Wobydlerjow zapřijeć
Podstupim (dpa/SN). Němski kolesowarski klub (ADFC) chce hač do kónca lěta plan za syć kolesowanskich šćežkow w Braniborskej zestajeć. ADFC tuž wčera wobydlerjow namołwi, so wobdźělić. Tak móža ludźo namjety za pokiwy a sobudźěło pjeć regionalnym planowanskim teamam podawać. „Kolesowarjo najlěpje wědźa, hdźe kolesowanske šćežki pobrachuja“, wuswětli zastupowacy krajny předsyda kluba Christian Wessel. Plany chcedźa akterojo kónc lěta politikarjam přepodać.
Krajne knježerstwo je w swojej strategiji za kolesowanje 2030 drje kolesowarsku syć za Braniborsku připowědźiło, ale hišće žadyn časowy plan pomjenowało. Tuž chce ADFC konkretnje pokazać, hdźe su kolesowanske šćežki trěbne, zwurazni krajny předsyda kluba Stefan Overkamp. Zaměr politiki je, podźěl kolesowarskeho wobchada hač do lěta 2030 podwojić. „To so jenož poradźi, hdyž móža ludźo w kraju wěsće kolesować a wjace ludźi koleso wužiwa“, wón wuzběhny. Za to su nuznje lěpše kolesowarske puće trěbne.
Do kónca tydźenja zakoń předleži
Berlin (dpa/SN). Po dojednanju w koaliciji na hišće wotewrjene dypki nastupajo tepjenski zakoń su Zeleni před tym warnowali, zo sej ludźo nowe płunowe tepjenja do swojich chěžow zatwarja. Městopředsyda frakcije zwjazkoweho sejma Andreas Audretsch dźensa we wusyłanju RTL na wysoke kóšty pokaza. „To je wulke riziko.“ Wón potrjechenym radźi na ćopłotnu syć sadźić, abo sej ćopłotnu klumpu zatwarić dać.
Amplowa koalicija z SPD, Zelenych a FDP je so wčera na wobšěrny tepjenski zakoń dojednała. Tež za płunowe tepjenja su wěste rjadowanja předwidźane.
Naćisk zakonja ma so hač do kónca tydźenja přiměrić. Póndźelu chcedźa w energijowym wuběrku zwjazkoweho sejma wospjetne słyšenje fachowcow zarjadować. Zakoń móhł zwjazkowy sejm hač do 7. julija, potajkim hišće do lětnjeje přestawki, wobzamknyć.
Cyle wěsće pak to hišće njeje. Wicešef frakcije FDP Christoph Meyer podšmórny, zo chcedźa nowy zakonski tekst wočaknyć a jón dokładnje pruwować.
Macron přijědźe
Kóšty znižić
Hamburg/Berlin (dpa/SN). Zwjazkowa ministerka za twarstwo Klara Geywitz (SPD) chce směrnicy twarstwa přepruwować dać, dokelž su kóšty přewysoke. „Twarske kóšty w Němskej dyrbimy znižić“, wona powěsćerni dpa zdźěli. „Tohodla chcemy zwěsćić, kak kóšty z normami zwisuja.“
Mnohe z 500 normow DIN za twarstwo njejsu za wěstotu twarjenja trěbne, Geywitz wuswětli. „We wuměnje z fachowcami branše prěni paket normow zestajichmy, kotrež budźemy transparentnje na kóšty přepytować“, Geywitz rozjasni. K nim słušeja na přikład rjadowanja za škit před haru.
Konkretnje dźe wo to, njewotwisne pruwowanišćo zarjadować. Wo wysokich kóštach w twarstwje so hižo lěta diskutuje, tola dotal so ničo stało njeje. Přičina toho je, zo je Němski institut za normowanje (DIN) hospodarsce priwatnje organizowany. Zastupjerjo hospodarstwa a inženjerojo dojednaja so tam na normy, kotrež maja produkty a postupowanje standardizować a přetrjebarjam wěstotu dać. Prašenje, kotre normy na přikład twarjenje podróšeja, DIN njewobkedźbuje. To ma nětko pruwowanišćo zwonka DIN zdokonjeć.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (28.06.23)
Klimowe protesty nětko tež znate rjemjeslnicy Seiffenskeho ludoweho wuměłstwa tematizuja. Tak su tam wosebiteho kurjaka wuwili. Mały muž sedźi w oranžojtym lacu na šěrym spódku. Kur jemu z wušow stupa. Wo klimowych protestach ludźo wšudźe diskutuja a tuž přemyslowachmy, kak móhł kurjak wupadać, rjemjeslnicy zdźěla. Woni maja hižo nazhonjenja z aktualnymi temami. Wot lońšeho móžeš tež figury politikarjow amploweho knježerstwa kupić.
W poprawom prózdnym socialnym bydlenju w južnofrancoskim městačku Nizza su zastojnicy 40 wowcow našli. Něhdźe 50 kwadratnych metrow wulke bydlenje běše ze słomu wupołožene. Mužow, kotrajž měještaj z kreju napancanej shirtaj zwoblěkanaj, je policija zajała. Zarjady tukaja, zo chcyštaj wowcy do muslimskeho woporoweho swjedźenja ilegalnje zarězać, wčera francoske medije rozprawjachu.
Arcybiskopstwo přepytali
Köln (dpa/SN). W zwisku z přepytowanjemi přećiwo kardinalej Rainerej Maria Woelkijej su zastojnicy dźensa rano twarjenja Kölnskeho arcybiskopstwa přepytali. Zaměr bě mjez druhim zawěsćenje dokumentow, kotrež steja w zwisku z wuprajenjemi kardinala. Tole zdźělištej statne rěčnistwo a policija Köln. Nimo toho su zastojnicy tež objekty w Kasselu a Lohfeldźe w Hessenskej přepytowali. Přećiwo Woelkijej wotměwaja so chłostanskoprawniske přepytowanja podhlada přisahi dla.
Skónčnje so dojednali
Berlin (dpa/SN). Hladajo na tepjenski zakoń zwjazkoweho knježerstwa su so strony skónčnje dojednali. Na zetkanju z načolnikami frakcije SPD, Zelenych a FDP běchu wotewrjene dypki wujasnili. Kaž z kruhow FDP wuchadźa, njejsu žane zasahnjenja do swójstwa předwidźane. Tak nimaja so technologije do zakonja zapisać. Tohorunja chcedźa wuměnu tepjenjow w twarjenjach fairnje spěchować. Detaile su hišće njejasne. Naćisk zakonja nětko wotpowědnje změnja.
Putin so dźakował
Islandske konje pasechu so dźensa při schadźenju słónca na łuce ...
Wšitke sakske šule dóstanu spěšny internet
Drježdźany (dpa/SN). Swobodny stat chce, zo maja wšitke sakske šule hač do kónca lěta 2025 spěšny internet. „Za kubłanje z medijemi na našich šulach dyrbi hardware fungować“, wuswětli sakski kubłanski minister Christian Piwarz (CDU) wčera w Drježdźanach. Zakład toho je šěrokopasmowy wutwar ze škleńčanej nitku. Jenož tak hodźa so digitalne wuknjenske wobsahi abo hybridna wučba na šulach zwoprawdźić.
Ze symboliskim zarywom na zakładnej šuli w Niederfrohnje (wokrjes Šwikawa) chce předewzaće Němski Telekom štwórtk twarske dźěła we wokrjesomaj Šwikawa a sewjerna Sakska kaž tež w Rudnohórskim wokrjesu zahajić.
Dotal je po informacijach kultusoweho ministerstwa 63 šulskich nošerjow ze 131 šulemi na 85 stejnišćach poskitk přiwzali. W přichodźe maja so wone k šěrokopasmowej syći přizamknyć. Dohromady je 21,8 milionow eurow za to k dispoziciji. „Z našej šěrokopasmowej iniciatiwu wutworimy moderne a načasne wuknjenske wuměnjenja za wšitkich šulerjow“, Piwarz podšmórny.
Wusudy w zwisku ze skandalom
Mnichow (dpa/SN). Mnichowske krajne sudnistwo je něhdyšeho šefa předewzaća Audi, Ruperta Stadlera, wobšudnistwa dla zasudźiło. Kaž tamniša komora dźensa dopołdnja wozjewi, jedna so wo jedne lěto a dźewjeć měsacow na pruwowanje.
Tež sobuwobskorženaj – bywši šef wobłuka wuwiće motorow a pozdźiši předstejićer koncerna Porsche Wolfgang Hatz kaž tež inženjer P. stej chłostanje wobšudnistwa dla dóstałoj.
Wusudy su prěnje chłostanskoprawniske wusudy w zwisku z wotkrytym dieselowym skandalu w lěće 2015, kotryž je cyłu branšu střasł a škody po miliardach zawinował. Hatz a inženjer P. staj přiznałoj, zo běštaj so wo manipulaciju dieselowych motorow postarałoj. Z tym móžachu hódnoty wotpłuna na testowym stejnišću dodźeržeć. Stadler je přiznał, zo je předań manipulowanych awtow přepozdźe zadźeržał.
Nimo wusudow maja třo potrjecheni tež hišće wysoki chłostanski pjenjez płaćić. Wusudy pak žanu prawomócnosć hišće nimaja.
