Bamž anglikanow wopytał
Vatikan (B/SN). Jako prěni biskop Roma je bamž Franciskus anglikansku wosadu města wopytał. Gratulujo k 200lětnemu wobstaću zwurazni wón swoju nadźiju na ekumenu. „Druhdy móže puć k jednoće pomały a njewěsty być, tola z našeho zetkanja móžemy zmužitosć čerpać.“ Runočasnje swjaty wótc wobkrući, zo pruwuje móžnu jězbu z primasom anglikanow Justinom Welbyjom do Južneho Sudana.
Ćěkancow přiwzać
Waršawa (B/SN). Waršawski arcybiskop Kazimierz Nycz sej žada, zo ma Pólska ćěkancow ze Syriskeje přiwzać. Po terorowym nadpadźe w Brüsselu w měrcu 2016 je knježerstwo we Waršawje wozjewiło, zo hižo dalšich ćěkancow njepřiwozmje. Katolska cyrkej w Pólskej, kotrejž wjace hač 90 procentow ludnosće přisłuša, njeje dotal jeničku knježacu stronu Prawo a sprawnosć wotewrjenje kritizowała. Žadanje arcybiskopa Nycza je prěnje eksplicitne wuprajenje na temu migraciska politika w Pólskej.
Marshallowy plan podpěrać
Poleći hakle pjatk do USA
Berlin (dpa/K/SN). Kanclerka Angela Merkel (CDU) so nětko prěni raz z prezidentom USA Donaldom Trumpom zetka. To je rěčnik Běłeho domu připowědźił. Poprawom by so zetkanje dźensa wotměć dyrbjało, ale ameriska strona bě je sylneho sněhowanja a wichora na wuchodźe kraja dla přesunyła. Rěčeć chce Merkel z Trumpom wo poćahach USA z Němskej kaž tež z Europskej uniju jako partneromaj we wikowanju, we wěstotnych naležnosćach a w hódnotach.
Rubiško zakazać dowolene
Luxemburg (dpa/SN). Dźěłodawarjo smědźa po dźensnišim rozsudźe Europskeho sudnistwa sobudźěłaćerkam zakazać, na dźěłowym městnje rubiško nosyć. Wuměnjenje pak je, zo su tam swětonahladne znamjenja generelnje zakazane. Přeće kupca, zo njesmě žona z rubiškom za njeho dźěłać, pak za zakaz njedosaha. W Němskej je nošenje rubiška generelnje dowolene. Přiwšěm su w jednotliwych padach wobmjezowanja móžne, wo kotrychž ma so dokładnje wotwažować.
Inflacija přiběrała
Při twarskich dźěłach mjez tak mjenowanej Choćebuskej lagunu a ...
Měrja hódnoty powětra
May ma za brexit puć zrunany
Zarjadnistwo scentralizuja
Napjatosće so přiwótřeja
Turkowske knježerstwo wumjetuje kanclerce podpěru teroristow
Ankara/Berlin (dpa/SN). Napjatosće mjez Turkowskej a Němskej so dale a bóle přiwótřeja. Tuchwilu hižo žadyn z turkowskich ministrow w Němskej njeje, zo by tu wo planowanu reformu wustawy wabił. Kaž pak nowina Bild dźensa wozjewja, předleža zwjazkowemu knježerstwu informacije, zo je hač do kónca měsaca dalšich 15 wustupow turkowskich ministrow w Němskej planowane.
Po tym zo bě turkowski prezident Recep Tayyip Erdoğan Nižozemsku „bananowu republiku“ mjenował, je so zwjazkowa kanclerka Angela Merkel (CDU) ze susodnym krajom solidarizowała. Minjeny kónc tydźenja njeje knježerstwo w Den Haagu turkowskim politikarjam dowoliło za wólbny bój wustupować. Hižo přitomnych ministrow nablaku wupokazachu. Mjeztym pak je tež nižozemskim diplomatam zakazane do Turkowskeje přińć. Erdoğan zwjazkowej kanclerce wumjetuje, zo teroristow podpěra.
Solidnje hospodariło
To a tamne (14.03.17)
Psy su listonošam skerje njepřećel. Němski póst poskića tuž swojim sobudźěłaćerjam prawidłowne kursy, zo bychu nawuknyli, kak maja so we łoskoćiwych situacijach ze štyrinohačemi zadźeržeć. Strach listonošow wšak njeje cyle njewoprawnjeny. Loni registrowachu po wšej Němskej 1 819 tak mjenowanych zetkanjow listonošow z psami. We 850 padach so sobudźěłaćerjo pósta zranichu, tak zo njemóžachu swoje dźěło dźeń abo samo dlěje wukonjeć.
Po jenož jědnaće dnjach je brazilski prezident Michel Temer z ponowjeneho palasta zaso wućahnył. 76lětny a jeho mandźelska běštaj tam njedobru energiju a strach před duchami začuwałoj, kaž magacinej Veja přeradźištaj. Wot prěnjeje nocy w palasće njemóžeštaj wobaj spać. Mandźelska prošeše samo měšnika wo pomoc, zo by lóze duchi wućěrił.
Zypries pomina USA
Berlin (dpa/K/SN). Zwjazkowa ministerka za hospodarstwo Brigitte Zypries (SPD) je knježerstwo USA napominała, faworizować wotewrjene wiki. Do jutřišeho zetkanja němskeje kanclerki Angele Merkel (CDU) z prezidentom USA Donaldom Trumpom wona warnuje, zo zawrjenje wšěch wochudnja. „Wólne a fairne swětowe wikowanje je runje protekcionistiskich a nacionalistiskich počinanjow na swěće dla trěbne“, Zypries ze wšěm dorazom zwurazni.
Stawkuja hač do srjedy
Berlin (dpa/SN). Stawk na Berlinskimaj lětanišćomaj Tegel a Schönfeld traje hišće hač do srjedy. Tole připowědźi dźensa dźěłarnistwo ver.di. Ze stawkom wojuja přistajeni wo lěpši tarifowy poskitk. Najwjac lětow ma hač do srjedy ranja w pjećich wupadnyć. Rěčnik lětanišćoweje towaršnosće pasažěrow tuž namołwja, so sčasom wo statusu swojeho lěta informować.
Wobtwjerdźa njewinowatosć
