Wandrowski přednošuje

Budyšin. Wo swojich lětach wandrowstwa přednošuje Chróšćan Franc Čornak štwórtk, 14. apryla, we 18 hodź. na žurli Budyskeho Serbskeho domu. Z wobrazowym přednoškom předstaji wón swoje třilětne pućowanje po štyrnaće krajach a swoje dožiwjenja w nich. Wšitcy zajimcy su wutrobnje přeprošeni.

Koncertuja do nalěća

Rěčicy. Z pisanym wěncom nalětnich melodijow wita Běłowodźanski měšćanski chór njedźelu, 17. apryla, wopytowarjow Rěčičanskeho Erlichtec dwora. Tójšto popularnych pěsnjow přeprošuje k sobuspěwanju. Šulerjo Běłowodźanskeje hudźbneje šule chór hudźbnje podpěruja. Někotři čłonojo chóra tohorunja solistisce wustupja.

Rěčne hodźiny

Kamjenc. Zapósłanča Sakskeho krajneho sejma Marion Junge (Lěwica) změje póndźelu, 18. apryla, wot 16 do 18 hodź. dalše rěčne hodźiny w Kamjenskim wobydlerskim­ běrowje swojeje strony na Zelenej hasy 1. Termin dojednać móža sej zajimcy pod telefonowym čisłom 03578/ 787 339.

Miłoćicy. Křesćansko-socialny kubłanski skutk přewjedźe přichodne měsacy zaso projektowe dny za šulerjow w zežiwjenskim a zelowym centrumje klóštra Marijineje hwězdy. Nimo wupruwowanych temow kaž „Wot zorna ke chlěbej“ su nowe, wučbnym planam šulow wotpowědowace poskitki do programa přiwzali. Tak su za wyše šule a gymnazije temu „Jědź za přichod – wuwaženosć na talerju“ koncipowali. Šulerjo zhonja, kak so wuběr žiwidłow na wobswět, strowotu a towaršnosć wuskutkuje. Projekty přewjedu w klóštrje Marijinej hwězdźe runje tak kaž na Wojerowskej Dźěćacej a młodźinskej farmje. Dalše informacije pod www.ekz-marienstern.de.

Z basnjemi a smorženkami

Budyšin. Nowa kniha Kita Lorenca „Zymny kut – Basnje a smorženki“ změje štwórtk, 14. apryla, w 19.30 hodź. premjeru w Budyskej Smolerjec kniharni. W swojej zběrce Lorenc trochu wróćo hlada, wěnuje pak so tež na zabawne wašnje dźensnišemu časej, rěka w přeprošenju na tele zarjadowanje. Na premjeru z awtorom su lubowarjo serbskeje literatury wutrobnje witani.

Wotewru wustajeńcu

Slepo. „Swětło a sćin – łužiski dźenik“ rěka wustajeńca Ralfa Buttkera, kotruž wotewru jutře, srjedu, we 18 hodź. w Slepjanskim Serbskim kulturnym centrumuje. W přehladce prezentuje Choćebužan mólby, grafiki a fotografije, w kotrychž zaběra so předewšěm z Pücklerowymaj parkomaj w Mužakowje a Rogeń­- cu. K wotewrjenju porěči wuměłc sam, wo hudźbne wobrubjenje postara so Mužakowski měšany ludowy chór. Zastup płaći za dorosćenych euro.

Socialne poradźowanje

Přednošuje wo probstomaj

Budyšin. Na přednošk do zarjadowanskeje rumnosće na Hrodowej 12 přeprošuje Budyski archiwowy zwjazk jutře, wutoru, w 19 hodź. Dr. Jens Buliš porěči na temu „Heinrich von Watzdorf a Heinrich von Brühl jako Mišnjanskaj tachantskaj knjezaj a Budyskaj probstaj“. Zastup je darmotny.

Znamjo tolerancy

Wojerecy. Pod hesłom „Wodnjo a w nocy za tolerancu“ chcedźa srjedu, 13. apryla, we Wojerecach znamjo k tolerancy a přećiwo njepřećelskosći napřećo cuzym dać. K tomu wotměje so na wšelakich městnach dohromady dwanaće zarjadowanjow. Tak dožiwja dźěći rozdźělnych kulturow wšědny dźeń w Ćiskow- skej pěstowarni, w Domje Martina Luthera Kinga budźe wot 19 hodź. syriski wječor a na Dźěćacej a młodźinskej farmje chcedźa zhromadnje rejwać.

Kedźbu, Serbja w stolicy!

Berlin. Přichodne zeńdźenje za serbskim blidom w Berlinje wotměje so štwórtk, 14. apryla. Serbja ze stolicy a wokoliny zetkaja so w 16 hodź. w hosćencu „Einstein Kaffee“ na Friedrichowej 206. Štóž ma lóšt so na zetkanjach k hajenju maćeršćiny wobdźěleć, je lubje witany.