Postajenje njesmě płaćiwosće nabyć
Podstupim (SN/JaW). Nowe braniborske šulske postajenje za wučbu serbšćiny ma skutkownje k wožiwjenju delnjoserbšćiny přinošować. To žada sej kubłanskopolitiska rěčnica frakcije Lěwicy Braniborskeho krajneho sejma Kathrin Dannenberg. „Tohodla słuša prašenje wyšeje kwality wučby serbšćiny na agendu krajneje politiki“ sej wona dale žada. Zo by so rěč we wšědnym žiwjenju zaso zakótwiła, je wjace derje wukubłanych wučerjow za rěčne a dwurěčne předmjety trěbnych, je wona přeswědčena. Zdobom ma Kathrin Dannenberg projekt Witaj za wuspěšny, štož podkładuja ličby braniborskeho ministerstwa za kubłanje, młodźinu a sport (MBJS). Po nich je „w šulskim lěće 2016/2017 na delnjołužiskich šulach 1 678 dźěći delnjoserbšćinu wuknyło. To je 315 a tak nimale 20 procentow wjac hač w šulskim lěće 2000/2001“, politikarka potwjerdźa, „serbšćinu wuknyć je in! Nětkole dźe wo kwalitu.“ Měli tuž projekt z wotpowěnymi ramikowymi wuměnjenjemi dale spěchować, wona měni.
To a tamne (21.03.17)
Štóž dyrbi w chinskej stolicy Pekingu na zjawny nuznik a trjeba papjeru za njón, ma najprjedy raz swoje mjezwočo skenować dać. Přičina toho je přiběrace padustwa nuznikoweje papjery. Tomu maja skenery nětko zadźěwać, kaž nowiny pišu. Trjeba-li něchtó krótko za sobu papjeru, ma na nju někotre mjeńšiny čakać. Štóž sej časćišo tajku žada, tomu připrawa hižo žanu njepřewostaja.
Produkciju awtow marki BMW staj dźěłaćerjej w Mnichowskej tworni přetorhnyłoj. Wonaj běštaj so chětro wopiłoj a nimo toho joint kuriłoj. Krótko do kónca pózdnjeje słužby pak wobaj kolaběrowaštaj, na čož kolegojo nuzoweho lěkarja zawołachu. Dohromady 40 mjeńšin tam hižo ničo njeběžeše. Škodu trochuje zawod na srjedźnu pjećcyfrowu sumu.
Ćěkancow zahe dosć zadźeržeć
Rom (dpa/SN). Zhromadnje chcedźa europske a sewjeroafriske kraje migrantow po puću do Europy hižo zahe dosć zadźeržeć a tak jich pašowanju zadźěwać. Na to dojednachu so nutřkowni ministrojo Italskeje, Němskeje, Francoskeje, Awstriskeje, Malty a Słowjenskeje ze zastupjerjemi krajow Algeriskeje, Tuneziskeje a Libyskeje w Romje, hdźež dźensa wuradźowachu. Hakle kónc tydźenja běchu so zaso tysacy ćěkancow na strašny puć z Afriki do Europy nastajili.
Bankownicy optimistiscy
Frankfurt nad Mohanom (dpa/SN). Zwjazkowa banka je hladajo na konjunkturne wuwiće w Němskej optimistiska. „Němske hospodarstwo dale rozrostuje“, zdźěli banka w dźensa wozjewjenej měsačnej rozprawje. Najwažniši nošer je tuchwilu industrijny wobłuk. Naprašowanja za wudźěłkami su z kraja a wukraja. Tež wuwiće na dźěłowych wikach posudźuje Zwjazkowa banka jako pozitiwne. Přichodne měsacy liči zaso z přidatnymi dźěłowymi městnami.
Žada sej wotšćěpjenje procesa
Zwjazkowa kanclerka Angela Merkel (CDU) a premierminister Japanskeje ...
Schulz ma nětkoswoje pozicije zdźělić
Steinmeier dwanaty zwjazkowy prezident
Tón třeći so wjeseli
Wo elektrifikowanju a jednotnym tarifowym pasmje
Budyšin (CS/SN). Polěpšić struktury we wjesnych kónčinach je tema, kotruž CDU w Budyskim wokrjesu z konkretnymi předstawami zwjazuje. Wokrjesny předsyda, Budyski krajny rada Michael Harig, je minjeny štwórtk na nowinskej snědani w stronskim běrowje w sprjewinym měsće přilubił, zo maja so w Hornjej Łužicy woprawdźite alternatiwy k awtu tworić. Přewšo nuzne je elektrifikować železniskej čarje Drježdźany–Zhorjelc a Zhorjelc–Choćebuz. Jenož tak hodźi pobrachowacy zwisk Hornjeje Łužicy ze železniskim dalnowobchadom přewinyć.
To a tamne (20.03.17)
Swojeho dwulětneho synka zabyłoj staj kónc tydźenja mandźelskaj w Budyskej dźěćacej kofejowni Valentin na Róžowej. Do toho bě sej swójba z pjeć dźěćimi rjany dźeń w kofejowni popřała. Na dompuću pak nichtó njepytny, zo jedne dźěćo pobrachuje. Hakle doma zwěsćichu, zo dwulětny Lukas w awće njesedźi. Bjezposrědnje na to zawoła nan Budysku policiju. Zastojnicy hólčka nańdźechu a so wo njeho luboznje starachu, doniž njebě swójba zaso zjednoćena.
Wabjenski film za poćehnjenje, hdźež so blondinka a šup z mjenom Tomaš we łožu hrajkatej, je po měnjenju coologiskeje zahrody w Moskwje přejara erotiski. Tuž sej žadachu film hižo njewozjewić a wotpowědne sceny a wobrazy w interneće wotstronić. Coo bě šupa Tomaša za wabjenski film ekstra wupožčił.
Za wuchodne ministerstwo
Rostock (dpa/SN). Šef frakcije Lěwicy w zwjazkowym sejmje Dietmar Bartsch žada sej wuchodne ministerstwo. 27 lět po politiskim přewróće je hišće mnoho rozdźělow mjez wuchodom a zapadom Němskeje. Jako přikłady mjenuje wón w dźensnišim wudaću Ostsee-Zeitung hospodarstwo, mzdy, renty a infrastrukturu. Nowe ministerstwo měło wšitko hromadu wjesć. Mjenowane žadanje je jedyn ze zaměrow, kotrež chcył Bartsch, nastanje-li po wólbach zwjazkoweho sejma 24. septembra koalicija z SPD, zwoprawdźić.
Memorandum podpisałoj
Moskwa (dpa/SN). Bayerska a Ruska chcetej přichodnje nastupajo kulturne dźěło wušo hromadźe dźěłać. Na to dojednaštaj so dźensa bayerski kultusowy minister Ludwig Spaenle (CSU) a jeho ruski kolega Wladimir Mjedinski w Moskwje. Wobaj podpisaštaj memorandum wo spěchowanju we wobłukach hudźba, dźiwadło, reja, film, tworjace a dekoratiwne wuměłstwo, wuměna wustajeńcow a škit kulturneho herbstwa.
Israel Syrisku nadpadnył
