Praha. Sčasom je čěska wjedrowa słužba připowědźiła, zo čaka kónc tydźenja mjez druhim na Čěsku wulke njezbožo. Na rozdźěl wot wulkeje wody 1997 na Morawje a 2002 w Čechach, hdyž bu tež Serbski seminar přepławjeny, je stat hnydom reagował. Tohodla je so přihotowała wohnjowa wobora, policija, wójsko, sanitetarjo, wšitcy su pjelnili měchi z pěskom, na někotrych městnach – tež w Praze na Małej stronje njedaloko Serbskeho seminara – mobilne murje přećiwo wulkej wodźe twarili. Předewšěm je so stat rozsudźił, wšitke rěčne zawěry wotpušćeć.

Wěste pak njebě, hač budźetej Serbski seminar a Hórnikowa knihownja wohroženej abo nic. Tohodla sym jako předsyda Towarstwa přećelow Serbow pjatk rozsudźił, zo změje předsydstwo kónc tydźenja hotowosć. Štóž je w Praze, dyrbi w měsće wostać. Běch z šefinu Sakskeho kontaktneho běrowa Josefinu Ofner dorěčał, zo směmy wšo pola nich na prěnim poschodźe zawostajić. To je konkretny wuslědku dobreho susodstwa.

Pólski zarjad za bój přećiwo korupciji přepytuje wikowanja z diplomami

Waršawa (dpa/SN). Zastojnicy pólskeho antikorupciskeho zarjada CBA su bywšeho zapósłanca Europskeho parlamenta Ryszarda Czarneckeho wjele lět knježaceje strony PiS zajeli. Politikarja su na Waršawskim lětanišću dosahnyli, rěčnik nutřkowneho ministerstwa nowinarjam zdźěli. Tež žonu Czarneckeho su zajeli. Po informacijach rěčnika přepytuja přećiwo bywšemu wiceprezidentej parlamenta EU njeprawidłownosćow na priwatnej wysokej šuli Collegium Humanum dla. Što statne rěčnistwo politikarjej a jeho mandźelskej wumjetuje, njeje znate. Rěčnik nutřkowneho ministerstwa powěsćerni PAP zdźěli, zo jedna so wo kupowanje wuswědčenjow na wysokej šuli w zwisku z wobtykanjom. W juliju bě antikorupciski zarjad CBA rektora priwatneje wysokeje šule a šěsć dalšich wosobow zajał. Podhladnym wumjetuja, zo su z diplomami wikowali. Po informacijach pólskich medijow su wjacori politikarjo PiS na wysokej šuli w spěšnokursach diplom MBA (Master Business Administration) wotzamknyli.

Praha (dpa/SN). Čěska hotuje so na hrožacy sylny dešćik w přichodnych dnjach. Na mnohich spjatych jězorach wotpušćichu wulke mnóstwa wody, zo bychu jich kapacity powyšili. We wodowej milinarni Vrane při Wołtawje blisko Prahi powyšichu mnóstwo přećežaceje wody wot 40 na 120 kubiknych metrow na sekundu. To ma tež wuskutki na Łobjo, wšako so Wołtawa blisko Melnika z Łobjom zjednoći. W Usti nad Labem staw wody pomału stupa. Tež podłu Wódry spytaja kapacity powyšić. Čěska wjedrowa posłužba warnuje před ekstremnym strachom sylneho dešćika, wysokeje wody a powodźenjemi. Wosebje wuchodny dźěl kraja drje budźe potrjecheny. „Situaciju, kotruž w přichodnych dnjach změjemy, je bohužel jara podobna tej wulkich powodźenjow w lětomaj 1997 a 2002“, warnowaše čěski minister za wobswět Petr Hladik. Nutřkowny minister Vit Rakusan namołwješe ludnosć planowane zarjadowanja wotprajić, njemóže-li so wěstota garantować. Warnowanje wupraji Rakusan wosebje za aktiwity blisko rěkow a rěčkow. Ludźo w regionach z rizikom popławjenja měli sej kófry spakować.

Marek Krawc rozprawja wo aktualnje rozjimanych temach w Čěskej

Praha. Lětsa zličichu w Čěskej 57 tropiskich dnjow z temperaturami wyše hač 30 stopnjow, zdźěli Čěski hydrometeorologiski institut minjenu póndźelu. Prěni woprawdźe horcy dźeń w tutym lěće bě 7. apryla. Jenož w lětomaj 2003 a 2018 zwěsćichu wjace tajkich dnjow. Runje tropiski dźeń bě sej přistajeny płuwarnje w čěskim Krumlovje za wotstronjenje wosaceho hnězda wupytał. Za swoje předewzaće bě so za drastisku metodu ze sprayom a zapalowakom rozsudźił. „Při­stajeny njeměješe šansu reagować, tak spěšnje bě so třěcha zapaliła“, wopisuje wohnjowy wobornik Jiří Chmel katastrofu. „Třěcha paleše so tak spěšnje, zo smy so boja přećiwo płomjenjam wzdać dyrbjeli. Na zbožo njebě nichtó w twarjenju“, praji Chmel. Płuwarnja, do kotrejež chodźi lětnje 75 000 ludźi a w kotrejž wot­měwaja so hłownje płuwanske kursy za šulerjow, je so bohužel wotpaliła.