Bad Saarow (dpa/SN). Wuchodna Němska móhła so po słowach zwjazkoweho kanclera Olafa Scholza z motorom hospodarskeho wuwića stać. „Njeje poprawom žaneje technologije přichoda, kotraž njeby we wuchodnej Němskej hižo zastupjena była“, rjekny politikar SPD wčera na zahajenu wuchodoněmskeho hospodarskeho foruma w Bad Saarowje. Na konferency 50 kilometrow juhowuchodnje Berlina wuradźuja hač do jutřišeho zastupjerjo politiki, hospodarstwa, wědomosće a towaršnosće wo hospodarskim wuwiću. Při tym dźe mjez druhim wo wuměnjenja za industrijne přede­wzaća, wo njedostatk fachowych mocow, wo wubědźowanje na swětowych wikach a wo zastaranje kraja z energiju. Scholz so w tym zwisku za to zasadźowaše, zo měli so mzdy na wuchodźe a zapadźe Němskeje skónčnje zbližić. Hospodarski rozmach na wuchodźe Němskeje wuwiwa so rozdźělnje. Tak je rozrost hospodarstwa w Berlinje, Braniborskej a Sakskej nadpřerězny. W Durinskej a Mecklenburgsko-Předpomorskej pak skerje słaby.

Francoski a pólski prezident z němskim kanclerom w francoskej stolicy

Paris (dpa/SN). Francoski prezident Emmanuel Macron je dźensa zwjazkoweho kanclera Olafa Scholza (SPD) a pólskeho statneho prezidenta Andrzeja Dudu na třikrajowe wjerškowe zetkanje w Parisu přijał. Planowana bě zhromadna wječer w Élyséejowym palasće, při kotrymž chcychu wo ruskim nadpadźe na Ukrainu, wo dalšej podpěrje na dobro Kijewa a wo přihotach za Ukrainu tak wažneho wjerškoweho zetkanja NATO w juliju rěčeć, w zdźělence z Berlina rěka.

Macron je so spočatnje z pólskim prezidentom zetkał. Po tym, zo bě Scholz dojěł, su z wuradźowanjemi w kruhu třoch politikarjow pokročowali, Élyséejowy palast zdźěla. W rozmołwach dźěše wo wojersku podpěru Ukrainy za wuspěšnu přećiwnu ofensiwu kaž tež wo humanitarnu pomoc runje po zničenju murje spjateho jězora Kachowka. Temy běchu tež dołhodobne wěstotne garantije na dobro Ukrainy, zo móhł kraj swoju njewotwisnosć a teritorialnu integritu škitać.

Powěsće w poslednim času zdadźa so kaž groteskna reminisenca na čas před něšto wjace hač štyrceći lětami. Nihdy njeje so telko pjenjez za brónje wudało kaž loni. Atomowe mocy wutwarja swoje arsenale a nad našimi hłowami šuskaja lětdała po njebju, zo bychu simulowany nadpad z wuchoda wotwobarali. Tež hdyž je manewer NATO hižo pjeć lět dołho planowany, je timing na ironiske wašnje tola perfektny. Smy so jako němska towaršnosć wot swojeje premisy wotbrónjenja a měrliweho rozrisanja wotwobroćili? Zda so, jako by cyły swět do wopojenosće we wóčku wójny a konfliktow padnył. Wo měrje sebi hižo nichtó rěčeć njezwěri – namóc a brónje zdadźa so dźensa rozrisanja za wšo być. Tak wudawaja politikarjo z połnymi rukami miliardy za wójsko a měnja, zo su tak lěpje na potencielne strachi přihotowani. Zo tomu tak njebudźe, wědźeše hižo Mahatma Ghandi, kiž praji: „Wóčko za wóčko a cyły swět budźe slepy . Maximilian Gruber

Dźiwje swinjo w basenku na priwatnej ležownosći w Neuenhagenje pola Berlina je zasadźenje policije a wohnjoweje wobory zawinowało. Wobydlerjo běchu zwěrjo sobotu rano w poolu wuhladali. Něhdźe 40 kilogramow ćežke zwěrjo bě prawdźepodobnje za wochłódźenjom pytało, njemóžeše pak wjace z basenka wulězć. Wobornicy wodu wotpušćichu a swinjo z pasami wućahnychu. Zwěrjo bě po wuchowanju chětru wučerpane a so bórze na to w bliskim lěsu zminy.

Hara motorowych piłow bě kónc tydźenja w Heinersdorfje we wokrjesu Wódra-Sprjewja prezentna. Tam wubědźowaše so 20 wobdźělnikow we wowčerni wo myto najspěšnišeho a najlěpšeho rězbarja z motorowej piłu „Speedcarving“. Při tym dyrbjachu w 45 mjeńšinach ze 1,10 metrow wysokeho a 30 centimetrow tołsteho zdónka wuměłsku twórbu rězbarić.