Roschek nastupi
Budyšin (SN/BŠe). Předewzaćel Steffen Roschek nastupi jako direktny kandidat CDU we wólbnym wokrjesu 155. Dźensa je so 52lětny oficialnje nowinarjam předstajił. Roschek pochadźacy z Kulowa, ma serbske korjenje a je wusko z regionom zwjazany. To wotbłyšćuje so tež w jeho wólbnym programje.
Minjenej dwě lěće je so wón zaměrnje na wjele zarjadowanjach a zetkanjach wjesnych předsydstwow CDU wobdźělił a wo ćežach a wužadanjach kónčiny zhonił. Hladajo na Łužicu widźi wón wjele strukturnych problemow, kotrež pak maja so na zwjazkowej runinje rozrisać. Jako předewzaćel je jemu wažne, zo je zapłaćomna a stabilna energija trěbna. Tež haćacu běrokratiju chce wón wottwarić. „Hač do lěta 2026 ma so dźesać procentow regulowacych zadźěwkow wotstronić“, sej wón žada. Nimo toho ma so planowanski čas za projekty pospěšić. „Němska sej tuchwilu sama noze staja.“ Łužica měła so jako metropolowy region wuwić, hdźež hospodarstwo wuspěšnje hromadźe dźěła. Zaměry chce Steffen Roschek jako direktnje woleny kandidat w zwjazkowym sejmje zastupować a mandat wólbneho wokrjesa zaso wróćo zdobyć.
Wulki njeměr po demo za měr
Zhorjelc/Drježdźany (SN/mb). Zeleni su BSW wumjetowali, zo „so wot jasnje prawicarskich ekstremistow njedistancuje“. Tež předsydka sakskeje Lěwicy so na demonstraciji w Zhorjelcu postorkuje, na kotrejž su pod nawodom zapósłanca BSW w krajnym sejmje Jensa Hentschela-Thörichta přećiwo planam demonstrowali, w tworni Alstoma w přichodźe pancery město tramwajkow produkować (SN rozprawjachu). Na tutej manifestaciji su so tež přiwisnicy prawicarskeje strony „Swobodni Saksojo“ wobdźělili. Tohodla je tež SPD „šokowana“.
Předsydka BSW w Sakskej, Sabine Zimmermann, je mjeztym na wumjetowanja reagowała: So wě, zo BSW ze „Swobodnymi Saksami“ hromadźe njedźěła, dokelž su to nacije. Najebać to prawicarjam wažne temy, kaž politiku za měr, přewostajić nochcedźa. W Zhorjelcu je młodźina Lěwicy přećiwo demonstraciji něhdyšeho Lěwicarja Hentschela-Thörichta – wón bě prjedy jednaćel frakcije Lěwicy we wokrjenym sejmiku – demonstrowała. Lokalna nowina rozprawješe, zo je so na jeho zarjadowanju 250 ludźi wobdźěliło, na přećiwnej demonstraciji 35.
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
Zajim za festiwal nadal wulki
We wobłuku Choćebuskeho filmoweho festiwala (CFF), kotryž wotmě so zašły tydźeń wot wutory do njedźele 34. raz, předstajichu so w sekciji „Domowjna – Domizna – Heimat“ wospjet produkcije z łužiskim aspektom. Wjeršk tohole segmenta je bywšemu formatej „Łužiska filmowa přehladka“ slědowacy rjad „Łužyca shorts“. CFF je nimo toho kruty termin nazymskeho zetkanja serbsko-němskeje syće Łužycafilm.
Wjele ze Serbow a wo Serbach ze wšelakich perspektiwow
Wosom filmow z dołhosću sydom do 30 mjeńšinow je kurator sekcije „Domizna“ Daniel Kubik za program „Łužica shorts“ wuzwolił. Zwjeseleše, zo bě mjez nimi šěsć paskow, kotrež so ze serbskej tematiku zaběrachu resp. kotrychž originalna rěč je serbšćina. A tohorunja zwjeselace bě, zo přiwabi tónle program telko zajimcow do zarjadowanišća Gladhouse, zo dyrbjachu organizatorojo přidatne stólcy do wupředateje žurle stajić.
„Rybar być dyrbiš začuwać a chcyć!“
Kittnerec předewzaće w Hóznicy wobstajnje wučomnikow wukubłuje
Rańše słónco wokoło Hóznicy schadźa. W tymle času je rybarka Emma Kittner nazymu často wot ranja šesćich hižo po puću. Wona stara so mjez druhim wo picowanje rybow a hlada za spušćadłami kaž tež hatom za wudźenje. „Njeje to powołanje za kóždeho – na prěni pohlad zda so wone mokre, zymne a grawoćiwe być. Tola je to wulkotne powołanje – wosrjedź přirody“, 22lětna zwurazni a podšmórnje: „Rybar być to dyrbiš začuwać a chcyć. Kóždy dźeń je hinaši.“
Šule maja „kowarnje“ być
Drježdźany (dpa/SN). Předewzaća w Sakskej maja přeco hišće ćeže, dosć wučomnikow za swoje swobodne wukubłanske městna namakać. Wulku ličbu wukubłanskich městnow lětsa wobsadźić njemóžachu, wuswětli nětko šef regionalneje direkcije Zwjazkoweje agentury za dźěło Klaus-Peter Hansen. Hač k zahajenju noweho wukubłanskeho lěta 1. oktobra su předewzaća dźěłowej agenturje něhdźe 20 800 swobodnych wukubłanskich městnow přizjewili. Něhdźe 18 600 młodostnych su sobudźěłaćerjo wuspěšnje sposrědkowali. Z tym je wjace hač 2 000 městnow swobodnych.
Rjemjeslnicy w Sakskej sej wot noweho knježerstwa w swobodnym staće wjace pomocy a pjenjezy za lěpše kubłanje a powołanske wukubłanje žadaja. To je hladajo na pobrachowacych fachowcow trěbne, zdźěli Zwjazk sakskich rjemjeslnikow. Dyrbimy wyše šule „ke kowarnjam talentow“ wuwiwać, wottam dale rěka. Wyše šule trjebaja najlěpše wuhotowanje. Tež dosć wučerjow ma tam k dispoziciji stać. Kubłanje a powołanske kubłanje dyrbitej za nowe krajne knježerstwo najwažnišu prioritu měć.
Swětnišćo lěpje zrozumić
Drježdźan (SN). Mjezynarodny slědźerski team je ze swětnišćowym teleskopom James Webb (JWST) njewšědne wotkryće w zažnym uniwersumje nadešoł: spěšnje rosćacu čornu dźěru, kotraž hižo něhdźe 1,5 miliardow lět po praprasku eksistowaše. Objekt z mjenom „LID-568“ móhł dotalnu wědu wo čornych dźěrach z wulkej masu reformować.
Pod nawodom dr. Hyewona Suha a prof. dr. Günthera Hasingera, designowaneho załoženskeho direktora Astrocentruma Łužica, přepytowaše team njebjesku kónčinu, kiž sylnje w röntgenowej swěcy swěćeše. Optisce pak lědma widźomna. Daty pokazachu nowu z prochom pokrytu skupinu čornych dźěrow. Wosebje napadna je dźěra LID-568, kiž je něhdźe dźesać milionow króć ćeša hač słónco. Wona přićahuje maćiznu wjele spěšnišo, něhdźe 40 króć spěšnišo, hač dotal myslene. Slědźerjo mjenuja tutón fenomen, kotryž dotalne wědomostne dopóznaća nastupajo přićahowanja materijow překroči, „Super-Eddington-Akreciji“. Wotkryće móhło nastaće prěnich wulkich čornych dźěrow a galaksijow w uniwersumje dodnić.
Šulu přechodnje zawrěli
Kamjenc (SN). Spěchowansku šulu na Dróze měra w Kamjenskim wjesnym dźělu Bernbruch dyrbješe Budyski wokrjes jako nošer kubłanišća přechodnje zawrěć. Přičina toho su za strowotu škódne nitki mineralneje wołmy, kotrež su dźěłaćerjo při twarskich dźěłach namakali. Z wołmu běchu wokna sobu zamazali. Za škit strowoty šulerjow a wučerjow su zastupjerjo wokrjesa zhromadnje z krajnym zarjadom za šule a kubłanje rozsudźili, zo maja dźěći doma wuknyć.
Za wšitkich šulerjow, za kotrychž njemóža starši hladanje zaručić, je nuzowe zastaranje na Kamjenskej šuli Zapadna Łužica zaručene. Wšitkich potrjechenych zamołwići informowachu. Mjeztym dźěłatej wokrjesny a krajny zarjad na nuzowym rozrisanju, zo móhli prezencnu wučbu zaso přewjesć. Dokelž je wučisćenje rumnosćow w spěchowanskej šuli chětro naročne, njeje to w běhu dnjow, ale skerje tydźenjow zdokonjane. „Pruwujemy móžnosće, hdźe móhli šulerjow a wučerjow zaměstnić. Chcemy, zo so ručež móžno zaso normalna wučba zmóžni“, zwurazni prěni přirjadnik za šule w nošerstwje wokrjesa Jörg Szewczyk.
Lěs za brunicu njewoprować!
Rowno (SN). Krótko do lětušeje globalneje konferency UNO wo škiće klimy je Sakski wyši hórnistwowy zarjad wuswojenje wobsedźerjow lěsa pola Rownoho wobzamknył, zo by koncern LEAG Wochožansku brunicowu jamu rozšěrić móhł. Po raznej kritice Zeleneje ligi (SN rozprawjachu), kotraž potrjechenu ležownosć w lěsu jako wotnajer wobhospodarja, je so Marie Müser, ko-předsydka krajneho zwjazka Zelenych w Sakskej, słowa jimała: „Tule ma so strowy lěs na spalenje brunicy woprować.“ To je „fatalny signal přećiwo škitej wobswěta a klimy“ w Sakskej – na kóšty přichodnych generacijow.
Delegacija Zelenych z wokrjesa Budyšin je ze zapósłancom strony w zwjazkowym sejmje Bernhardom Herrmannom areal mjez Slepom a Miłorazom wopytał. By-li LEAG swój plan zwoprawdźił, by so jama Mułkecam a Rownomu hač na 150 metrow zbližiła, kritizuja Zeleni w aktualnej zdźělence: „To by w bliskosći bydlacych ludźi chětro z haru, prochom a pobrachowacej dnownej wodu poćežowało.“ Tohodla sej žadaja za brunicowu jamu minimalny wotstawk sydlišćam, kaž wón za wětrniki płaći.
Pokazaja swoju wusku zwjazanosć z regionom
Wojerecy (AK/SN). Z nowej marku a z nowym logom so Łužiska kupjel we Wojerecach do přichoda nastaja. Hesło motiwa je „Zanurić so. Dožiwić. Sej lubić dać.“ Logo pokazuje žołmu, spočatnej pismikaj kupjele LB a wutrobu. „Runje wutroba znazornja zwjazanosć z regionom a temu strowota. Symbol pokazuje, zo je město Wojerecy wutroba Łužiskeje jězoriny“, podšmórny zamołwita za marketing we Łužiskej kupjeli Christin Steinborn zawčerawšim na předstajenju noweje marki a noweho loga. Zhromadnje z nawodnicu za marketing měšćanskich zawodow Wojerecy Janett Schneider a z ćišćernju Sebastiana Scholza je wona marku a logo wuwiła.
