Tež nadběhi na serbskich młodostnych rozjimali
Budyšin (UM/SN). Je to snano na kontroli při zastupje a na prezency policije we wokolinje zaležało? Znajmjeńša je so wčera wječor zboha homogeny publikum do Serbskeho domu podał, zo by wjace wo knize „Mjez Saksami“ zhonił. Wudawaćelej Heike Kleffner a Matthias Meisner, Andrea Hübler z poradźowarnje woporow RAA, telewizijny žurnalist Arndt Ginzel, zapósłanc Sakskeho krajneho sejma Valentin Lippmann (Zeleni) kaž tež čłon prezidija Zwjazkoweho předsydstwa Domowiny Marcel Brauman takrjec jako hosćićel su swój wid na aktualne problemy w swobodnym staće a wosebje w Budyšinje rozłožili.
Prosće makulatura
Młodźinski dujerski orchester z pólskeje Leśnicy, Chróšćanskeje ...
Młodźinski dujerski orchester z pólskeje Leśnicy, Chróšćanskeje partnerskeje gmejny, je w tymle tydźenju w Chrósćicach probowe lěhwo přewjedł. Hudźbnicy w starobje dźesać do 22 lět zahraja jutře, sobotu, pod nawodom swojeho dirigenta Klaudiusza Lisonja we Wochožanskim parku błudźenkow a njedźelu w klóšterskej zahrodźe w Pančicach-Kukowje. Foto: Feliks Haza
Zajimcy do skały přeprošeni
Lětuša 11. mjezynarodna dźěłarnička w Miłočanskej skale Při Krabatowym kamjenju je přihotowana. Na njej chce so jědnaće wuměłcow ze wšelakich krajow wobdźělić.
Miłoćicy (SN/MiR). Krótkodobnje mějachu čłonojo towarstwa Kamjenjak lisćinu lětušich wuměłcow za 11. mjezynarodnu rězbarsku dźěłarničku změnić. Wšako bě jedyn, kiž bě so runja druhim nalěto wo wobdźělenje prócował, swoje připrajenje cofnył. Wjacorych zajimcow dla pak njeje to žadyn problem. Towarstwo je tuž dalšemu kandidatej składnosć dało so wobdźělić. Nětko přijědźe na dźěłarničku, kotraž so póndźelu w Miłočanskej skale „Při Krabatowym kamjenju“ zahaji, jědnaće wuměłcow z třoch krajow. Mjez nimi budu tři žony. Sedmjo Němcy, třo Češa a Italčan chcedźa skału ze swójskej twórbu wobohaćić. Pjećo chcedźa skulpturu z drjewa tworić, runje telko z kamjenja a jedyn z metala.
Wustaja fota wo pusćinje Wadi Rum
Wjesne žiwjenje w mólbach zwobrazniła
Irmgard Kulejowa, jedna z najwuznamnišich serbskich ludowych wuměłčow, swjeći dźensa w Bukowje pola Grodka 90. narodniny.
Rodźena 17. awgusta 1927 w Berlinje wopytowaše wona často swoju wowku w jeje Bukowskim domje při jězoru. Tam słušeštej serbska rěč a kultura k wšědnemu dnjej. Po tym zo bě so 1938 ze swojej maćerju doskónčnje do Bukowa přesydliła, ju jeje tehdyši wučer za serbstwo zahori.
Čas žiwjenja je Irmgard Kulejowa w swojich njeličomnych mólbach serbske wjesne žiwjenje a wosebje ludźi zwobrazniła a tak za přichodne generacije zwěčniła. Wo jeje žiwjenskim skutku eksistuja mjeztym film, kniha, hoberski muzealny skład a njeličomne nowinske publikacije. Wobdźěliła je so na wšěch Festiwalach serbskeje kultury a 1986 na Dnjach ludoweje kultury Choćebuskeho wobwoda w Berlinje. Po politiskim přewróće móžeše wuměłča w Spěchowanskim kruhu za serbsku ludowu kulturu a we Łužiskim domizniskim towarstwje dalše akcenty serbskeje ludoweje kultury sadźeć.
Hotuja so na tři prapremjery
Serbski ludowy ansambl přihotuje za nowu hrajnu dobu mnohe wjerški. Změja 16 premjerow, mjez kotrymiž su tři prapremjery a znowa nastudowane abo wobdźěłane produkcije.
Budyšin (SN/MiR). 180 předstajenjow steji hižo nětko na planje Serbskeho ludoweho ansambla w hrajnej dobje 2017/2018. „Zwonka łužiskeho regiona budźe 27, mjez druhim w Bayerskej a Badensko-Württembergskej a samo w Šwicarskej“, rjekny jednaćelka SLA Diana Wagnerec wčera na nowinarskej konferency w Röhrscheidtowej bašće. Zašłe lěta bě SLA přewažnje w regionje prezentny. Minjenu sezonu mějachu 120 předstajenjow, 17 z nich zwonka Łužicy. „Mjeztym pak dale a wjac partnerow, z kotrymiž smy mnohe lěta w zwisku, so zaso přizjewja z próstwu, jim předstajenja poskićić“, rozłoži Diana Wagnerowa, „tuž budźemy zaso časćišo po puću.“
Dwaj bokaj medalje
„Ow miły swjaty wječorje“
Meja hromadźe z chórom Bratrowstwa a ze solistami koncertowała
Radwor (CRM/SN). Serbski spěw a dobra bjesada wabitej kóždolětnje Radworčanow a hosći na koncert před tamnišej Starej cyrkwičku. Zo by wočakowanjam wotpowědował, nałožuje chór Meja ze swojim dirigentom Pětrom Cyžom wjele prócy. Tak wotmě so tež sobotu wječor zaso kedźbyhódny koncert.
Mnohorěčna lyrika na hrodźe słyšeć była
Wojerecy (bn/SN). „Dźakuju so za hodźinku wuknjenja a sonjenja. Běše wjeselo, wam připosłuchać.“ Z tymile słowami zakónči předsyda Wojerowskeho wuměłstwoweho towarstwa Martin Schmidt pjatk wječor Dźeń poezije a swobodneho słowa. Po rańšim zarjadowanju ze šulerjemi 10. a 11. lětnika na gymnaziju Johanneum (SN rozprawjachu) a po wuprawje wobdźělenych awtorow a basnikow do Čorneho Chołmca kaž tež po rozmołwje w zetkanišću Brigitty Reimann wuklinča zarjadowanje z čitanjom před něhdźe dwaceći zajimcami na žurli Wojerowskeho hrodu.
Cyłkownje dźewjeć spisowaćelow předstaji swoje basnje serbskeho awantgardista Jurja Chěžki, kotremuž bě zarjadowanje składnostnje jeho stoćin wěnowane. Dorothea Šołćina a Tomasz Nawka z Budyšina recitowaštaj dwurěčnje serbsce a němsce. Hdys a hdys słyšachu hosćo k tomu čěske přebasnjenje Milana Hrabala, kiž swójskej twórbje w swojej maćeršćinje a serbsce přednjese.
