„Njebjeski hońtwjer“ w fokusu

Budyšin. Towarstwo Ad Astra Bautzen přeproša dźensa, pjatk, kaž tež jutře, sobotu, na přednošk „Njebjo nad Budyšinom – Stawizny Oriona“ do Budyskeje hwězdarnje. Dowoleja-li to wobstejnosće, změja wopytowarjo po referaće wo markantnym hwězdnje zymskeho firmamenta składnosć, sej je a „susodne“ Plejady kaž tež dalše fascinowace objekty z teleskopom wobhladać. Zarjadowani započinatej so stajnje w 17.30 hodź., zastup płaći 10 resp. potuńšeny 5 eurow.

„Raxli Faxli“ a wjac w Slepom

Slepo. Spěwytwórc Gerhard Schöne je zajutřišim, njedźelu, z hosćom w Serbskim kulturnym centrumje Slepo. Program wopřijima cyłkownje 26 pěsnjow, kotrež su – hač stary hit abo hač najnowša kompozicija – po alfabeće rjadowane. Koncert započnje so w 15 hodź., zastup płaći 18 resp. potuńšeny 12 eurow.

Starý prezentuje Einaudija

Njedźelu hornjoserbsce

11:00 Łužica tutón tydźeń

11:20 Stawizny Worklečanskeho hrodu

11:45 Serbska klasiska hudźba: „Na Mikławšku – Hórnikowy row“ Bjarnata Krawca

12:00 Nabožne wusyłanje

(Měrćin Deleńk)

po tym zbožopřeća

delnjoserbsce

12:30  Aktualny magacin, mjez druhim z přinoškom wo pjerjedrěću na Njepjelic statoku

13:00    Tematiske wusyłanje: 50 lět serbska skupina SERVI

13:40  Nabožne wusyłanje

 (Cyril Pjech)

po tym zbožopřeća

Hłowne ćežišćo februarskeho wudaća telewizijneho magacina Łyžyca je „napjata situacija nastupajo wukubłanje wučerjow“ w Delnjej Łužicy. W tym zwisku portretuja Angelu Šurmanowu, kotraž so po wjelelětnym skutkowanju na Serbskimaj gymnazijomaj na wuměnk poda. Wo móžnym rozrisanju problema rozprawja z přinoškom wo planowanych změnach wuwučowanja pedagogiskeje sorabistiki na Uniwersiće Lipsk a ze stron Braniborskeje Techniskeje uniwersity Choćebuz-Zły Komorow na tymle polu přilubjenej kooperaciji. Nimo toho wěnuja so 150. zapustej w Janšojcach a prezentuja premjeru noweho hudźbneho wideja „Do teje Góle“. Titul spěwarki ­Juliany Baruck je drje prěni w Slepjanskej serbšćinje, za kotrejež awdijowu čaru bu wizuelne wudospołnjenje profesionelnje produkowane.

Telewizija RBB wusyła Łužycu jutře, sobotu, w 13.10 hodź. Wospjetowanje na samsnym sćelaku slěduje zajutřišim, ­njedźelu, w 7.30 hodź. Telewizija MDR pokaza magacin sobotu, 28. februara, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.