Rjemjesło skići mnoho šansow
Budyšin (CS/SN). W Budyskim Němsko-Serbskim ludowym dźiwadle je 93 wučomnikow z najwšelakorišich rjemjeslniskich powołanjow – pjekar, rěznik, muler, třěchikryjer, blidar, moler a lakěrar, frizer, běrowowy překupc, elektronikar, mechanikar za připrawy kaž tež pišćeletwarc – swoje powołanske wuswědčenje dóstało. Staru tradiciju wuwjazanja wučomnikow z wukubłanja su třěchikryjerjo přewzali. Prjedy hač absolwenća swoje wopisma přijachu, sćěhowachu wšelakim narěčam. Tež krajny wyši mišter Matthias Graichen młodostnych witaše a wuzběhny, zo je so dualny system w rjemjeslnistwje jako dobry wopokazał. Wón pohonjowaše młodych ludźi so zesamostatnić. Nihdy do toho njeběchu šansy tak dobre, přetož so mnozy rjemjeslniscy a mištrojo bórze na wuměnk podadźa.
Wuslědk njedźelu předleži
Pančicy-Kukow (SN/BŠe). Wospjet informuje Kamjenske předewzaće Ewag kotrež kónčinu z energiju a wodu zastaruje, zo je pitna woda zanjerodźena. Minjeny kónc tydźenja běchu wobydlerjo w a wokoło Rakec potrjecheni. Kaž Ewag zdźěli, pak běše to jenož krótkodobnje, při čimž so podhlad zanjerodźenja njewobkrući. Wot wčerawšeho maja so ludźo w Pančicach-Kukowje, Jaworje, Wotrowje, Kašecach, Žuricach a Hłupońcy na kedźbu brać. Pitnu wodu dyrbja znajmjeńša tři mjeńšiny wotwarić, prjedy hač ju w zwisku ze zežiwidłami wužiwaja. Znajmjeńša hač do njedźele je tole trěbne. Ewag chce potrjechenych wobydlerjow wo tym informować, hdyž je situacija rozrisana.
„Podhlad za zanjerodźenje zwěsćichmy probow dla, kotrež prawidłownje přewjedujemy. Ze strowotniskim zarjadom potom wukaz wothłosowachmy. Roły za pitnu wodu smy desinficěrowali a wurjedźili. Dźensa dopołdnja znowa wodu přepruwowachmy. Wuslědk nam njedźelu předleži“, wujasni nawoda wobłuka za pitnu wodu pola Ewag Mario Kröger na naprašowanje.
Prěni witanski centrum wokrjesa wotewrěli
Žitawa (AK/SN). Zhorjelski wokrjes chce nowych wobydlerjow w přichodźe intensiwnišo podpěrać. Za to su zamołwići zawčerawšim w Žitawje prěni witanski centrum wotewrěli. To ma kontaktne městno z informacijemi a poskitkami za ćěkancow, za dźěłaćerjow a fachowcow z tu- a wukraja być. Tohorunja dóstanu nawrótnicy tam tež wažne pokiwy. „Z centrumom chcemy sylnišo struktury witanja w Zhorjelskim wokrjesu zwoprawdźić. To je nadawk, kotryž zhromadnje z mnohimi partnerami přesadźimy“, wuzběhny krajny rada Zhorjelskeho wokrjesa dr. Stephan Meyer (CDU). „Dyrbimy skutkowne struktury wutworić, z kotrychž pomocu maja so prašenja na jednym městnje rozrisać.“ Partnerojo wokrjesa su při tym industrijna a wikowanska komora, rjemjeslniska komora, wokrjesne rjemjeslnistwo, agentura za dźěło, job-center, bydlenske towaršnosće, wosady, sportowe towarstwa, kulturne towarstwa a dalše skupiny.
LEAG zaměrnje po nowych pućach kroči
Janšojce (AK/SN). Koncern Łužiska energija a milinarnje (LEAG) wusměrja so na přichod we Łužicy a chce swoje potenciale we wobłuku wobnowjomnych energijow wutwarić. Z projektom Gigawatt Factory chce hač do lěta 2030 sydom gigawattow miliny lětnje na zakładźe wobnowjomnych energijow produkować.
Wažnej naprawje za to stej płuwaca fotowoltaikowa připrawa na Liškowskim jězoru (Ostsee) blisko Choćebuza a wětrnikowy park Brězynka II pola Baršća. To wuzběhny tele dny nawoda předsydstwa LEAG Thorsten Kramer, hdyž je projektaj bliže předstajił.
Wjace hač 400 wopytowarjow je sej na tradicionalnu zelowu njedźelu ...
Plany při jězoru dale a konkretniše
Město Wojerecy zaměrnje na tym dźěła, zapadny přibrjóh Šibojskeho jězora turistisce wuwić. Tole podšmórny wyši měšćanosta Torsten Ruban-Zeh (SPD) minjenu póndźelu we Wojerecach.
Wojerecy (AK/SN). „Nochcemy něšto zwoprawdźić, štož je so hižo raz druhdźe wuwiło. Ale chcemy něšto jónkrótne za region stworić“, wón wuzběhny. „Hladajo na połoženje, chcemy zmylki ze zašłosće při jězoru rozrisać“, praji Ruban-Zeh dale.
Fachowca zeznać
Budyšin (SN). Mjeno Konrad Zuse je znaty jako synonym za prěni kompjuter na swěće. Mjeno Mikławš Joachim Wićaz z Kamjeneje pola Radworja je skerje njeznate. Wón je w lěće 1964 z nastrojom D4a prěni „PC“ – potajkim prěni kompjuter za blido zhotowił.
Wobaj mjenowanej wosobje běštej wusko spřećelenej a zdźěla stej samo hromadźe dźěłałoj. W Budyskim Zuseumje chcedźa nětko prócowanja prof. Wićaza kaž tež kompjuter D4a hódnoćić a na 60lětny jubilej spominać. Z małej wustajeńcu chcedźa na genialneho serbskeho matematikarja dopominać. Wón dźě je za čas NDR nastupajo ličenje na mašinach wulki wliw wukonjał.
Jubilej woswjećić chcedźa zastupjerjo Zuseuma 23. awgusta na Budyskej powołanskej akademiji. Mjeztym je lisćina hosći, kotřiž chcedźa so tam wobdźělić, hižo chětro dołha. Nimo lokalnych politikarjow su tež wučerjo informatiki wšitkich šulow a powołanskich šulow přeprošeni, zo móhli so wo wědomostniku z Hornjeje Łužicy informować. Přizjewjenja do toho žane trěbne njejsu.
Taflički we wustajeńcy su zdobom w serbskej rěči přihotowane, wšako bě Wićaz Serb.
Swět bajow Łužicy je njesměrny wulki pokład
Wojerowski Łužiski center sćehnje přewšo pozitiwny facit lětušich tydźenjow Šajatovića
Wot 1. do 25. junija je Madeleine Matschke, managerka we Wojerowskim Łužiskim centeru, zhromadnje z mnohimi partnerami tydźenje Šajatovića z wulkim swjedźenjom a wustajeńcu pod hesłom „Łužiski swět bajow. 400 lět Krabat/Šajatović“ w nakupowanišću organizowała. Andreas Kirschke je so z njej rozmołwjał.
Što je Was inspirěrowało, tydźenje Šajatovića přewjesć?
Přitulny domicil za dowol stworiłoj
Andreas a Katja Bilik z Němcow nimo wjesneje stwički tež nowy prózdninski dwór wobhospodarjataj
Atmosfera rozžohnowanja na dworje knježi. „Božemje. Pola was bě jara rjenje. Budźemy was druhim doporučeć“, zwurazni starši porik jednohłósnje. Wopušćataj prózdninski dwór Katje a Andreasa Bilika, hdźež staj swój lětni dowol přežiwiłoj a nětko so spokojom domoj wróćataj. Dowolowy domicil na Halštrowskej łučinje čisło 7 w Němcach je Bilikec porik w oktobrje 2017 wotewrił. Ideju za njón staj mandźelskaj krok po kroku wuwiwałoj. Mnozy hosćo we wjesnej stwičce, kotruž swójba hižo dlěje hač 30 lět wobhospodarja, so přeco zaso za nóclěhom prašachu. Susodna ležownosć wopokaza so jako idealna městnosć, hdźež móhli projekt zwoprawdźić. Tam běše tehdy chětro stary dom a pućik. Poprawom mějachu iniciatorojo prěnjotnje plan, twarjenje zachować, saněrować a wutwarić. Na kóncu pak bě spotorhanje a kompletny nowotwar jenička rozumna alternatiwa.
Dalša swětłownja za Hornju Łužicu
Na přemysłownišću w Krynhelecach pola Hamora nastawa po cyłej Europje jónkrótny centrum. Kamjeničanska Techniska uniwersita naročny projekt zamołwja, kotryž je za Hamorsku gmejnu a Hornju Łužicu wulka šansa a swětłownja.
