Miłe wjedro so wuskutkowało
Budyšin (SN/at). We wuchodnej Sakskej bě w februaru 20 266 bjezdźěłnych, 172 mjenje hač w januaru a 1 794 ludźi mjenje hač loni w februaru. Aktualna kwota bjezdźěłnosće w regionje je 7,2 procentaj. Wo tym informuje dźensa Budyska agentura za dźěło.
„Miłe wjedro je k tomu přinošowało, zo njetrjebaše so přičiny počasa dla porno předměsacej telko ludźi bjezdźěłnych přizjewić. Wuchadźam z toho, zo wuchodosakske předewzaća wot měrca zaso wjace personala přistaja“, wuzběhny Thomas Berndt, předsyda jednaćelstwa tudyšeje dźěłoweje agentury. Wuměnjenja za rozrost su po słowach Thomasa Berndta spomóžne, wšako su jeho sobudźěłaćerjo hižo w februaru wjace hač 1 095 nowych dźěłowych městnow do poskitka agentury přiwzali.
Wot bjezdźěłnosće běchu znowa wosebje mužojo potrjecheni. Ličba bjezdźěłnych muži je w běhu měsaca wo 100 na 11 805 přiběrała. Pola žonow je ličba bjezdźěłnych minjene tydźenje wo 272 na 8 461 woteběrała. Powjetšiła je so tež ličba bjezdźěłnych młodostnych w starobje do 25 lět wo 85 na 1 273.
Łužiska hwězda
Karlsruhe (SN/bn). Najwažniši gastronomiski knižny přewodnik „Guide Michelin“ wozjewja kóžde lěto lisćinu wuznamjenjenych restawrantow. W nětko wušłym němskim wudaću za lěto 2019 jewi so za srjedźoněmski rum, to rěka za zwjazkowe kraje Durinsku, Saksko-Anhaltsku a Saksku, cyłkownje dźesać hosćencow. Jenički w tym nastupanju mjenowany z dwěmaj „hwězdomaj“ je dale Lipšćanski „Falco“. Wjetšina z jednej hwězdu wuznamjenjenych hosćencow je ze Sakskeje. W Saksko-Anhaltskej smě so kaž w Durinskej jedyn lokal dale ze sławnej tafličku na durjach pyšić. Mjez wosom restawrantami w Sakskej stej z kuchnjomaj „Genuss-Atelier“ w Drježdźanach a „Atelier Sanssouci“ w Radebeulu nowačkaj na lisćinje.
Klětu matej jězoraj zwjazanej być
Łužiska a srjedźoněmska towaršnosć hórnistwoweho zarjadnistwa łužisku jězorinu zaměrnje powjetša. Dale a wjac bywšich brunicowych jamow saněrar z pławnymi kanalemi zwjazuje, mjez druhim ma tajki bórze tež blisko Blunja nastać.
Bluń/Zabrod (SN/JaW). Wobydlerjo Blunja a Zabroda maja so přichodnje na twarsku haru a někotre změny nastajić. Kaž zdźěla tele dny Łužiska a srjedźoněmska towaršnosć hórnistwoweho zarjadnistwa (LMBV), je wona twarskemu zawodej STRABAG nadawk dała, njedaloko Blunja móst na nasypje mjez Blunjanskim južnym a Zabrodskim jězorom natwarić. Móst ma tam wobstejacy hospodarski puć dale zwjazować. K zakónčenju projekta ma twarska firma potom nasyp pod mostom wotstronić a wobaj jězoraj ze sobu zwjazać. Hač do 30. apryla 2020 maja twarske dźěła zakónčene a jězoraj zwjazanej być a nastawaca łužiska jězorina dale rozšěrjena być, rěka w planje LMBV. „Nowy móst přeprěči tak mjenowany přesmyk čo. 3 při hospodarskim puću pola Blunja. Kanal wudospołnja tak nastawacu a přichodnje pławnu łužisku jězorinu“, hórnistwowy saněrar informuje.
Wuspěšnu firmu dale wjedźe
Wot kónca 1990tych lět je Knopec twarski zawod z Jawory na njeličomnych twarnišćach w dwurěčnych gmejnach dźěłał. Wotnětka nima předewzaće jenož noweho šefa, ale tež nowe mjeno.
Wěteńca (SN/MWj). Swětły transporter před wulkim nowonatwarjenym domom we Worklečanskim Nukliku njeje přewidźeć. Wulke pismiki skedźbnjeja na to, zo jedna so wo jězdźidło Hickec twarskeho zawoda. Mjeztym zo instalaterojo wulki tepjenski kotoł připrawjeja, pódla nich Marko Hicka garažu wuplestruje. Wón je spočatk lěta swójski twarski zawod załožił, naslědujo twarske předewzaća Jaworčana Stefana Knopa. Dokelž so tajke něšto wot dźensa na jutře njestanje, je so 39lětny Wěteńčan na tónle krok dołho přihotował. „Sym wot lěta 2002 w Knopec zawodźe dźěłał a 2013 mišterske wukubłanje zakónčił, štož bě sobu wuměnjenje, zo móžu so w twarskej branši zesamostatnić“, twarski fachowc powěda. Zo powjedźe wón zawod pod swójskim mjenom, bě tohorunja dołhodobnje dorěčane.
Hněw na nawodnistwo předewzaća Maja přiběra
Kulow (SN/BŠe). Sobudźěłaćerjo Kulowskeje mebloweje twornje Maja ćišć na nawodnistwo předewzaća zesylnjeja. Wčera su so krótkodobnje k protestnemu zarjadowanju před stejnišćom zhromadźili, zo bychu na połoženje skedźbnili. Krótkodobnje bě dźěłodawar mjenujcy jednanje wo zwoprawdźenju tarifoweho zrěčenja wotprajił. Poprawom wšak měješe dźěłarnistwo IG metal hišće nadźiju na konstruktiwne zhromadne dźěło. To pak so z wčerawšim wotprajenjom změni. „Jednostronski rozsud dźěłodawarja, termin krótkodobnje wotprajić, je hladajo na jednanje napřećo kolegam njesprawne. Wuchadźamy nětko z toho, zo předewzaće tamnej dwaj dojednanej terminaj dodźerži“, wuzběhny prěni społnomócnjeny dźěłarnistwa IG metal za wuchodnu Saksku Jan Otto. „Hewak móhł so z protestneho zarjadowanja tež spěšnje warnowanski stawk wuwić.“
Elektrifikacija so dale dliji
Drježdźany (SN/BŠe). Kak elektrifikaciju železniskeje čary mjez Drježdźanami a Zhorjelcom financować, je dale njejasne. Wo tym informuje zapósłanc zwjazkoweho sejma Torsten Herbst (FDP), kiž je zwjazkowemu knježerstwu małe naprašowanje stajił a so wo połoženju wobhonił. „Hdy skónčnje elektrifikowany zwisk změjemy, je dale wotewrjene. Tak dyrbimy hišće hač do kónca lěta wočaknyć, hač projekt hódnoćenske kriterije programa zwjazkoweho knježerstwa za elektrifikaciju spjelnja“, zapósłanc wuzběhnje. Cyłkowne kóšty projekta wučinjeja 500 milionow eurow. Suma, kotruž je knježerstwo za program přewostajiło, je pjeć milionow eurow. „To ani za kilometer njedosaha“, je Torsten Herbst přeswědčeny.
Hač do tysac kórkow wot dźensnišeho w Hamorskej rostlinarni ...
Připóznaće za kolesowarske tury
Dowolnicy we Łužicy prašeja so za dale a wjace kolesowanskimi móžnosćemi. Łužiscy turistikarjo su tuž wužadani a reaguja z naprawami.
Zły Komorow (AK/SN). Dźeń a wjetšeho naprašowanja za poskitkami kolesowanja dla chce turistiski zwjazk Łužiska jězorina zajimcow sylnišo do kraja jězorow wabić. „Tohodla smy so rozsudźili nimale rozebranu brošurku k jězorinowej čarje znowa nakładować“, podšmórnje zamołwita za zjawnostne dźěło a marketing zwjazka Katja Wersch. „Kolesowarjam přichileni poskićerjo přenocowanjow, gastronomojo a přenajerjo kolesow podłu čary kaž tež poskićowarjo kolesowanskich pućowanjow móža so nětko wo zapis do njeje prócować.“
Dźe wo tarify
Kamjenc (SN/JaW). Baterijowa twornja Deutsche Accumotive w Kamjencu a dźěłarnistwo IG metal stej wčera jednanja wo tarifowych zrěčenjach zahajili. Kaž zdźěli dźěłarnistwowa sekretarka Eileen Müller wuchodosakskeje wotnožki IG metal w Budyšinje, stej sej stronje přezjednej, stejnišćo w Lessingowym měsće skrućić a na přichod wusměrić. „Předstawy wobeju partnerow pak su hišće daloko wot so zdalene“, rěka w nowinskej zdźělence. „Ćim bóle zwjesela, zo móžachmy so na to dojednać, spěšnje a bjez haćenjow jednać. Dalše tři jednanske terminy we wotstawku maksimalnje dweju do třoch tydźenjow su hižo jasne“, rjekny prěni społnomócnjeny dźěłarnistwa za wuchod Sakskeje Jan Otto.
Z restawrowanjom wudźěłkow stawizny zachować
Na wopyće w dźěłarni blidarja a hladarja pomnikow Krystofa Žura
Při hłownym wjesnym puću wosrjedź Chrósćic pokazuje tafla z napisom „Denkmalpflege Sauer GmbH & Co.KG – www.denkmalpflege-sauer.de“ (Hladanje pomnikow Žur) na to, zo je w bywšim Čornakec zežiwidłowym wobchodźe zaměstnjena blidarnja, specializowana na hladanje pomnikow. Wo wobchodźe njeje w nětčišej wulkej dźěłarni-blidarni ničo wjace widźeć. Wjacore mašiny – wšelake piły, frezawy, pačidła a dalše za blidarja wažne nastroje a dźěłowe graty – a po rumnosći składźene deski, dźěłarnju wupjelnjeja. Wóń sucheho drjewa chójny ći do nosa stupa. Zdobom čuješ tež wóń lěpka, kotryž blidarjo za swoje dźěło wužiwaja.
