Karlsruhe (dpa/SN). Zeleni steja po boku Israela w boju přećiwo islamistiskej Hamas a potwjerdźa prawo israelskeho stata na wobaranje. Ludźo w Israelu njebudu nihdy w měrje žiwi być móc, „hdyž tutón teror dale traje“, rjekny wonkowna ministerka Annalena Baerbock. Naćisk zwjazkoweho předsydstwa pod hesłom „Solidarita z Israelom: Za měr, přećiwo hidźe a terorej“, je zjězd strony minjenu nóc jednohłósnje wobzamknył. W dokumenće mjez druhim na to pokazuja, zo tež palestinski lud wójny dla ćerpi a zo ciwilisća, žony a dźěći, zemrěja. Po skónčenju wójny měła so politika dospołneho zawrjenja Gazaskeho pasma skónčić a z pomocu UNO měrowy plan zdźěłać.

Gaza (dpa/SN). Z dojednanym přiměrom mjez Israelom a islamistiskej Hamas je so dźensa rano nowy wotrězk Gazaskeje wójny zahajił. Wot 7 hodź. brónje mjelča. Přiměr ma štyri dny trać. Móžno je, dobu měra na dźesać dnjow podlěšić. Wojowanja hač do poslednjeho wokomika trajachu. Samo po 7 hodź. hišće jednotliwe rakety z Gazaskeho pasma do směra na Israel lećachu.

W 15 hodź. chcychu we wobłuku dojednanja mjez Israelom a Hamas prěnich 13 w Gazaskim pasmje jatych israelskich zastajencow pušćić. Při tym jednaše so wo žony a dźěći. Nawopak chcyše Israel za kóždeho zastajenca třoch palestinskich jatych z israelskich jastwow pušćić. Tež tu dźe wo žony a młodostnych.

Za čas přiměra chcedźa – sydom tydźenjow po wudyrjenju wójny – nuzu ćerpjacu ciwilnu ludnosć w Gazaskim pasmje z pomocnymi srědkami zastarać. Tuchwilu je tam wjace hač 1,7 milionow ludźi, potajkim třećina wšeho wobydlerstwa, na ćěkancy. Pomocny skutk UNO tuž přiměr bróni nuznje trjeba.

Su naši liberalni susodźa w Nižozemskej „doprawa“ kročili? Haj a ně. Geert Wilders pleduje za wotstronjenje dotalneje praksy azyla. Přirunujo z jeho wuprajenjemi wo islamje je přerězk AfDnikow moderatny. Zdobom wón Israel podpěruje a je hižo w zašłosći zajimy jenakosplažnych porikow podpěrował – a z lěwicarskimi stronami přećiwo konserwatiwnym wothłosował. Dobyće Wildersa je wuraz wobmyslenjow w ludnosći, zo je přewjele připućowarjow, kotřiž hódnoty indiwiduelneje swobody a runoprawnosće wšěch njerespektuja. To praja pola nas tež zastupjerjo liberalneho islama kaž Berlinska imamka Seyran Ateş, kotruž dyrbi policija wodnjo a w nocy před militantnymi islamistami škitać. Jako wotmołwa njedosaha pokiw na domoródnych nacijow. Sym ze swojeje Hamburgskeje domizny zwučeny, zo je wšojedne, zwotkel něchtó pochadźa. Ale napřećo njetolerancy njejsmy tolerantni, wšojedne hač je zastupjer srjedźowěka domoródny abo migrant. Marcel Brauman

Lipsk (dpa/SN). Přiběraca ličba wot policije registrowanych padow namocy přećiwo žonam saksku ministerku za runostajenje Katju Meier jara starosća. „Móžnosće w poradźowarnjach a w žónskich domach dyrbimy dale wutwarić a rozšěrić“, rjekny politikarka Zelenych powěsćerni dpa składnostnje jutřišeho mjezynarodneho dnja k wotstronjenju namocy přećiwo žonam.

Po informacijach ministerki su lěta 2022 něhdźe 8 800 policajsce zapisanych padow domjaceje namocy přećiwo žonam zličili. To bě dźesać procentow wjace hač lěto do toho. Na 100 000 wobydlerjow mějachu w Lipsku 294 njeskutkow, w Drježdźanach 237 a w Zwickauskim wokrjesu 229 padow. „K tomu přińdźe wulka ličba njeznatych padow, dokelž so žony jara hańbuja a mnozy so ani njepřizjewja“, ministerka rozłoži.

W nalěću bě ministerstwo wuslědki swójskeho přepytowanje nastupajo njewozjewjene pady předstajiło. Po tym dožiwja nimale třećina wšěch woprašanych žonow (30 procentow) formu namócy, hdyž jich mužojo k splažnym skutkam nuzuja abo samo wumocuja.