„Pasion 2015“ tež wulke logistiske wužadanje

Chrósćicy (SN/CoR). Lětnja přestawka je nimo. Za sobuskutkowacych projekta „Pasion 2015“ zaběži nětko horca faza. Wčera zetkachu so něhdźe 30 lajskich hrajerjow w Chróšćanskim Michała Hórnikowym domje na prěnju scenisku probu po lětnjej přestawce. Wot decembra zwučuja hižo za zhromadny projekt Towarstwa Cyrila a Metoda (TCM) a Chróšćanskeje wosady, kotryž změje na tamnišej farskej zahrodźe 12. septembra premjeru. Po 1995 a 2005 je to třeći raz, zo so wosadni wužadanju staja – woprawdźe hoberskemu wužadanju: 70 hrajerjow, z toho jědnaće z Chróšćanskeje dźiwadłoweje skupiny, 90 spěwarjow z chóra Lipa a Chróšćanskeho wosadneho chóra pod wuměłskim nawodom Jadwigi Kaulfürstoweje, hudźbnicy a k tomu hišće dźěći a statisća za israelski lud kaž tež zwěrjata. Hišće probuja chórisća a dźiwadźelnicy dźěleni, wot 29. awgusta chcedźa wšitkich akterow hromadźe zwjesć.