njedźelu hornjoserbsce

11:00 Łužica tutón tydźeń z aktualnymi powěsćemi a pokiwami

11:20 live z hornjołužiskich zawodow – zjimanje akcije

12:00 Nabožne wusyłanje

(kapłan Florian Mróz)

po tym zbožopřeća

delnjoserbsce

12:30 Aktualny magacin, mjez druhim z přinoškom wo projekće „Serbski tranzit“ a reportažu „30 lět Zarjad Picnjo“

13:00 1. dźěl: Muzikaliski wulět do klasiki, 2. dźěl: Skandinawiska

13:40 Nabožne wusyłanje

(Hartmut Leipner)

po tym zbožopřeća

Třeći dźěl lětnjeje serije telewizijneho magacina Łužyca „Wulěty k narodnym mjeńšinam Němskeje“ wěnuje so Frizam. Moderator Christian Matthée zahaji swoju reportažu z wopytom Nordfriisk Instituuta (Sewjerofriziski institut) w Bredstedće, centralneje wědomostneje institucije za hajenje rěče a kultury mjeńšiny, hdźež podawaja jemu dohlad do stawiznow ludu wot 7. lětstotka. Nimo toho rozprawja Mathée z kupow Föhr a Hamburger Hallig, wo šulskim ­systemje a wuwučowanju frizišćiny w Schleswigsko-Holsteinskej a wo tamnišim radijowym programje w mjeńšinowej rěči. Wusyłanje wopřijima dale rozmołwy ze zastupnikami Rady Frizow.

Telewizija RBB wusyła magacin sobotu, 20. awgusta, w 13.30 hodź. Wospjetowanje w samsnym sćelaku slěduje srjedu, 24. awgusta, w 2.45 hodź. W mediatece RBB je Łužyca wot zajutřišeho cyłe lěto kóždy čas přistupne.

Poršicy (SN). Ewangelska wosada w Poršicach planuje jutře, pjatk, 19. awgusta, dwurěčny literarno-hudźbny wječork. Wo tym informuje Mato Krygaŕ. Kaž předsyda Serbskeho ewangelskeho towarstwa dale zdźěli chce w Poršiskej farskej bróžni bywši serbski rozhłosownik Marko Grojlich ze swojich knihow stawiznički kołowokoło Poršic čitać. Wo hudźbny dźěl wječorneho programa postara so Jonathan Witschas. W mjenje Poršiskeje wosady Susanne Tschipke tuž wšitkich zajimowanych wutrobnje přeproša być w 19.30 hodź. w farskej bróžni.

Chór Budyšin na Čornoboze

Čornobóh. We wobłuku lětušeho Dnja Hornjeje Łužicy, njedźelu, 21. awgusta, koncertuje chór Budyšin znowa při bawdźe na Čornoboze a postara so tak wo serbski podźěl na swjatku. Wšitcy zajimowani su wot 14 hodź. k hosćencej na horje přeprošeni, zdźěli předsyda spěwneho cyłka Benjamin Wirth.

Předstaji kuchinsku knihu

Kumwałd. We wobłuku rjadu „Žony na tym městnje“ wuhotuje Budyski žónski centrum pjatk, 26. awgusta, w 16 hodź. čitanje z tykancom a kofejom w Kumwałdskim hosćencu „Kleene Schänke“. Tam chce Carola Arnold swoju kuchinsku knihu „Carola kocht“ předstajić. Zajimcy njech přizjewja so hač do 20. awgusta pak telefonisce pod 03591 / 423 53 pak z mailku na , popłatk wučinja 5 eurow.