazni, zo běše to „ćežke“ zetkanje.
Najebać sankcije EU, spyta knježerstwo w Budapesće bilateralne zwiski do Moskwy zachować, Orbán wuswětli. Madźarska dóstawa wot Ruskeje dale płun, hinak hač je to w Němskej. Po informacijach ruskich statnych medijow chwali sej Orbán dobre partnerstwo z energijowym předewzaćom Gazprom a atomowym koncernom Rosatom. Madźarska chce ze zhromadnym dźěłom z Ruskej dale pokročować.
Wladimir Putin witaše Orbána w domje za hosći, kotryž chinskemu knježerstwu słuša. Šef Krjemla wobdźěli so hač do dźensnišeho na wjeršku „Seidenstraße“, kotryž zamołwići w Pekingu wotměja. Dobre zwiski do Ruskeje madźarskeho ministerskeho prezidenta wjele politikarjow EU kritizuja.
