Budyšin (SN/MiR). Někotři rozmyslujo, druzy z wjesołej mysličku – tak wuńdźechu přihladowarjo pjatk wječor ze žurle Budyskeho Dźiwadła na hrodźe. Z tym je so bjezdwěla přeće hrajerkow a hrajerja inscenacije „Sei kein Frosch“ spjelniło. Hra zaběra so z temu „zbožo“. Skupinu pedagogow, kotřiž tutón dźiwadłowy kruch předstajeja, nawjeduje wot lońšeho januara sem Veronique Weber-Karpinski. Wona krótko do premjery mnohim zajimowanym wopytowarjam a wopytowarkam rjekny: „Jako hrajerski team so spěšnje na to dojednachmy, zo so klasiskej literaturje wěnować nochcemy, kaž běše to dotal z wašnjom pola nas. Mějachmy ideju za kolažu tekstow.“ We zwukowym studiju su hrajerjo swoje mysle na temu „zbožo“ nahrawali. „Při wotposkanju nahrawanjow naprašowanjow ludźi kaž tež mjezsobnych rozmołwow sym we wuprajenjach tójšto zhromadnosćow wotkryła“, rjekny Veronique Weber-Karpinski. Zwukowa kolaža je wopytowarjow premjerneho předstajenja pomału do jednanja wjedła, kotrež z jednotliwych inscenowanych tekstow ...
W kónčnej fazy sezony 2023/2024 sej koparjo z Rakec krok po kroku z pincy tabulki krajneje klasy wulězu. Tydźenja su w Chrósćicach 4:1 dobyli, sobotu doma 3:1 (2:0) přećiwo Wojerowskemu FC. Jutře wječor móhli Rakečenjo dalši krok do směra na zachowanje klasy činić, hdyž wočakuja w Rakecach wot 19.30 hodź. mustwo z Wesenitztala. Foto: Konstantin Hrjehor
Znajmjeńša štyri smjertne wopory žadali su sej wjacore tornada, kotrež su předwčerawšim, sobotu w srjedźnych zapadnych statach USA cychnowali. Wulke škody zawostajili su njewjedra wosebje w měsće Sulphur južnje stolicy Oklahoma City. Znajmjeńša 30 wobydlerjow je so zraniło. Guwerner stata je mjeztym nuzowy staw wukazał a wo pomoc stata prosył. Foto: pa/AP/Ken Miller
Pomnik za w Druhej swětowej wójnje padłych pólskich wojakow na Fulkec hórce w Chrósćicach je po cyłej Němskej jónkrótny. Na lětuše spominanje běchu wčera mnozy Serbja a pólscy hosćo ze Żarow přichwatali. Tež Dawid Statnik (předsyda Domowiny), Diana Wowčerjowa (županka) a Marko Kliman (wjesnjanosta, wotprawa) su padłym wojakam swoje mysle wěnowali. Dźěći Chróšćanskeje Serbskeje zakładneje šule „Jurij Chěžka“ wobrubichu zarjadowanje z kulturnym programom. Foto: Feliks Haza
Budyšin (SN/MiP). Tež dźensa wjedu přistajeni regionalneho bliskowobchada po cyłej Sakskej swój sobotu rano zahajeny stawk dale. „Najebać to, zo smy dobu za wudźěłanje lěpšeho tarifoweho poskitka ze stron Zwjazka dźěłodawarjow w bliskowobchadźe (AVN) podlěšili, njeje nam wón ničo předpołožił. Tak dyrbimy znowa k stawkowanju namołwjeć“, pisa dźěłarnistwo ver.di w zdźělence na swojej internetnej stronje. Paul Schmidt, nawoda fachoweho wobłuka wobchad pola ver.di zdźěli, zo chcetej so wobě stronje dźensa dopołdnja na jednansku rozmołwu zeńć. „Potom rozsudźimy, hač stawki dale wjedźemy abo nic“. Ver.di žada sej 22 procentow wjace mzdy za přistajenych. Dźěłodawarjo běchu naposledk zwyšenje mzdy 13,7 procentow a přidatnje inflaciske wurunanje poskićili.
Dr. Hartwig Kübler, kurator a nawoda ratarskeho zawoda klóštra „Marijina hwězda“ Pančicy-Kukow, je zapodał stejišćo k přinoškej „Jědojty staršik so rozmnožuje“, wozjewjeny w Serbskich Nowinach 19. apryla:K zarjadowanju problematiki nalětnjeje šědźiwki (němsce: Frühjahrsgreiskraut), wot Józefa Woka mylnje jako staršik mjenowane, ma so slědowace prajić:
