Erfurt (dpa/SN). Na třoch šulach w stolicy Durinskeje Erfurće su dźensa rano hroženja dóšli. Kaž rěčnica policije na naprašowanje powěsćernje dpa zdźěli, jedna so wo hroženja z namocu. Powěsće su so na wotpowědnych šulach w Erfurće k wšelakim časam čitali, praji rěčnica. Tak su zamołwići jednu šulu hišće do zahajenja wučby zawrěli, na tamnej dyrbjachu hortowe dźěći ewakuować. Na dalšej šuli je policija dopołdnja wěstotne naprawy zahajiła.

Nimo toho su dźensa we Weimarskim wusyłanskim centrje „anteny Durinskeje“, „Krajneje žołmy Durinska“ a „Radio Top40“ hroženja dóšli. Tež kubłanišćo w bayerskim Bayreuthu dyrbjachu šulerjo tajkich wohroženjow dla wopušćić.

Wčera su hroženja přećiwo wjacorym šulam po cyłym Zwjazku zasadźenja policije zawinowali. Potrjechene běchu mjez druhim šule w Erfurće, Augsburgu, Regensburgu, Karlsruhe, Mannheimje, Solingenje, Wuppertalu a Kamjenicy.

Sahra Wagenknecht a jeje přiwisnicy wulki njeměr zbudźili

Berlin (dpa/SN). Dotal najprominentniša politikarka Lěwicy, Sahra Wagenknecht, je wčera z wjacorymi sobuwojowarjemi w Berlinje wustupjenje z Lěwicy wozje­wiła a plany za załoženje noweje strony prezentowała. Na nowinarskej konfe­rency předpołožichu Wagenknecht a jeje podpěraćeljo papjeru z wobsahowymi pozicijemi. Tak woni swoje zaměry ­hladajo na hospodarsku, socialnu, wonkownu, migracisku a towaršnostnu ­politiku njedawno załoženeho towarstwa „Zwjazk Sahra Wagenknecht“ wuswětlichu. Towarstwo ma załoženje ­strony přihotować. Stronu chcedźa ak­terojo w januarje załožić.

Nowa strona ma k europskim wólbam klětu w juniju nastupić. Tež při wólbach krajnych sejmow w Sakskej, Durinskej a Braniborskej klětu prócuja so kandi­datow nańć, Wagenknecht wujasni. W třoch mjenowanych zwjazkowych krajach ma AfD wjele přiwisnikow. Nowa strona móhła konkurenca być. Znajmjeńša maja wólbokmani nětko dobru alternatiwu.

W mojim wólbnym lokalu w Njeswačidle je při wólbach do zwjazkoweho sejma 2021 kandidat AfD 50 procentow hłosow dóstał – po měnjenju wjele ludźi by strona Sahry Wagenknecht tomu zadźěwała, zo budźe tajka ličba w přichodźe realita po cyłej Łužicy. Wšako Wagenknecht wušiknje „lěwu“ socialnu sprawnosć z „prawym“ wobmjezowanjom migracije zwjazuje. Snadź je klasiske rjadowanje towaršnosće do praweho a lěweho politiskeho lěhwa tak a tak zastarske. Hač budźe so nowa strona kaž Zeleni we 80tych lětach na zapadźe abo PDS w 90tych lětach na wuchodźe etablěrować abo kaž Piraća jenož krótki čas rólu hrać, je runje tak wotewrjene, kaž prašenje za jeje konkretnym programom. Jeli pak so připowědźenej nowej stronje radźi, klětu při wólbach do krajneju sejmow w Sakskej a Braniborskej nastupić, budźe tak mjenowana politiska krajina hinaša. Konkurenca wikowanje wožiwja – to płaći w demokratiji tež za wuměnu argumentow. Marcel Brauman

Madrid (dpa/SN). Španiska policija je w zhromadnym dźěle z ukrainskimi zarjadami antiksku debjenku z Ukrainy sćazała. Fachowcy cyłkownu hódnotu na 60 milionow eurow trochuja. Třoch Španičanow a dweju Ukrainjanow, mjez nimi měšnik jedneje prawosławneje cyrkwje kraja, su zastojnicy zajeli, policija wčera zdźěli. Cyłkownje jědnaće debjenkow je policija zawěsćiła. Při tym jedna so mjez druhim wo wudebjeny złoty pas z časa baroka, wuměłsce dźěłana hrudźna debjenka a z drohotnymi kamjenjemi wuhotowane rje­ćazy. Debjenki běchu posledni raz mjez lětom 2009 a 2013 w ukrainskej stolicy Kijewje wustajane. Do meje lěta 2016 su je njeznaći potom ilegalnje do wukraja dowjezli. Nětko zajeći prawdźepodobnje bandźe přisłušeja, kotraž chcyše dro­hoćinki předawać, rěka w policajskej ­rozprawje. Zajaty měšnik je z pomocu krajana a druhich wosobow dokumenty sfalšował. Tak wón na dokumentach wopisa, zo su debjenki swójstwo prawosławneje cyrkwje. Wo kotru z wšelakich ukrainskich prawosławnych cyrkwjow so jedna, policija zdźěliła njeje.