Komplicow z fintu lepili
Peter Čačko rozprawja z Bratislavy za Serbske Nowiny
Słowaksku za čas jeje wobstaća politisce a towaršnostnje ničo njeje tak ze sćěhami přetřasło kaž zamordowanje přepytowaceho nowinarja Jána Kuciaka a jeho slubjeneje Martiny Kušniroveje. A zdobom so ničo njeje tak wobćežnje wuswětlić dalo kaž tele złóstnistwo. Po jeho skućenju 24. februara bě měsacy dospołna „ćišina“ knježiła, tak zo šukotachu hižo wo „zamazowanju“, měješe dźě pječa hić wo splećenje někotrych ministrow Ficoweho knježerstwa z italskej mafiju. Spočatk septembra nałoži policija taktisku fintu – wozjewi identifikaciske foto muža, kiž bě so za čas mordarstwa blisko Kuciakoweho domu w jeho ródnej wsy Veľká Mača „pohibował“. A hlej – mjez wěstymi wosobami nasta hektiske e-mailowanje. Tak lepichu komplicow móžneho naštykowarja mordarstwa, dwělomneho předewzaćela Mariána Kočnera, kiž jebanstwa dla hižo w přepytowanskej jatbje sedźeše. Mjez komplicami bě tež žona. Byrnjež praweho skućićela hišće njeměli, je zjawnosć na postupowanje policije z připóznaćom reagowała.
Žiwjenje wuchował
To a tamne (01.11.18)
Zo móhli kónčki cigaretow recyclować, chcedźa před wšitkimi 350 wobchodami wikowanskeho rjećaza Franprix w Parisu popjelniki nastajeć. Zwjazane je to z namołwu: „Dajće nam swoje cigaretowe kónčki, činimy něšto wužitneho z toho.“ Z filtrow cigaretow chcedźa kumštnu maćiznu wudobywać a nimo toho dróhirjedźerjam pomhać: Jeničce w stolicy Parisu namjetu kóžde lěto 350 tonow cigaretowych filtrow.
Tak derje před staršimaj so schował, zo dyrbještaj policiju wołać, je so třilětny w Kaiserslauternje. Staršej njemóžeštaj jeho ani w domje ani na zahrodźe namakać. Zastojnicy sej dom hišće raz wobhladachu a namakachu hólčka za kuchinskimi durjemi. Tam bě wón wołanje staršeju wotpohladnje ignorował.
Zhromadnosć přikład cyłej Europje
Čěski generalny konsulat w Drježdźanach je wčera w stolicy Sakskeje z mnohimi hosćimi na róčnicu składnostnje załoženja Čěskosłowakskeje před sto lětami spominał.
Gabriel: Ničo njepřechwatać
Berlin (dpa/SN). Něhdyši předsyda SPD Sigmar Gabriel je swoju stronu najebać najnowše wólbne poražki a špatne wuslědki woprašowanjow před tym warnował, přechwatnje wulku koaliciju wopušćić. „Hdyž SPD nětko panisce ćeknje, wona wjace respekta přisadźi, hač by sej zdobyła. Kraj do knježerstwoweje krizy storčić njeby socialdemokratam zawěsće tyło“, rjekny Gabriel nowinarjam. SPD měła so we wulkej koaliciji wobsahowje rozestajeć a spomóžnje za ludźi skutkować. „Njeje přičiny, koaliciju wopušćić.“
Sněh chaos zawinował
Le Puy-en-Velay (dpa/SN). Po sylnym sněhowanju w centralnej Francoskej a wobchadnym chaosu dyrbješe wjace hač tysac ludźi minjenu nóc w nuzowych kwartěrach přenocować. Sčasami je wjace hač 800 awtow na regionalnych dróhach w sněze tčało. Pomocnicy móžachu so jeno ćežko předrěć, dokelž běchu šoferojo swoje zasněžene jězdźidła wopušćili. Nimo toho zaraćichu nakładne awta hórske dróhi, dokelž běchu zakaz jězdźenja po nich ignorowali. Tež železniske čary pola Lyona běchu zawrjene.
Dźěle lětadła mjeztym našli
Fatalne poselstwo Merkel skónčnje přewinyli
Berlin (dpa/SN/MkWj). Hospodarska rada CDU je wolóžena na připowědź zwjazkoweje kanclerki Angele Merkel reagowała, złožić předsydstwo CDU. „Unija je porno wólbam lěta 2013 něhdźe pjećinu wolerjow přisadźiła“, rjekny generalny sekretar CDU přichileneho zwjazka Wolfgang Steiger powěsćerni dpa. Personalny kaž tež wobsahowy poskitk CDU dyrbjał po změnje nawodnistwa strony signalizować, „zo su fatalne poselstwo po wólbach zwjazkoweho sejma ‚njewěmy, što dyrbjeli hinak činić‘ skónčnje přewinyli. Jenož tak móže nahladnosć CDU mjez wolerjemi zaso přiběrać.“
Zapósłanc AfD Budyskeho wólbneho wokrjesa w zwjazkowym sejmje Karsten Hilse sej žada, zo měła Angela Merkel nětko tež jako zwjazkowa kanclerka wotstupić. CDU je pod jeje nawodnistwom konserwatiwne hódnoty spušćiła a so „na socialistisku stronu“ změniła. Strona njeje hižo konserwatiwno-byrgarska, dokelž je najwjetši dźěl čłonow we wodźacych pozicijach na ryzy ‚haj-prajerjow‘ mutěrował, Hilse twjerdźi. Merkel ma zastojnstwo kanclerki złožić a tak nowowólby zmóžnić, sej wón žada.
Němska reparacije wotpokazuje
Berlin (dpa/SN). Něšto dnjow do nowych němsko-pólskich knježerstwowych konsultacijow je zwjazkowe knježerstwo žadanja, płaćić Pólskej za škody w Druhej swětowej wójnje, wotpokazało. „Stejišćo zwjazkoweho knježerstwa w tym prašenju je znate. Na tym njeje so ničo změniło“, informowaše rěčnik knježerstwa Steffen Seibert wčera w Berlinje.
Pólski prezident Andrzej Duda bě do toho w rozmołwje z nowinu Bild rjekł, zo njejsu reparaciske płaćenja za njeho „žana wotbyta tema“. Zdobom skedźbni wón na přepytowanja, kotrež bě bywši pólski prezident Lech Kaczyński zhotowić dał. Z toho wuchadźa, „zo njebuchu nam nastate straty zarunane“.
Za Němsku je tema reparacijow porno tomu z lěta 1990 podpisanym zrěčenjom „Dwaj-plus-štyri“ wotzamknjena, kotrež bě mjezynarodny zakład znowazjednoćenja Němskeje. W nim rěka, zo „njejsu žane dalše reparacije“ předwidźane. Pólska argumentuje, zo njebu w tym nastupanju prašana. Pjatk chcetej so knježerstwje konsultować.
Nowa doba zahajena
To a tamne (30.10.18)
Při mjetanju gumijowych škórnjow je britiski princ Harry (34) swojej mandźelskej Meghan podležał. Wójwoda ze Sussexa dyrbješe po kurioznym wubědźowanju w Aucklandźe, najwjetšim měsće Nowoseelandskeje, swoju poražku přiznać, po tym zo bě wójwodka Meghan (37) škórń cyły meter dale ćisnyła hač wón. Přihladowarjo pak Harryja chwalachu, zo měješe pječa lěpšu techniku.
Na wjacore dny bjez pitneje wody hotuja so w Mexiku-měsće. Wot jutřišeho chcedźa w 13 z cyłkownje 16 zarjadniskich štwórćow wodowody porjedźeć, kotrež stolicu z dźewjeć milionami wobydlerjow z pitnej wodu z wokolnych horow zastaruja. Ludźo dyrbja znajmjeńša hač do 4. nowembra znjesć, zo njezměja žanu abo jenož jara mało wody. Měšćanske zarjadnistwo je 500 nakładnych awtow skazało, kotrež maja w tym času čerstwu wodu do města wozyć.
Zwón měra swój cil docpěł
Wjeliki Nowgorod (B/SN). Konjacy zapřah měra z Braniborskeje do Ruskeje je po něhdźe 2 300 kilometrach jězby swój cil we Wjelikim Nowgorodźe pola Pětrohroda docpěł. Po historiskim puću su zastupjerjo ewangelskeje wosady Brück zwón měra do Ruskeje dowjezli.
Złóstnistwa wozjewić
Berlin (B/SN). Zamołwity za antisemitizm Němskeho zwjazkoweho knježerstwa Felix Klein planuje nowy system registracije njepřećelskosćow a złóstniskich podawkow přećiwo Židam z mjenom MIRA. Tež podeńdźenja, kotrež njesłušeja hišće k direktnej namocy, maja so po cyłej Němskej zaměrnje zapisować, kaž na přikład, hdyž skućićeljo wospjet před durje židowskich hosćencow skažene swinjace mjaso kładu. Nimo toho chce Klein z nowymi medijemi přećiwo přiběracemu antisemitizmej wojować.
Třo rabinerojo zapokazani
