Wolejbulisća Viktorije Worklecy pjaty raz za sobu wicemišter

Na kóncu sezony 2017/2018 wuchodosakskeje wolejbuloweje ligi muži drje su někotři přiwisnicy Viktorije Worklecy zaso raz stonali: „Znowa jenož druhe městno!“ Šibałc wšak namjetowaše: „Mjenujće so hnydom Viktoria Wicewicy!“. Znaje­rjo materije pak wědźa, kak ćežko poprawom za małe wjesne towarstwo je, tajki niwow přez lěta dźeržeć. Tež minjena sezona – to dyrbi so žno na započatku tohole rezimeja podšmórnyć – bě přiwšěm jara wuspěšna.

Bohužel započa so prěnja połserija Viktorije ze špatnym startom. Pola TSV Kundraćic rěkaše na kóncu 0:3. Hačrunjež běchu sadźbowe wuslědki jara snadne, je tajka plista jěd za sebjewědomje hrajerjow. Tak jědźechu chětro njewěsći do Zhorjelca k nowačkej CVJM a kasěrowachu tam poražku 2:3. Zhorjelčenjo w běhu sezony pokazachu, kak sylne mustwo su. Na to sćěhowaše najniši dypk „čor­neje nazymy“, absolutnje nje­trjebawša poražka 1:3 w Lubiju. Tak stejachu Worklečenjo na poslednim městnje tabulki – začuće to, kotrež běchu hižo raz w lěće 2011 w sakskej klasy dožiwili.

Wubranka města Grodka

– FC Energija Choćebuz 0:10 (0:6)

We wobłuku planowaneje sobustawskeje zhromadźizny je prezident FC Energije Choćebuz swoju rozprawu wo hospodarskej situaciji podał a wozjewił: „Smy přez transfery, wjacore mudre rozsudy a wšelake lutowanske naprawy konsolidaciju doprědka ćěrili a nadbytk 1,1 miliona eurow a tak pozitiwny wuslědk nahospo­darili.“ Na zetkanju 404 přitomnych sobustawow pak dźěše tež wo prócu łužiskich koparjow w boju wo njepřećelskosć napřećo cuzym, wo namóc a prawicarstwo. Předsyda zarjadniskeho wotrjada Matthias Auth rěčeše wo wulkich prócowanjach Energije kaž tež wo iniciatiwach koparskeho kluba.

Při přihotach na nowu sezonu je nowačk třećeje ligi njedźelu swoju prěnju testowu hru přewjedł a přećiwo wu­brance města Grodka z 10:0 jasnje dobył. We woběmaj połčasomaj pósła trenar Claus-Dieter Wollitz dwaj kompletnje rozdźělnej cyłkaj na kopanišćo. Fairni hosćićeljo so zmužiće hač do 24. min. wobarachu, po tym pak padachu jedne wrota po druhich.

Z narodnymaj mustwomaj Brazilskeje a Belgiskeje stej so dalšej cyłkaj za štwórć­finale swětowych koparskich mišterstwow w Ruskej kwalifikowałoj. Wčera popołdnju dobychu Brazilčenjo we wosmifinalu bjez wulkich ćežow přećiwo Mexiku z 2:0. Po 51 mjeńšinach nawjedowachu woni po wrotach superstara Neymara. Willian bě so spěšnje do šěs­natki předrěł a w pjećmetrowskim rumje bul prěki połožił. Tam stłóči jón Neymar přez liniju do wrotow. Srjedź dru­heho połčasa je Neymar zaso raz poka­zał, kajki wulki talent dźiwadźelić wón ma. Mexičan Miguel Layún bě ko­parjej-dźiwadźelnikej, kiž ležeše po foulu na zemi, zlochka na hwizdźel stupił. Brazilski superstar so na to teatralisce wo­koło waleše, markěrujo ćežke zranjenje. „Smy tójšto hrajneho časa dla njeho zhubili. To je hańba za kopańcu“, komentowaše trenar mexiskeje wubranki Juan Carlos Osorio „ćerpjenje“ Neymara po foulu Layúna. Při 2:0 za Brazilčanow pak běše hrajer z čisłom 10 nadobo zaso fit. Na lěwym křidle poda so wón z dołhim sprintom do šěsnatki a přihra bul prěki Robertej Firminej.