Mnozy dobrowólnicy su štyri dny trajacy swjedźeń z wulkim angažementom zmóžnili
Chrósćicy (SN/mb/MiP/MG). Wjac hač 20 000 ludźi je lětuši XV. mjezynarodny folklorny festiwal w Budyšinje, Hochozy a Chrósćicach dožiwiło. Katharina Jurkowa, pódla Pětra Brězana hłowna zamołwita zarjadowanja, dźakowaše so 300 pomocnikam, kotřiž su wusahowacy festiwal zmóžnili: „Naš festiwal je wuslědk angažowaneho zhromadneho dźěła, kotryž mnoho dobrowólnych Serbowkow a Serbow organizuje.“
Kóžde druhe lěto wotměwacy so kulturny wjeršk regiona je Domowina pjatnaty raz z mnohimi partnerami organizowała. Z přiražku we wysokosći 150 000 eurow je jón Załožba za serbski lud podpěrała. Jeje direktor Jan Budar widźi mjezynarodny event jako „dopokaz, zo mnohotnosć nam wjeselo wobradźa“. Nimo toho wuprudźa na ludźi z wokoliny, kotřiž móža kónc tydźenja starosće wšědneho dnja zabyć.
Chrósćicy (SN/BŠe). W lěće 2003 je UNESCO wobzamknyła, zo ma so lisćina imaterielneho kulturneho herbstwa nastajić. Zaměr toho je, dušu, drastu, tradicije a rjemjesło ludow na swěće spěchować a škitać. Pod hesłom „Hdźež duša luba schow swój ma“ wobdźěli so pjeć skupinow na programje, zo bychu publikumej swoje wosebitosće pokazali.Ze znatym karnewalom w Južnej Americe steji Kolumbiska na lisćinje kulturneho herbstwa. Čłonojo skupiny Grupo di Música y Dancas Folclóricas Carmen López přeprosychu přihladowarjow do reje pokazujo jim zakładnu kročel a k tomu wšelake wariacije. Tež skupina Balett Saly Velingera ze Senegala je ludźom na Koklic statoku swoju tradiciju hraća na bubonach spřistupniła.
We wobłuku jubilejneho swjedźenja 100 lět Sportowe towarstwo Módro-běli Kulow bě wčera mustwo FC Energije Choćebuz z hosćom w Kulowje. Hru widźało bě 1 400 přihladowarjow. Profimustwo přećelsku partiju 8:0 (2:0) doby. Wrota za FCE třělichu dwoje Romarjo Hajrulla, dwoje Can Moustfa, Jannis Bozairis, Justin Butler, Ted Tattermusch a Erik Tallig. Foto: Mia-Katarina Hrjehorjec
Najebać zakaz ze stron madźarskeho ministerskeho prezidenta Viktora Orbána je so minjenu sobotu w stolicy Budapesće telko ludźi na demonstraciji splažnych mjeńšin wobdźěliło, kaž hišće nihdy w 30lětnych stawiznach parady. Organizatorojo rěča wo 200 000 wobdźělnikach. Policija njeje zapřimnyła. Nětko liča z raznymi pjenježnymi pokutami. Foto: dpa/Balint Szentgallay
Jako sobotu dypkownje w 19 hodź. festiwalna fanfara zaklinča, bě Zahrodnikec-Grutkec statok hižo derje pjelnjeny. Wšako móžachu tam ludźo derje powječerjeć. Nimo praženeho swinjeća a buchtlow z waniljowej jušku woptachu mnozy langoś. Tón poskićowachu w hornjoserbskej, delnjoserbskej a originalnej warianće. Na njón dyrbjachu hosćo lědma dołho čakać, dokelž bě sej Zahrodnikec swójba dobru logistiku zarjadowała. Kaž na štryčku fungowaše zdobom posłužowanje z napojemi, wo čož so přewažnje Grutkec swójbni starachu.
