To a tamne (06.12.23)
Słužbne awto w sněze zhubił je 21lětny w Bayerskej, po tym zo bě pěši za pomocnikami pytał. Młody muž bě do hosćenca w Seeshauptće nad Starnbergskim jězorom přišoł a wo pomoc prosył. Samsny čas pak bě na to zabył, hdźe awto steji. Tež pytanje z wjacorymi pomocnikami a policistami wosta bjez wuspěcha. 21lětny so na to rozsudźi, w hosćencu přenocować a přichodny dźeń za zasněženym awtom pytać. Hač je swój wóz skónčnje namakał, policija rjec njemóžeše.
Wjace drjewa hač dotal kradnyli su w Berlinje. Policija je hač do kónc oktobra 51 padustwow zličiła. Minjene lěta běchu stajnje 30 do 40 tajkich padow měli. Najwjace drjewa pokradnychu na twarnišćach, z lěsa abo na kromje dróhow. Tež w parkach, zahrodach a twarskich wikach ludźo drjewo spakosćichu, dokelž je zaso přiběrajcy k tepjenju wužiwaja.
Sakska płaći clanej prawiznikow
Drježdźany (SN). Dyrbi Sakska prawiznikam „Remmo-clana“ z Berlina 3,8 milionow eurow płaćić, kaž je bulwarna nowina wozjewiła? Skućićeljo su před štyrjomi lětami debjenki ze Zeleneho wjelba rubili a buchu po dźělnym wróćenju rubjenstwa na hač do šěsć lět jastwa zasudźeni. Po wuprajenju sakskeho financneho ministerstwa njeje drje suma hišće jasna. Ale stat ma za „winowatostnych prawiznikow“ płaćić – a lědma wuhlady na narunanje ze stron zasudźenych.
Šulerjo Němskeje špatni
Berlin (dpa/SN). Šulerjo w Němskej su w najnowšim přepytowanju Pisa tak špatnje wobstali kaž hišće nihdy do toho. Po dźensa předstajenych wuslědkach přepytowanja Organizacije za hospodarske zhromadne dźěło a wuwiće OSZE su so wukony 15lětnych šulerjow při čitanju, w matematice a w přirodnych wědomosćach dale pohubjeńšili. Wot lěta 2000 studiju stajnje po třoch lětach přewjeduja. Nowy test běchu lěta 2022 přewjedli.
Wjace škódnych maćiznow
Sylne zliwki w zwisku z tropiskimi wichorami su w juhoindiskej ...
Nowe protesty w Španiskej
Israel pječa wo zastajencach wě
Spěchowanske programy blokowane
Berlin (dpa/SN). Najprjedy raz žane připłatki Zwjazka wjace za energetiske poradźowanje, za natwarny program ćopłotnych klumpow a dalše spěchowanske programy: Zwjazkowy zarjad za hospodarstwo a kontrolu eksporta (Bafa) je blokowanych wudawkow w zwjazkowym etaće dla dźewjeć spěchowanskich programow najprjedy raz přetorhnyło. Financowali běchu programy z klimoweho a transferneho fondsa. Ze spěchowanskim programom za ćopłotne klumpy su dalekubłanje sobudźěłaćerjow spěchowali, kotrež maja ćopłotne klumpy zatwarić a hladać.
Nětko žane próstwy k tutym programam wjace njepřiwozmu, zwjazkowy zarjad zdźěla. Hižo přizwolene projekty chcedźa porno tomu zwoprawdźić.
Zwjazkowe wustawowe sudnistwo bě přerjadowanje 60 miliardow eurow korona-kreditow z etata 2021 do lěta 2024 zakazało. Pjenjezy chcychu w fondsu za škit klimy a modernizowanje hospodarstwa wužiwać. Knježerstwo pyta nětko za nowymi móžnosćemi financowanja.
Baerbock: Dalše kraje do EU
Němska wonkowna ministerka na wopyće w Słowjenskej
Ljubljana (dpa/SN). Wonkowna ministerka Annalena Baerbock ma přistup krajow zapadneho Balkana do Europskeje unije hladajo na nimale dwě lěće trajacu wójnu Ruskeje přećiwo Ukrainje za wažny přinošk k wěstoće Europy. „Kraje zapadneho Balkana słušeja do Europskeje unije. To njejsu hołe słowa. To je tež w našim swójskim wěstotnym zajimje“, rjekny politikarka Zelenych dźensa na swojim wopyće w Słowjenskej. „EU njemóže sej hladajo na ruski imperializm žane běłe pasma w Europje dowolić.“
W swěće, w kotrymž so krizy a konflikty w Europje w direktnym susodstwje zetkawaja, trjebaja ludźo EU, „kotraž móže tež jutře a zajutřišim spěšnje a energisce rozsudźić a wěstotu ludźi zaručić“, sej Baerbock žadaše. Za to trjebaja kraje, kotrež chcedźa so z dźělom europskeje swójby stać, reformy. „Runočasnje dyrbi tež EU swoje přilubjenja dodźeržeć a přichodne kročele w procesu rozšěrjenja EU zwoprawdźić, su-li wuměnjenja w kandidatowych krajach spjelnjene“, zwjazkowa wonkowna ministerka doda.
Söder za jasne měritka CDU/CSU
Berlin (dpa/SN). Předsyda CSU Markus Söder je kriterije za přichodneho kanclerskeho kandidata unije CDU/CSU mjenował. „Centralne prašenje při nastajenju kanclerskeho kandidata rěka: Štó móže hłosy unije najsylnišo wjazać? Po tym dyrbi so CSU rozsudźić“, rjekny bayerski ministerski prezident magacinej Stern. „Njenastupimy za někajke prózdninske dźěło. Dźe wo Němsku. Je to kaž při třělenju jědnatkow: Komu móžemy posledni bul dowěrić. Z tajkeho drjewa dyrbja politikarjo być, wšojedne, hač chcedźa so z ministerskim prezidentom abo zwjazkowym kanclerom stać.“
W padźe dočasnych nowowólbow je předsyda CDU Friedrich Merz „zawěsće faworit“, Söder rjekny. Swójski zajim, jako kanclerski kandidat nastupić, Söder wotpokazuje. „Tajka móžnosć skića so předsydźe CSU jenož jónu w žiwjenju.“ Zhromadne dźěło z Merzom mjenowaše Söder „woprawdźe jara dobre“.
Přichodne wólby zwjazkoweho sejma wotměja so nazymu 2025. Lěta 2021 bě Söder kanclersku kandidaturu unije tehdyšemu předsydźe Arminej Laschetej přewostajił, kiž pak při wólbach zwrěšći.
To a tamne (05.12.23)
Z hodownymi ćahami chce w Litawskej statne železniske předewzaće Lietuvos Gelezinkeliai wjace ludźo pohnuwać, ćahi wužiwać. Hač do 7. januara zasadźuja w čłonskim kraju EU na štyrjoch čarach ćahi ze swjedźensce wupyšenymi wagonami, kotrež su z hodownymi štomami a druhimi tradicionalnymi swjedźenskimi symbolemi wudebjene. Akciju přewjedu hižo třeći króć. Minjene lěta su we wupyšenych ćahach hač do 74 000 přidatnych sobujěducych zličili, železnica zdźěla.
Šofera taksija je policija w Japanskej zajała. Mužej wumjetuja, zo je hołbja wotpohladnje přejěł a tak zakoń wo škiće dźiwich zwěrjatow ranił. 50lětny bě při ampli šwitu hołbjow na dróze widźał. Jako bě ampla zelena, muž hnydom pospěši a do hołbjow zajědźe. Při tym jednu z nich přejědźe. Po zajeću so wón zakitowaše, pokazujo na swoje prawo, dróhu wužiwać.
Za politiku striktneje neutrality
Luxemburg (B/SN). Widźomne nošenje křiža, islamistiskeho rubiška abo kipy móže zjawne zarjadnistwo zakazać, je Europske sudnistwo rozsudźiło. „Politika striktneje neutrality“ so po słowach sudnistwa njespřećiwja zakładam nabožinskeje swobody a zakazej diskriminacije. Narodne sudnistwa a jich zarjady maja nětko pruwować, hač su pola nich wuměnjenja neutrality spjelnjene.
Hnujace rozmołwy
Eichenau (B/SN). Mnichowski kardinal Reinhard Marx je wopory seksualneho znjewužiwanja w katolskej cyrkwi we wosobinskich rozmołwach wo wodaće prosył. Zetkanja běchu za njeho hłuboko hnujace. „Wone njehodźa so cyle jednorje nabok stłóčić, dokelž dale we mni dźěłaja. Cyrkej ma rum pomocy być“, wuzběhny kardinal na dnju mjezynarodneho modlenja za wopory znjewužiwanja.
Šćuwańcam znapřećiwić
