Gaza/Tel Aviv (dpa/SN). Nimale šěsć tydźenjow po nadpadźe islamistiskeje ­Hamas na Israel su wojacy njedaloko chorownje Shifa w Gazaskim pasmje dwě ćěle zastajencow namakali. Mortwu 65lětnu su w pódlanskim twarjenju chorownje našli, do Israela dowjezli a identifikowali, israelske wójsko zdźěla. Žonu běchu při zahubnym masakru w Israelu z pomjezneje wsy Beeri zawlekli. Dźensa rano je wójsko zdźěliło, zo su njedaloko chorownje dalše ćěło wuhladali. Smjertne powostanki 19lětneje wojakowki su mjeztym w Israelu identifikowali. Přičinu smjerće njejsu zdźělili.

Při wojerskej akciji w najwjetšej chorowni Gazaskeho pasma su israelscy wojacy po swójskich informacijach centralu Hamas w pincy twarjenja wuslědźili.

Berlin (dpa/SN). Zwjazkowy sejm je dźensa naprawy na dobro wuwića hospodarstwa Němskeje wobzamknył. Tak mjenowany zakoń za wjace šansow hospodarstwu, kiž je amplowa koalicija zdźěłała, předwidźi dawkowe wolóženja na dobro předewzaćow hač do lěta 2028 a pospěšene procesy dowolnosćow. Pjenježne wolóženja wučinjeja kóždolětnje sydom miliardow eurow.

Centralny dypk je premija za inwesticije za škit klimy. 15 procentow wudawkow zawodow za naprawy k zwyšenju energijoweje eficiency chcedźa jako připłatk direktnje přinošować. Nimo toho planuja dawkowe wolóženja, zo bychu krizojty bydlenjotwar wožiwili. Tež přidatne dawkowe impulsy na dobro slědźenja su w programje zaplanowali. Małym a srjedźnym předewzaćam chcedźa přistup k pjenježnym wikam wolóžić. Zwjazkowa rada ma zakoń hišće schwalić. Mjez zwjazkowymi krajemi zbudźa plany knježerstwa kritiku, dokelž chcedźa jim a komunam dwě třećinje dawkoweho wolóženja nabrěmjenić.

Bychmy-li ranking najstrašnišich městnow za serbowacych ludźi měli, bychu cyle horjeka najskerje někotre partyje młodych ludźi a stadiony za kopańcu w našim regionje stali. Wšědny dźeń w nakupowanišćach, hosćencach, na dróze, w kinje, dźiwadle, kupjelach abo w lěću na přibrjoze jězoriny a w tak mjenowanych dožiwjenskich parkach relewantne riziko nałožowanja našeje maćeršćinje hižo njeeksistuje. Nawopak, kaž Bjarnat Cyž wutoru w Serbskim domje na přikładźe noweje kupnicy Nahkauf w Njeswačidle pokaza: Je rumow, hdźež ludźo wjele husćišo a bóle samozrozumliwje serbuja hač zašłe lěta. Powšitkowny pozitiwny trend we Łužicy ma wězo něšto z tym činić, zo je lěto a wjac pólsce a čěsce rěčacych hosći abo dźěłowych mocow w našim regionje. Dźakowano wotewrjenym hranicam w Europskej uniji smy nětk faktisce zaso dźěl słowjanskeho swěta – kaž do doby industrializacije, hdyž bydleše dwěsćě tysac Serbow tu. Marcel Brauman

Fürstenwalde (dpa/SN). Dźěłarnistwo za twarstwo, energiju a chemiju nochce so z planami wotnamakać, po kotrychž chcedźa twornju zhotowjerja wobručow Good­year na wuchodźe Braniborskeje zawrěć. Tak chcedźa protestne akcije zahajić a zwjazki za zachowanje produkcije wobručow w Fürstenwaldźe organizować, dźěłarnistwo wčera zdźěli, po tym zo běchu plany nastupajo zawrjenje wozjewili. 24. nowembra planuja akciski dźeń před zwjazkowym financnym ministerstwom w Berlinje. Nimo toho krajnu a zwjazkowu politiku namołwjeja, wo industrijne dźěłowe městna w Fürstenwaldźe, Fuldźe a wšudźe druhdźe w Němskej wojować, sej dźěłarnistwo žada.

Zhotowjer wobručow Goodyear chce produkciju w swojej tworni w Fürstenwaldźe skónčić. Předewzaće z hłownym sydłom w hessenskim Hanauwje je wčera připowědźiło, zo produkcija wobručow w tutym zawodźe hač do kónca 2027 wuběži. Po dotalnych planach 750 dźěłowych městnow wottwarja. Zawod w Fürstenwalde ma 930 přistajenych. Jeničce wotrjad za měšenje gumijowych ma­ćiznow ma dale dźěłać.