Silwester w znamjenju narěčow nadźije a problemow z praskotakami
Budyšin (SN/mb). „Hajmy tež w nowym lěće sprawnu a přećelnu serbsku zhromadnosć“, přejetej Domowina a Rěčny centrum Witaj. Sakski ministerski prezident Michael Kretschmer (CDU) chce „sylnu a njebojaznu Saksku“ měć. Wón je ludźom serbsce „strowe nowe lěto“ wupřał. Zwjazkowy kancler Friedrich Merz (CDU) sej přeje, zo nawjazujetej Němska a Europa na lětdźesatki měra, swobody a derjeměća a nowu sylnosć nabudźetej.
Ze swjatočnym nyšporom silwester w Drježdźanskej katedrali je biskopstwo Drježdźany-Mišno swjate lěto pod hesłom „putnik nadźije“ zakónčiło. Biskop Heinrich Timmerevers chwaleše putnikowanje jako sylne znamjo tež do sekularneje towaršnosće, zo nadźija tam rosće, hdźež maja ludźo chwile za ćišinu, modlitwu a zetkanje. Tež w połnje wobsadźenym Božim domje w Baćonju su hudźbny silwesterski nyšpor swjećili.
Po trójce wupředatych předstajenjach swojeho silwesterskeho a nowolětneho koncerta w Budyšinje prezentuje Serbski ludowy ansambl z wjerškow swojeho repertoira zestajanu swjedźensku galu dźensa w Balingenje a zajutřišim w Schweinfurće. Přichodny tydźeń wustupi SLA w Złym Komorowje a we Wósporku. Program połny překwapjenkow wopřijima mjez druhim choreografije Mije Facchinelli a Juraja Šiški; jako hosćej wustupitaj sopranistka Yvonne Prentki a tenor Philipp Nicklaus. Dosć njewšědnemu „instrumentarijumej“ wěnujetaj so dirigentka a bubnar SLA Katharina Dickopf a Benedikt Sauber (stejicy wotlěwa). Foto: Maćij Bulank
Prěni wolejbulowy turněrPrěni wolejbulowy turněr lěta 2026 přewjedźe sportowe towarstwo Marijina hwězda jutře, 3. januara, wot 13 hodź. w sportowni w Pančicach.Worklečenjo w RalbicachPrěnje wolejbulowe mustwo muži sportoweho towarstwa Viktorije Worklecy budźe hižo jutře prěni raz wo dypki hrać, a to znowa w Ralbičanskej ćěłozwučowarni. Třeći sakskeje klasy stafla wuchod wočakuje pjateho a poslednjeho tabulki. Njedźelu je potom třeće mustwo muži Viktorije Worklecy na rjedźe. W sportowej hali Lessingoweho gymnazija Wojerecy přewjedźe so 3. hrajny dźeń we wokrjesnej klasy stafla sewjer.03.01. 14:00 Viktoria Worklecy – Coswig-Mišno (m, w Ralbicach)03.01. 14:00 Viktoria Worklecy – VC Drježdźany (m, w Ralbicach)04.01. 10:00 4. hrajny dźeń Viktoria Worklecy III (m, we Wojerecach)10.01. 14:00 VV Žitawa 09 II – Viktoria Worklecy (ž)Zymska edicija Kulowcupa
Na njewšědnym městnje, mjenujcy na staciji New Yorkskeje podzemskeje Old City Hall, kotraž leži pod radnicu města, je wčera generalna statna rěčnica Letitia James lěwicarskeho demokrata Zohrana Mamdanija (wotlěwa) jako měšćanostu najwjetšeje metropole w zjednoćenych statach spřisahała. Jemu poboku z bibliju w ruce steji jeho mandźelska Rama Duwaji. Foto: pa/abaca
Dwójce barok w BudyšinjeBudyšin. Towarstwo Cyrkwinskohudźbny skutk Budyšin přeproša dźensa, pjatk, na „Koncert k Nowemu lětu“ w cyrkwi Marje a Marty. W 17 hodź. interpretuja sopranistka Heidi Maria Taubert, trompetar Pavel Jeníček a organist Michael Vetter wuběr twórbow mištrow baroka, kaž na přikład Johanna Sebastiana Bacha, Georga Friedricha Händela a Henryja Purcella. Zastup při wječornej kasy płaći 15 resp. potuńšeny 10 eurow.Zajutřišim, njedźelu, slědujetej na samsnym městnje pod nawodom Vettera pjaty a šesty dźěl Bachoweho „Hodowneho oratorija BWV 248“. Cyrkwinskemu chórej ewangelskeje wosady swj. Pětra poboku zaspěwaja a zahudźa jako hosćo mjez druhim altus Stephan Kunath, bas Martin Schicketanz, dźěći Biskopskeje zakładneje šule Marje Montessori sprjewineho města a orchester, hrajacy na historiskich instrumentach. Zastup je darmotny, dary pak so njewotpokazuja.Dujerske hody w Slepom
Hanka Rjelcyna, Jadwiga Kaulfürstowa, Fabian Kaulfürst a Marek Rjelka (wotprawa) wuhotowachu spěwajo, Marko Njek pak z kruchami na pišćelach silwesterski nyšpor w Baćońskej cyrkwi. Jana Markowa přednjese w běhu meditatiwneje hodźinki wjacore teksty za rozmyslowanje. Spěwarjo zanjesechu dwanaće twórbow – jednu jendźelsku, tamne serbske. Wjacore z nich su sami skomponowali, spisali abo přełožili. Baćoński farar Gerat Wornar dopominaše na bamža Benedikta XVI., kotryž běše posledni dźeń lěta 2022 zemrěł. Na kóncu wšitkich w połnje wobsadźenym Božim domje žohnowaše. Foto: Rafael Ledźbor
Jana Hrjehorja čitarjo SN znaja jako rozprawjerja wo sporće. Wón je tež wučer, šulski nawoda, starosta Serbskeho Sokoła a wohnjowy wobornik. Nimo toho skutkuje něšto króć wob lěto jako koparski sudnik. Serbšćina jako rěč sudnika na hrajnišću je nowa tema. Kak so na hrajnišću wužiwa? Kelko serbskich sudnikow je? Su mjez nimi žony? Wo tutych a dalšich aspektach je so Lukáš Novosad z nim rozmołwjał.Zawěsće jako serbscy sudnicy husćišo hry němskich koparskich cyłkow sudźiće, dokelž je němskich teamow wjac.J. Hrjehor: Hdyž ja sudźu, su to na dźewjećdźesat do sto procentow němske mustwa, hdźež žadyn Serb sobu njehraje. Ale jara husto sudnik njejsym. Sudźu hry starych knjezow w Ralbicach, tam so wězo serbsce rěči, wšako je tute Ralbičanske mustwo nimale ryzy serbske.Hdyž hewak serbscy koparjo sobu hraja – wužiwaće serbšćinu njehladajo na přitomnosć němskich hrajerjow?
Što je kompjuter a kak wón funguje? Tole zhonja dźěći w nowej digitalnej knižce z titulom „Hodowna misija – kompjuter“, kotruž je studijo Liška w Smjerdźacej wuwiło.Smjerdźaca (SN/BŠe). Štóž ma nětko w zymskim času trochu chwile a wostudu pase, tomu móhł sćěhowacy poskitk studija Liška Smjerdźečanskeje wotnožki studija LUCIJA rjanu wotměnu skićić. Tamniši sobudźěłaćerjo su interaktiwnu serbsku digitalnu knihu za małych wotkrywarjow kompjutera wuwili. „Ideja za to je so z projekta zrodźiła“, wujasnja sobudźěłaćer studija Liška Stefan Gedik. Studijo bě zhromadnje z 2. lětnikom Worklečanskeje zakładneje šule kompjuterowy projekt přewjedł, při kotrymž so šulerjo z kompjuterom a wuhotowanjom zaběrachu. „By škoda było, to nadźěłane jenož za tónle projekt wužiwać. Tuž bě ideja, digitalnu knižku wšitkim zajimcam spřistupnić. Wona je takrjec we wobłuku hodowneho kompjuteroweho projekta w šuli nastała.“
