Zetkanje wodźacych zastupnikow SPD, Zelenych a FDP bjez wuslědka

Berlin (dpa/SN). Hladajo na zwjazkowy etat Němskeje za klětu pyta amplowa koalicija po wusudźe sudnikow w Karlsruhe dale za rozrisanjemi. Zetkanje ­wodźacych zastupnikow SPD, Zelenych a FDP je so wčera wječor – kaž běchu to wočakowali – bjez wuspěcha skónčiło. Přiwšěm rěkaše, zo bě wuradźowanje „dobra politiska wuměna“. Zwjazkowy minister za financy Christian Lindner (FDP) bě do toho w sćelaku ZDF wo njedostatku 17 miliardow eurow rěčał, za kotryž widźi „trěbnosć jednanja“.

Dale wotewrjene a wjele diskutowane je prašenje, za čo móže knježerstwo klětu hišće pjenjezy wudawać. Zwjazkowe ­wustawowe sudnistwo bě přesunjenje 60 miliardow eurow z etata 2021 do tuchwilneho etata za klimu a transformaciju zakazało. Pjenjezy běchu sej jako kredit koronakrizy dla wobstarali.

Knježerstwo dyrbi nětko spěšnje a dokładnje rozsudźić, Lindner potwjerdźi. „Stat pak je přiwšěm dale jednanjakmany“, wón rjekny. Nětko dźe wo to, pjenjezy, kiž steja k dispoziciji, najskutkownišo a zaměrnje zasadźić, wón rjekny.

Frankfurt n. M. (dpa/SN). Zdźěla widźomnje woteběraca inflacija we wjacorych dźělach Němskeje na to pokazuje, zo so podróšenje w Němskej wosłabja. W Hessenskej a Bayerskej je inflacija w nowembru pod tři procenty spadnyła. Tole wuchadźa z datow, kotrež su wčera wozjewili. Tež w Badensko-Württembergskej je inflacija dale woteběrała, mjeztym zo je so w Sewjerorynsko-Westfalskej snadnje na tři procenty znižiła.

W Bayerskej je statistiski krajny zarjad kwotu inflacije 2,8 procentow zwěsćił, po tym zo wučinješe wona w oktobru hišće 3,7 procentow. W Hessenskej spadny kwota podróšenja wot 3,6 na 2,9 procentow. Tež w Badensko-Württembergskej rěča wo słabšej inflaciji: Tam je so wona přirunujo z lońšim lětom wot 4,4 na nětko 3,4 procenty znižiła.

Z tym leža ličby inflacije w mjenowanych zwjazkowych krajach jasnje pod cyłoněmskim přerězkom podróšenja, kotryž wučinješe w oktobru 3,8 procentow. Při wšěm pokazuja płaćizny w Sakskej a Braniborskej přeco hišće nadpřerězne ličby: W Sakskej wučinja inflacija 3,9 procentow a w Braniborskej 4,1 procent.

Na policajsku stražu doběžała je psyca w nižosakskim měsće Peine pola Hannovera. Za zwěrjećom běchu cyły dźeń pytali. Do toho bě 66lětna wobsedźerka při wuchodźowanju do kolesowarja zrazyła. Na to bě so psyca wustróžiła a ćeknyła. Přichodny dźeń wuhladachu ju wokoło policajskeje straže. Jako zastojnicy durje wočinichu, psyca do zachoda skoči. Tam so policisća wo nju starachu.

Zhubjenych přeprošenjow dla su měšćanski jubilej z tysac hosćimi w bayerskim Freyungu wotprajili. Wulki dźěl přeprošenjow njeje hosći docpěł, měšćanske zarjadnistwo zdźěla. Město běchu informowali, zo drje su přeprošenja na póstowym puću něhdźe tčacy wostali. Tohodla su so zamołwići rozsudźili, swjedźeń wotprajić a klětu nachwatać. Přeprošenja běchu 16. nowembra rozesłali.

Drježdźany (SN/MG). Kubłanskej temje steještej w srjedźišću wuradźowanja Rady za serbske naležnosće Sakskeje wčera w krajnym sejmje w Drježdźanach. Tak zaběrachu so radźićeljo a radźićelka prěnjotnje z nowelěrowanjom „Postajenja Sakskeho statneho ministerstwa za kultus wo dźěle na serbskich a druhich šulach w němsko-serbskej kónčinje wot 22. junija 1992“. W tutym postajenju je ramik za serbske šulstwo zakótwjeny. Dokelž je rjadowanje hižo starše hač 20 lět, chce so rada wo nowy ramik postarać. Předsyda rady, Marko Suchy, wuzběhny, zo „je so šulstwo w poslednich lětach jasne změniło“. Wón złožuje so na přikład na zawjedźenje koncepta 2plus kaž tež na wutworjenje rěčneho­ centruma WITAJ. Nadawk, na­mjety za změny zapodać, matej nětko Domowina a Serbske šulske towarstwo. Prěnje kroki drje stej hižo šłoj. Narok pak je měł być nowelěrowanje hišće w tutej legislaturnej periodźe zwoprawdźić. Serbskaj akteraj mataj hač do wosrjedź decembra 2023 přihoty wotzamknyć, zo móža so potom z połnej paru temje wěnować.