Jónkrótny rewěr za dowolnikow z cyłeje Europy
We Łužiskej jězorinje drje je hižo wjele naprawow zwoprawdźenych – mnohe pak maja so hišće realizować
Najwjetši dźěl Lejnjanskeho jězora přisłuša Sakskej, jedna pjećina leži w Braniborskej. Za wuwiće Łužiskeje jězoriny měješe wodźizna wažnu rolu. „W lěće 2007 započinachmy na južnym přibrjohu přistawne mosćiki twarić. Wjele zjawnych spěchowanskich srědkow bě za naprawu trěbnych“, wujasni jednaćel zaměroweho zwjazka Łužiska jězorina Sakska wobdźělnikam ekskursije w zwisku z lětušej regionalnej konferencu. Na njej zaběrachu so woni z wobsahami pod hesłom „Mězniki a perspektiwy pławnych zwiskow hač do lěta 2026 we Łužiskej jězorinje“.
„Archa“ poněčim hosći wita
Pledoyej za wišnje
Strach wohenjow spochi přiběra
Budyšin (SN/BŠe). Strach lěsnych wohenjow trajaceje horcoty a suchoty dla spochi přiběra. Za cyły Budyski wokrjes je Swobodny stat dźensa rano warnowanski schodźenk tři wozjewił. Wčera płaćeše na sewjeru wokrjesa samo hižo štwórty schodźenk. Kaž zarjady informuja, wegetacija při wysokich temperaturach nad 30 stopjenjemi celsiusa spěšnje ćerpi. Meteorologojo wěšća pak wotpinanje. Dźensa a jutře su spadki připowědźene. Zdźěla pak maja wobydlerjo na wuchodźe Sakskeje samo z njewjedrami ličić. Z blakami móhło so sylnje dešćować.
Zarjady w Sakskej su wot spočatka lěta dotal 53 lěsnych wohenjow registrowali. Cyłkowna płonina je 6,4 hektary wučiniła. Loni běchu jich dohromady 110 lěsnych wohenjow, při čimž bě 136 hektarow potrjechenych. Předewšěm su je ludźo sami zawinili.
W Sakskej je pjeć warnowanskich schodźenkow za lěsne wohenje postajenych. Schodźenk pjeć je najwyši. Na internetnej stronje móža so zajimcy wo aktualnym połoženju we wokrjesach informować.
Astrocentrum zaso kročel dale
Ramikowe dojednanje mjez Zwjazkom a Sakskej wo Astrocentrumje Łužica (DZA) je podpisane. Najwjetša swětłownja za wuwiće Hornjeje Łužicy móže dale zaměrnje rosć.
Berlin (SN/mb). Załoženski direktor DZA prof. Günther Hasinger je tak a tak posoł dobreje nalady – pjatk připołdnju měješe 70lětny dotalny wědomostny direktor europskeje swětnišćoweje organizacije ESA dwójnu přičinu za wosebite wjeselo: Zwjazkowa ministerka za slědźenje Bettina Stark-Watzinger a sakski ministerski prezident Michael Kretschmer staj w Berlinje ramikowe dojednanje za financowanje Astrocentruma Łužica podpisałoj. Hnydom po tym je Hasinger ze zastupjerjomaj předewzaća OHB Digital Connect „strategiske partnerstwo“ prezentował. Kooperacija z načolnym zawodom na polu satelitow a teleskopow ma tomu dopomhać, „zo so sony zwoprawdźa“, kaž Hasinger zwurazni. Stark-Watzinger skedźbni na to, zo rozrosće ličba tuchwilu 30 sobudźěłaćerjow na něhdźe tysac. Dwě třećinje dźěłowych městnow stej předwidźanej za dźěłacych bjez wukubłanja na wědomostnym polu.
Jednanje so dliji
Choćebuz (SN). Sudniske rozestajenje w zwisku ze zakazowej deklaraciju (Unterlassungserklärung) mjez energijowym koncernom LEAG a dwěmaj aktiwistomaj skupiny „Ende Gelände“, kotraž so za škit klimy a wobswěta zasadźuje, so dliji. „Jednanja móžneho zwonkasudniskeho dojednanja dla njeběchu wuspěšne“, to je rěčnik krajneho sudnistwa wčera w Choćebuzu zdźělił. Přichodny termin jednanjow budźe 19. septembra.
Serbske aktiwity TDDK z nowym wupłodom
Prezident a jednaćel twornje za klimowe kompresory TDDK, Yoichi Terao, je wčera prezidij Domowiny w předewzaću w Nadróznej Hrabowce witał. Při tutej składnosći předstajichu hosćićeljo najmłódši wupłód němsko-serbsko-japanskeje wzajomnosće w zawodźe, wosebite wudaće brošurki TDDK Echo z titlom „Technika, tradicija a wizija“.
Nadrózna Hrabowka (SN/at). „Najebać wšelakorosć kulturow, kotrež so pola nas zetkawaja, zhotowjeja wšitcy zhromadnje jednotny produkt. W srjedźišću stejitej tež serbska kultura a rěč“, wuzběhny Yoichi Terao. To zdobom nowa brošurka wuwědomja. Z njej chce zawod TDDK předewšěm serbsko- a němskorěčnych młodostnych docpěć. Na přichodnych powołanskich wikach w Ralbičanskej wyši šuli budźe z njej zastupjeny, zdobom měł to poskitk šulskim rjadowanjam być, kotrež předewzaće wopytaja. Brošurka informuje wo zawodźe samym, wukubłanskich a studijnych powołanjach, poda pokiwy za požadanje kaž tež spomóžny přehlad wo serbskich aktiwitach předewzaća w minjenych lětach. Wšitke wobsahowe teksty w serbskej a němskej rěči předleža.
Firmy a serbšćina
Zhotowjeja samo swójske graty
Zeleny Powerhouse struktura přichoda
Koncern Łužiska energija a milinarnje (LEAG) so nětko na wodźaceho poskićerja za rozrisanja z naslědnymi energijemi strategisce wusměrja. To je dohladowanska rada dźělneju wobłukow hórnistwo a milinarnje wčera w Choćebuzu wobzamknyła. Rozsud runa puć za wobšěrnu transformaciju druheho najwjetšeho producenta miliny kraja.
Choćebuz (SN/at). So z brunicu rozžohnować a hač do 2040 nimale 14 gigawattow wobnowjomnych energijow wuwiwać je LEAG prěni raz 2022 připowědźiła. Sydom gigawattow chcedźa hač do 2030 docpěć. Stołpy schwaleneho nowowusměrjenja su tři nowe operatiwne towaršnosće, kaž předewzaće w nowinskej zdźělence piše. Towaršnosće LEAG Renewables, LEAG Clean Power a LEAG Biomass su samostatne wobchodniske wobłuki, kotrež zjimaja pod třěchu noweje holding z mjenom LEAG tzwr. Wone tworja zakład „Zeleneho Powerhouse“ předewzaća, kaž nowinski rěčnik Thoralf Schirmer rozłožuje.
