Ze sćelakami po puću
Drježdźany (SN). W sewjernych kónčinach Zhorjelskeho wokrjesa su tuchwilu štyri wjelkow ze sćelakami po puću. Zwěrjata podawaja fachowcam drohotne informacije wo tym, kak so w teritoriju pohibuja. To piše sakski krajny zarjad za wobswět, ratarstwo a geologiju wčera w nowinskej zdźělence. Zo přisłušeja tři wobkedźbowanych wjelkow samsnemu stadłu blisko Dubca (Daubitz) we wuchodnym dźělu wojerskeho zwučowanišća Hornja Łužica, je w Sakskej dotal jónkrótne. To su wjelk a wjelčica ze swojim młodźatom. Štwórty wjelk je ze stadła blisko Wuskidźe (Weißkeißel). Po dotalnych datach fachowcy wědźa, zo je tón swój něhdyši teritorij wopušćił a zo so tuchwilu w kónčinach kołowokoło Zagorja pohibuje.
Loni w aprylu běchu hišće pjateho wjelka ze sćelakom wuhotowali. Tón pak je tři měsacy pozdźišo při wobchadnym njezbožu blisko Hamora zahinył. Daty wjelčich sćelakow podawaja fachowcam tež dopóznaća wo tym, kak so škitne płoty na pućowanje wjelkow wuskutkuja, kotrež buchu tam přećiwo afriskej swinjacej mrětwje (ASP) nastajene.
Załožba wojuje wo dosć srědkow
Hišće njeje jasne, kelko pjenjez serbskim institucijam a projektam wot klětušeho k dispoziciji steji. Tež aktualnje trjeba załožba wjele kreatiwity, zo by wšě wužadanja zmištrowała.
Budyšin (SN). Kaž z aktualneje zdźělenki załožboweho zarjada wuchadźa, je financielna situacija Załožby za serbski lud a z tym financowanje serbskich institucijow a projektow lěto a bóle napjata. Hižo 2024 dyrbješe zarjad załožby derje ličić a z pjenjezydawarjemi jednać, zo bychu so nowowutworjene dźěłowe městna hač do kónca tutoho lěta dale wjedli. Přičiny za to su stopnjowanja mzdow přistajenych zjawneje słužby. Dokelž njeje tež lětsa přiražka za załožbu wyša hač dotal, móže so hospodarski plan 2025 jenož wurunać, hdyž wšitke rezerwy přetrjebaja. Dźakowano rezerwam móže załožba hižo připrajene projekty njedźiwajcy nachwilneho hospodarjenja zaručić.
Jan Budar, direktor załožby, praji: „Situacija nachwilneho hospodarjenja je powšitkownje wužadanje, spytamy pak puće namakać, zo njejsu wažne projekty a dźěławosć institucijow wohrožene.“
Nalětnje rjedźenje zahajene
Filmowy camp
Budyšin (SN). Marketingowa towaršnosć Hornja Łužica-Delnja Šleska (MGO) přeprošuje wot 30. apryla do 4. meje młode kreatiwne talenty na filmowy camp „klipQuest.Lužica“ do Budyšina. Pjećdnjowske zarjadowanje steji pod hesłom „Łužica – žiwa krajina w změnje“.
Wobdźělnicy maja jónkrótnu móžnosć, tu pod nawodom nazhonitych fachowcow swoje filmowe kmanosće dale wuwiwać a sej krasnosć regiona Hornjeje Łužicy na nowe wašnje wotkryć. Wot dźěła z kameru přez metody powědanja hač k post-produkciji – w małych skupinach nadźěłaja wobdźělnicy z profesionelnej techniku filmowe powědančka wo dynamiskich změnach we Łužicy. Za to wopytaja filmowcy štyri UNESCO-městnosće we Łužicy: Geopark Mužakowski zahork, Biosferowy rezerwat Hornjołužiska hola a haty, Mužakowski park wjercha Pücklera a Biosferowy rezerwat Błóta. Z filmowymi wuslědkami chce MGO za tute jónkrótne městnosće wabić a mjez domoródnymi sylniše wědomje za nje budźić.
Doba požadanja skónči so 23. měrca. Wobdźělenje je darmotne a nóclěh z cyłodnjowskim zastaranjom stejitej k dispoziciji.
Čakaja na posudk
Drježdźany (SN). Manfred Curbach, hłowny iniciator projekta za natwar slědźerskeho centruma twarskich maćiznow (LAB) w Budyšinje, je wčera na Drježdźansku TU přeprosył, zo by wo aktualnym stawje informował. Mjez přitomnymi běše nimo Budyskeho krajneho rady a Budyskeho wyšeho měšćanosty tež tójšto zapósłancow zwjazkoweho sejma kaž tež kandidatow stronow za wólby zwjazkoweho sejma. Wšitcy so za zwoprawdźenje projekta w Budyšinje wuprajichu.
Dołhodobnje jednać
Na 320 zarjadowanjach 2 500 hosći witali
W Kulowskim kulturnym a zetkawanskim srjedźišću Jakubetzowym wustawje ma tež serbska kultura krute městno
Generacije zwjazować, zhromadnosć přisporjeć a kulturu spěchować – to su zaměry, za kotrež so towarstwo Zjednoćeni za Kulow zasadźuje a angažuje. Swoje doma ma wone w Kulowskim Jakubetzowym wustawje na Budyskej dróze 30.
„Lěto 2024 běše jara intensiwne lěto. Wjace hač 320 zarjadowanjow smy organizowali. Hač kursy, seminary a přednoški abo wustajeńcy a koncerty kaž tež dźěłarnički a dalše poskitki za swójske aktiwity“, podšmórnje předsyda towarstwa Martin Kliemank wróćo zhladujo. To rěka: Za zarjadowanja zamołwita dźěłowa skupina, kotrejž přisłuša něhdźe 30 žonow, běše wosebje aktiwna. Cyłkownje 2 500 hosći běše wšitke lońše zarjadowanja wopytało.
Wjerški zašłeho lěta
Jedyn z wjerškow loni běše zawěsće woptawanje wina, kotrež je towarstwo hromadźe z towarstwom Domizniski a kulturny kruh Kulow organizowało. We Łužicy derje znata kapała Fünf an der Feier je wječor hudźbnje wobrubiła a zarjadowanju jónkrótnu atmosferu spožčiła.
Dowolnicy rady z ćahom po puću
Ze zhromadnym projektom ,,Management turistiskeje mobility“ chcetej Zaměrowy wobchadny zwjazk Hornja Łužica-Delnja Šleska (ZVON) a Marketingowa towaršnosć Hornja Łužica-Delnja Šleska (MGO) zjawny bliskowobchad a turistiske poskitki wušo mjez sobu splesć.
Budyšin (SN). Wažny zakład projekta, kotryž Swobodny stat Sakska po 80 procentach spěchuje, je naprašowanje mjez wužiwarjemi zjawnych wobchadnych srědkow. Něhdźe 800 ludźi běše so wobdźěliło. Wuslědki podawaja wažne dopóznaća hladajo na zaměr projekta.
Na kubłanskich wikach swój horicont rozšěriłoj
Stuttgart. Pod hesłom „Demokratija trjeba kubłanje – kubłanje trjeba demokratiju“ su so kubłanske wiki „Didacta“ minjeny tydźeń w Stuttgarće wotměli. W pjeć halach předstajichu so tři hłowne wobłuki wikow: zažne kubłanje, šula a powołanske kubłanje. Akterojo prezentowachu šěroki spektrum temow kołowokoło kubłanja, na přikład móžnosće wuhotowanja rjadowniskich rumnosćow, spěchowanja heterogenity mjez šulerjemi abo podpěry studentow při studiju a referendariaće hladajo na zawěsćenje a financy. Wustajerjo poskićachu wjele inspiracijow a idejow nastupajo samostatne wuknjenje. Tójšto poskitkow su z pomocu kumštneje inteligency wuwili, a dóstachu na to wot wopytowarjow direktny feedback.
Jejka debić
Budyšin (SN/VaŽ). Spěchowanski kruh za serbsku ludowu kulturu z.t. přeprošuje na 72. wubědźowanje wo najrjeńše serbske jutrowne jejko w lěće 2025. Hač do 5. měrca móža dorosćeni swoje kreatiwne dźěła wotedać. Mytuja so jejka, kotrež su z tradicionelnymi gratami a mustrami z jednej ze sćěhowacych serbskich technikow zhotowjene: wóskowanje, bosěrowanje – wobě jědno- a wjacebarbnje –, škrabanje a wužrawanje. Je móžno, tež wjacore techniki kombinować.
Wobdźělnicy njech zapodadźa kolekciju, kotraž wobsteji z třoch wudutych kokošacych jejkow. Motiwy na nich měli być swójske kreatiwne kreacije, kotrež bazuja na swójbnych a regionalnych tradicijach.
Zajimcy móža je z póštu pósłać abo na wšelakich městnach wotedać: pola Spěchowanskeho kruha za ludowu kulturu z.t. w Budyšinje, w Serbskej kulturnej informaciji w Budyšinje, w „Lódce“ w Choćebuzu kaž tež w regionalnych běrowach Domowiny. Najrjeńše kolekcije so we wustajeńcy prezentuja a dobyćerjo dóstanu připóznaće za swoju wuměłsku kmanosć. Projekt spěchuje Załožba za serbski lud, kotraž dóstawa kóžde lěto přiražki z dawkowych srědkow.
