Marek Krawc rozprawja wo aktualnje rozjimanych temach w Čěskej

Praha. Knježerstwo zwjazkoweho kraja Hornja Awstriska kritizuje plany čěskich politikarjow, w južnočěskej atomowej milinarni Temelín tak mjenowany mały modularny reaktor (SMR) natwarić. Krajny zamołwity za energijowu politiku ­Stefan Kaineder ma tute předewzaće za „eksperiment z atomowej milinu“, kotryž knježerstwo Hornjeje Awstriskeje tole­rować njeměło. Zdobom připowědźi ­Kaineder wotpowědne kroki přećiwo wutwarej milinarnje.

Hižo před tydźenjemi bě so domjacnosćam w Pólskej zaručiło, zo wostanu ­płaćizny za milinu tež w lěće 2023 na lětušim niwowje, hačrunjež jenož hač do postajeneje hranicy přetrjeby. Tuta garantija měješe płaćiwosć hač do maksimalneje cyłolětneje přetrjeby wot 2000 kilowattow na hodźinu (kWh) na domjacnosć, 2600 kWh na domjacnosć z dźěsćom abo zbrašenej wosobu abo 3000 kWh za swójby z wjace dźěćimi (ze znajmjeńša třomi dźěćimi).

Konkretna płaćizna miliny by při tym dale wostała wotwisna wot zastaranskeho předewzaća w regionje. Po informacijach pólskeho portala přirunanja płaći­znow Rachuneo sahachu přerězne płaćizny za elektroenergiju na přikład w okto­brje 2022 wot 0,72 złotych (0,16 eurow) na kWh w najtuńšej kónčinje Zielonej Górje hač do 0,80 złotych (0,18 eurow) w najdróšej kónčinje – stolicy Waršawa.

Móhli narunanje za wobswětoškódne brunicowe milinarnje być

Praha/Bayreuth (dpa/SN). Zwjazkowe knježerstwo chce so klětu w aprylu wot atomoweje energije rozžohnować. Cyle hinak postupuja porno tomu w susodnej Čěskej. Tam chce liberalno-konserwatiwny kabinet podźěl atomoweje mocy na produkciji miliny hač do lěta 2040 na wjace hač połojcu rozšěrić. Klučowu rólu maja při tym „atomowe mini milinarnje“ – nowe jadrowe milinarnje w małym formaće – zabrać.

Petr Závodský z energijoweho koncerna CEZ je za plany zamołwity. „Jedna so wo připrawy ze samsnym principom kaž pola wjetšich reaktorow, ale ze snadnišim wukonom“, wón wuswětla. Tež tu nastawa para, kotraž ćěri turbinu a generator, kotryž zaso milinu produkuje. Nic jenož wukon je snadniši, niše su tež inwesticiske kóšty. Nowe kuzłarske słowo nuklearneje industrije rěka „Small Modular Reactor“ (SMR), potajkim małe modularne reaktory. „Tu njerěčimy wo reaktorach z Ruskeje abo Chiny, ale jenož wo produktach zapadnych zhotowjerjow“, Závodský potwjerdźi.

Dale a snadniša ličba porodow w Pólskej zjawnosć chětro zaběra

Waršawa. Nawoda pólskeje knježaceje strony Prawo a sprawnosć (PiS) Jarosław Kaczyński ze swojej dowólbnej jězbu pokročuje. Minjenu sobotu, 5. nazymnika, přebywaše wón w Ełku, měsće na sewjerowuchodźe kraja. Štož tam snadnu ličbu porodow nastupajo rjekny, je so jara spěšnje do medijow cyłeho swěta dóstało. Jeho słowa „žony žane dźěći nimaja, dokelž přewjele pija“ citujetej tež ame­riska nowina „The Washington Post“ a wulkobritaniski dźenik „The Guardian“. „Berliner Kurier“ samo přispomnja, zo Kaczyński ze swojimi wuprajenjemi ludźi dale a bóle nastróža. W Szczecinje a Poznanju přewjedźene naprašowanje wšak wujewja hinaše přičiny. Młodym ludźom pobrachuja wotpowědne wuměnjenja, swójbu załožić a so wo potomnistwo starać. Woni wobžaruja, zo je přemało žłobikow a pěstowarnjow, ale tež, zo su bydlenja předrohe. Žony pak so samodruhosće boja, dokelž dyrbja lěkarjo w padźe komplikacijow při porodźe po nowych zakonskich předpisach na dobro dźěsća a nic maćerje rozsudźić.