Zwjazk z nowym jednaćelom
W jězorinje stacije twarić
Tornow (AK/SN). We Łužiskej jězorinje ma bórze wosom stacijow ADAC za reparowanje kolesow nastać. Tole su čłonojo zwjazka Łužiska jězorina Sakska jednohłósnje na zašłej zhromadźiznje wobzamknyli. Zhromadnje z wobchadnym zwjazkom ADAC Sakska, komunami a priwatnymi wobsedźerjemi ležownosćow chcedźa projekt zwoprawdźić.
Tam, hdźež wjele turistow přichadźa – při jězorach, kolesowarskich šćežkach, při škitnych hětach abo informaciskich taflach – maja so stacije natwarić. Po móžnosći hač do apryla, takrjec do spočatka noweje sezony, dyrbi wšitko hotowe być.
ADAC chce stacije darmotnje k dispoziciji stajić. Nimo toho wobchadny zwjazk hladanje stacijow a narunanje skóncowanych abo zhubjenych gratow zawěsći. Dale přewozmje ADAC kóšty za material w zwisku z instalaciju kolesowanskich stacijow. Sobudźěłaćerjo zaměroweho zwjazka pak maja fundamenty přihotować a so wo wotpowědne dojednanja z mějićelemi ležownosćow starać. Tohorunja změja woni prawidłownje staw stacijow kontrolować. Hdźe stacije dokładnje nastanu, to akterojo hišće wothłosuja.
Saněrowanje jězora w kónčnej fazy
Saněrowanje Hórnikečanskeho jězora je kónčnu fazu docpěło. Na to skedźbni Karsten Handro, nawoda saněrowanskeho wobłuka Łužica pola Łužiskeje a srjedźoněmskeje towaršnosće hórnistwoweho zarjadnistwa (LMBV) na decemberskim posedźenju gmejnskeje rady we Łazu.
Łaz (AK/SN). „Wuchodny pobrjóh Hórnikečanskeho jězora ma w druhim kwartalu 2025 zawěsćeny być. Po tym zawěsćimy wobłuk, kotryž je so zesunył“, wón wuswětli. Wotpowědne dźěła za to chcedźa w februarje wupisać.
Zastaraćel płaćizny znižił
Budyšin (SN). Nowe lěto móža so kupcy dalnoćopłoty Budyskeho energijoweho zastaraćela EWB wjeselić, dokelž su płaćizny lětsa znižili. Přiměrjenje potrjechi něhdźe 14 000 priwatnych a wobchodnych kupcow EWB. Płaćizna za dalnoćopłotu so z wjacorych płaćiznowych dźělow zestaja. Přerěznje EWB cyłkownu płaćiznu wo 15 procentow zniži. Jedna domjacnosć ze třomi wosobami we wjaceswójbnym domje z lětnjej přetrjebu něhdźe 12 000 kilowattnych hodźinow drje wob lěto 300 eurow lutuja.
Pozadk nišich płaćiznow za dalnoćopłotu su w zrěčenjach podate płaćizny, kotrež so na dobu dwanaće měsacow wuliča. Te běchu naposledk niše hač wočakowane. W Budyšinje produkuja dalnoćopłotu mjenujcy ze zemskim płunom. Za njón je energijowy zastaraćel mjenje płaćił, hač su do toho wobličili.
Nowe lěto móža so tež kupcy miliny nad spadowacymi płaćiznami za milinu wjeselić. Płaćizna na kilowattowu hodźinu w zakładnym zastaranskim produkće „Bautzner.Strom“ je wot wčerawšeho wo dwaj centaj brutto tuńša.
Za perspektiwu młodych ludźi trěbny
W zwisku z centrumom za astrofyziku w Zhorjelcu ma so pod zemju wosebity teleskop twarić. Łužica je jedne z faworizowanych stejnišćow, štož mnohe gremije w regionje podpěraja.
Zhorjelc (AK/SN). Euroregion Nysa w třikrajowym róžku mjez Němskej, Pólskej a Čěskej so k zasydlenju wulce moderneho Einsteinoweho teleskopa za slědźenje w swětnišću wuznawa. To je wuslědk minjeneho posedźenja rady euroregiona tele dny w Zhorjelcu. Nimo zhromadneho dźěła hladajo na weterinarnu medicinu, wotwobaranje mrětwow, zwěrinoškit a wěstotu žiwidłow dźěše na wuradźowanju zdobom wo přichodny Němski centrum za astrofyziku w Zhorjelcu. Institut ma wodźacy po cyłej Němskej być. Nimo toho dyrbi centrum centralnu rólu nastupajo wědomostne slědźenje k nastaću uniwersuma zabrać.
Přichod twornje dale njewěsty
Něhdźe 450 přistajenych Kulowskeje twornje MAJA meblow je loni kónc nowembra swoje wupowědźenje dóstało. Z tym bě w awgusće připowědźene zawrjenje zawoda kónc lěta jasne. Krok po kroku su sobudźěłaćerjo zawod wopušćili. Mjeztym pytaja wobsedźerjo twornje nowe móžnosće ju wužiwać.
Kulow (AK/SN). Po zawrjenju twornje MAJA w Brěžkach pola Kulowa před něhdźe lětom ma so prózdny zawod zmysłapołnje dale wužiwać. Wobsedźer zawoda je hladajo na zwičnjenje specializowanemu imobilijowemu běrowej w Lipsku nadawk dał, so z tym zaběrać. Tež přez hospodarske spěchowanje Sakska tzwr spyta wobsedźer noweho wužiwarja namakać. Kulowski měšćanosta Markus Posch (CDU) to wobkrući.
„Projekt měsaca“
Kubło dóstanje nowu jednaćelku
Smochćicy (SN). Sybille Richards přewozmje wot 1. januara funkciju jednaćelki hoteloweho managementa Smochčanskeho kubłanskeho kubła swjateho Bena. „Wjeselu so jara na nowy nadawk, dokelž směm swoje powołanske nazhonjenja na městnosći nałožować, kotrež hižo ze zažneho dźěćatstwa znaju a sej jara wažu“, rodźena Budyšanka wuzběhny.
Zhromadnje ze sobudźěłaćerjemi chce wona nowu strukturu w domje zawjesć a kubłanišćo mnohostronsce a sylnišo w regionje etablěrować. „Sprěnja je mi wažne, zo dócpěje dom tež nadregionalnje wuznam“, 45lětna praji. Tež priwatni zajimcy a wobchodnicy pak měli w atraktiwnym kuble přebywać. Syć, kotruž je sej dom w zwisku z kubłanskimi poskitkami za dorosćenych nadźěłał, ma Sybille Richards za wulku šansu.
Rodźena Budyšanka dźěłaše po swojim diplomje na Hessenskej powołanskej akademiji mjez druhim jako referentka za komunikaciju koncerna KfW w Frankfurće nad Mohanom. Tohorunja zhladuje wona mjezynarodnje na wuspěšnu karjeru. Skutkowaše mjenujcy tež w Kanadźe.
Ličba konstantna
Drježdźany (dpa/SN). W Sakskej su fachowcy lětsa dotal 142 nadpadow wjelka na wužitne zwěrjata registrowali. Cyłkownje bě z toho 569 zwěrjatow potrjechenych, zdźěli fachowa instanca wjelk krajneho wobswětoweho zarjada. Ličby wotbłyšćuja staw wosrjedź oktobra. Fachowcy institucije wuchadźeja z toho, zo drje su cyłkowne ličby lětsa trochu niše hač loni. W lěće 2023 zwěsćichu 275 nadpadow, při čimž bě 1 380 skoćatow potrjechenych.
Po aktualnym wjelčim monitoringu je w Sakskej tuchwilu 37 wjelčich črjódow zasydlenych. To je jedna mjenje hač w monitoringowym lěće 2022/2023. Ličba wostanje konstantna. K tomu je po cyłym Swobodnym staće hišće šěsć porikow, kotrež žanu kónčinu nimaja. Jich slědy pak fachowcy zawěsćichu. Monitoringowe lěto běži stajnje wot 1. meje hač do 30. apryla, kotrež so na biologiske wjelče lěto wusměrja. W 33 ze 43 sakskich teritorijow su fachowcy dorost zwěsćili. Cyłkownje drje je jich 106 młodźatow. 24 wjelkow je w zašłym monitoringowym lěće při wobchadnych njezbožach zahinyło. Štyri rubježne zwěrjata su we wobłuku wjelčeho managementa morili, dokelž wulke škody zawinowachu.
Raz hinaši šulski projekt
Ćěsliski dorost z Łužicy rjemjeslnisku wušiknosć a improwizaciski talent w Albaniskej dopokazał
W septembru smědźach ze šěsć dalšimi ćěslemi powołanskošulskeho centruma Lubij, našim wučerjom knjezom Schmiedom a kowarjom jězbu do Albanskeje nastupić. Z małym busom a připowěšakom połny grata jědźechmy 1 870 kilometrow z Budyšina přez wjacore kraje hač do wsy Zaroshkë. Tam saněrowachmy w nadawku European Heritage Volunteers třěchu sylnje wobškodźeneho hlinjaneho twara ze sćěnami z přirodnych kamjenjow. Tuta organizacija dobrowólnikow chce w Zaroshkë kontaktne městno za wšitkich na pomnikoškiće a historiskim twarjenju w regionje zajimowanych wutworić. Zdobom wotewri wona dobrowólnikam móžnosć, při wuporjedźenju twarskich pomnikow sobu skutkować. Non-profitowa organizacija European Heritage Volunteers stara so wo kulturne projekty w Europje – husto wo tajke, kotrež steja skerje mjenje w fokusu.
