Moskwa (dpa/SN). Ruscy wobsadnicy na juhu Ukrainy rozprawjeja wo pozdatnym nadpadźe ukrainskeho wójska na wažny móst k wot Ruskeje přiswojenej połkupje Krim. Móst „Čongar“, kiž zwjazuje Krim z krajom w kónčinje Cherson, bu při nadpadźe wobškodźeny. Škody pak móža zaso wuporjedźeć, rjekny šef ruskeje wobsadniskeje mocy Chersona Wladimir Saldo. Nichtó njebu zranjeny. Saldo prezentowaše fota, na kotrychž běchu wjetše dźěry na dróhach widźeć.

Ukrainske jednotki, kotrež so tuchwilu z ofensiwu na Chersonsku kónčinu měrja, zasadźuja po informacijach Salda rakety typa Storm Shadow, kotrež z pomocu nawigaciskeho systema swój cil sami namakaja. W Kijewje njejsu so dotal k podawkej wuprajili. Wulka Britaniska bě Ukrainje rakety typa Storm Shadow, kotrež něhdźe 250 kilometrow daloko leća, přewostajiła. Rakety zmóžnja nadpady daloko za frontu. Ruska bě sej poł­kupu Krim lěta 2014 přiswojiła. Z kupy wjedu tři mosty na susodny kraj. Mosty su stajnje zaso zaměr nadpadow.

Ministerscy prezidenća wuchodnych krajow so zeńdu

Kamjenica (dpa/SN). Sakski ministerski prezident Michael Kretschmer (CDU) widźi wuchodoněmske kraje w mnohich politiskich prašenjach zjednoćene. Tole pokazuje so wosebje w konferency ministerskich prezidentow krajow, rjekny politikar CDU powěsćerni dpa. Kretschmer konferencu tuchwilu nawjeduje, wona schadźuje so dźensa ze zwjazkowym kanclerom Olafom Scholzom (SPD) w Kamjenicy. Jej přisłušeja knježerstwowi šefojo Mecklenburgsko-Předpomorskeje, Berlina, Braniborskeje, Saksko-Anhaltskeje, Sakskeje a Durinskeje. Knježerstwowe konstelacije pak su rozdźělne.

„Gremij je so jako dobry wopokazał, tu přińdu zajimy wuchodoněmskich krajow na blido“, rjekny Kretschmer. Zwjetša rěča z jednym hłosom. Aktualnje dźe ­wosebje wo dalše hospodarske wuwiće. Skrótšenje srědkow za zhromadny nadawk k polěpšenju regionalneje hospodarskeje struktury wotpokazuja. Planowane je, srědki za to w zwjazkowym ­etaće za klětu wot 650 milionow na 350 milionow eurow skrótšić.

Nowy format etablěrować žada sej sćerpnosć. Druhi raz wobdźěli so Budyšin na mjezynarodnym dnju hudźby pod hesłom Fête de la Musique. Dosć wotměnjawe přinoški zahorichu raz mjeńšu, raz wjetšu horstku na Hłownym torhošću, na Hrodowej, Bohatej, Při Pětrowej cyrkwi, na dworje Kamjentneho domu a w hosćencu Zeleny pysk; spontanje hudźeše so na přikład před radnicu a na Žitnych wikach. Tónle poskitk – tež hladajo na wčera nimale tropiske poměry – móhł bjezdwěla w magiskej nocy wjercholić. Po wšěm zdaću pak bě tójšto ludźom njewědome, što so hdy hdźe wotměwa – swjedźeń bu ze stron města skerje macošnje powabjeny. Tydźeń do zarjadowanja zdźělenčku rozesłać, kotraž połojcu programa njewobkedźbuje, za to pak jewišća připowědźi, za kotrymiž podarmo pytaš? Kooperaciskim partneram to zawěšće z motiwaciju njeje. Ćim bóle jim přeju, sćerpnosć sej wobchować. Tež tu płaći: Njejsu-li skoki móžne, dyrbimy kročałki za lubo brać. Bosćan Nawka

Nimale dwě lěće darmotnje w luksusowym hotelu bydlił je muž w Indiskej. Hotel w stolicy New Delhiju je nětko policiji škodu 65 000 eurow přizjewił. Trajny hósć bě lesćiwje postupował. Tak wupisa hotelej stajnje zaso šeki, kotrež pak banka njewupłaći. Tež sobudźěłaćer recep­cije bě wobdźěleny: Wón nawodnistwo hotela wo pakostniku njeinformowaše a nimo toho zakrywaše, hdźe „hósć“ runje bydleše. Přepytowanja policije traja.

Wjace hač 50 zahrodowych palčikow pokradnyli su njeznaći w Rhinowje, w Havellandskim wokrjesu. Padustwo běchu wutoru pola policije přizjewili. Skućićeljo su prawdźepodobnje přez płót zahrody zalězli a dekoraciju spakosćili. Zastojnicy trochuja nastatu škodu na něhdźe tysac eurow. Kriminalna policija je přepytowanja zahajiła a nadźija so pokiwow susodow a dalšich swědkow.