Günther: CDU/CSU sobu zamołwita
Jednanja wo etat přestorčene
Rozmołwy zastupnikow SPD, Zelenych a FDP chcychu dźensa dale wjesć
Berlin (dpa/SN). Wodźacy zastupnicy amploweje koalicije pytaja dale za pjenjezami za zwjazkowy etat 2024. Jednanja su wčera wječor po informacijach powěsćernje dpa na dźensa přestorčili. Wo wuslědkach rozmołwow, ke kotrymž běchu so zwjazkowy kancler Olaf Scholz (SPD), wicekancler Robert Habeck (Zeleni) a financny minister Christian Lindner (FDP) w kanclerskim zarjedźe zešli, njebě spočatnje ničo znate. Scholz bě na zjězdźe SPD kónc tydźenja swój optimizm zwuraznił, zo so dojednaja. Skrótšenja na socialnym polu wón při tym wuzamkny.
Wukaz Södera před sudnistwom
To a tamne (11.12.23)
Drohotny pjeršćeń w prochsrěbaku namakali su w Pariskim luksusowym hotelu Ritz. Hósć bě drohoćinku w hódnoće 750 000 eurow pjatk při snědani w swojej stwě wotpołožił a za serwisom wołał. Pozdźišo sobudźěłaćerjej wumjetowaše, zo je pjeršćeń pokradnył. Wčera namakachu pjeršćeń z wulkim diamantom 6,5 karatow w měšku prochsrěbaka. Hotel w tym zwisku potwjerdźi, zo za loyalnosć swojich sobudźěłaćerjow rukuje.
Po překwapjacym přetorhnjenju swojeho krajneho zjězda je nalada mjez Berlinskimi Zelenymi napjata. Sobotu bě při wólbach krajneje předsydki jenička kandidatka Tanja Princ trójce přepadnyła a njebě štwórty króć wjace nastupiła. Berlinska politikarka strony Renate Künast, zapósłanča zwjazkoweho sejma, rěči wo „debaklu“. Wona kritizuje wosebje formy mjezsobneho wobchadźenja w stronje.
Faeser za dalše kontrole
Berlin (dpa/SN). Zwjazkowa nutřkowna ministerka Nancy Faeser (SPD) je připowědźiła, pomjezne kontrole k Pólskej, Čěskej a Šwicarskej po 15. decembru znajmjeńša dwaj měsacaj podlěšić. Dotalne naprawy skutkuja, rjekny politikarka SPD nowinarjam. Bój přećiwo pašowarjam, kotřiž žiwjenje ludźi za swój dobytk brutalnje na hrački stajeja, je z tuchwilnymi naprawami wuspěšny. Dotal su něhdźe 3 300 padow ilegalneho pašowanja při mjezach Němskeje wotkryli.
Baerbock nawjeduje jednanja
Dubai (dpa/SN). Wonkowna ministerka Annalena Baerbock (Zeleni) ma na mjezynarodnej klimowej konferency w Dubaiju w nadawku EU jednanja k dalšemu redukowanju klimje škodźacych płunow nawjedować. Tole wuchadźa z informacijow němskeje delegacije. Wobdźělnicy chcedźa konkretne kročele na dobro klimy wobzamknyć. Dwaj tydźenjej trajacu konferencu z něhdźe 97 000 wobdźělnikami přichodnu wutoru zakónča.
Syn prezidenta wobskorženy
Symbol nadźije za čas krizow na swěće: Grjekski ministerski ...
Blinken namołwja Israel
Washington (dpa/SN). Wonkowny minister USA Antony Blinken je Israel znowa namołwjał, wjace za škit ciwilistow w Gazaskim pasmje činić. Na zetkanju ze swojim britiskim kolegu Davidom Cameronom we Washingtonje Blinken rjekny, zo njeńdźe jenož wo to, wěstotne pasma zarjadować. Runje tak wažne je, ludźom tole tež posrědkować, zo bychu wědźeli, kak móhli sej do tuteje kónčiny wućeknyć. Nimo toho dyrbjeli ćeknjeni we wěstotnych pasmach žiwidła, wodu a medikamenty měć.
Israel dyrbi sej wulkeje ličby ciwilnych woporow mjez Palestinjanami jako sćěh wojowanjow přećiwo islamistiskej Hamas raznu kritiku lubić dać. USA su prěnje tydźenje Gazaskeje wójny ze zjawnym poradźowanjom Israela wójny dla zdźeržliwje wobchadźeli. Tole je so mjeztym napadnje změniło.
SPD stronski zjězd zahajiła
Ludźo z knježerstwom njespokojm
Berlin (dpa/SN). Jasna wjetšina ludźi w Němskej je po najnowšim woprašowanju njespokojom z dźěłom zwjazkoweho knježerstwa. 82 procentow, šěsć procentow wjace hač w nowembru, so w tutym zmysle wupraja, kaž z dźensa wozjewjeneho wuslědka woprašowanja instituta Infratest Dimap w nadawku sćelaka ARD wuchadźa. Jenož 17 procentow woprašanych je z dźěłom amploweho knježerstwa spokojom.
Tež nahladnosć zwjazkoweho kanclera Olafa Scholza (SOD) woteběra. 20 procentow ludźi je z jeho dźěłom spokojom, wosom procentow mjenje hač w nowembru. Jenož 27 procentow ludźi hišće do toho wěri, zo je Scholz swojemu zastojnstwu zrosćeny. Bychu-li zajutřišim, njedźelu, wólby zwjazkoweho sejma byli, by 14 procentow SPD woliło (minus dwaj). Zeleni bychu 15 procentow (+1) měli. FDP njeby ze štyrjomi procentami w sejmje wjace zastupjena była. Najsylniša móc je CDU ze 33 procentami (plus dwaj). Za njej přińdźe AfD z 21 procentami(-1). Lěwica ma jenož hišće tři procenty.
Nowa hida wusyta
Postupowanje Israela w Gazaskim pasmje dopomina mje na zubneho lěkarja, kiž pacienta na stólčku prosy, bolosće točenja tola hišće chwilku znjesć, wšako je bórze wšo přetrate. A hdyž israelske wójsko něhdy wozjewi, zo je wšitkich teroristow Hamas moriło a jich infrastrukturu zničiło, wostanu morjeni palestinscy ciwilisća a rozwaliny něhdy wobsydleneho pasma nad Srjedźnym morjom wróćo kaž krawne kompresy w lěkarskej praksy.
„Nječińće samsne zmylki kaž my“, bě prezident USA Joe Biden po nadpadach Hamas na Israel 7. oktobra rjekł. W lěće 2001 běchu so USA po terorowych nadpadach w New Yorku z podobnej logiku do Afghanistana podali kaž nětko Israel do Gazaskeho pasma: Zatřělimy teroristow a potom změjemy měr! Njewěm, hač je štó hdy ciwilne wopory zličił. Wěste pak je, zo njejsu ameriscy wojacy runje tak kaž israelscy wojacy jenož morjenych ciwilistow zawostajili, ale tež symjo hidy, kotrež znowa zeschadźa. Marko Wjeńka
