Paris/Moskwa (dpa/SN). Ruski wonkowny minister Sergej Lawrow nima posrědnika w konflikće swojeho kraja z Ukrainu za trěbneho. Zamołwići wobeju krajow móža problemy sami rozjimać, rjekny wón po rozmołwje ze swojim francoskim kolegu Jeanom-Yvesom Le Drianom wčera w Parisu. „Dyrbjeli-li hišće někotre techniske prašenja być, kotrež njejsu ukrainskej stronje cyle jasne, móhli­ je městne namjezne zarjady wo­beju krajow­ rozrisać.“

Lawrow je tuž wotpowědny namjet Němskeje a Francoskeje wotpokazał. Němski wonkowny minister Heiko Maas (SPD) bě do toho w Berlinje namjetował, we wobłuku tak mjenowaneho Normandiejoweho formata ze zastupnikami Ruskeje, Ukrainy, Němskeje a Francoskeje „za rozrisanjom pytać“. Při tym dyrbjeli wšitko činić, zo bychu dalšej eskalaciji zadźěwali­. Pozadk toho je najnowši po­dawk před połkupu Kerč. Tam bě ruska mórska straža tři ukrainske patruljowe łódźe sćazała a wšitkich 23 namórnikow zajała. Znajmjeńša třo Ukraijenjo so při zasadźenju zranichu.

Böblingen (dpa/SN). Hladajo na straty unije při wólbach a rozrosta AfD dla je generalna sekretarka CDU Annegret Kramp-Karrenbauer wo „zaprajenju“ swojeje strony rěčała. Kaž wona na mjeztym pjatej regionalnej konferency we wubědźowanju wo naslědnistwo předsydki CDU Angele Merkel w Böblingenje pola Stuttgarta rjekny, maja mnozy zaćišć, zo so CDU wo jich starosće a woprawnjene strachi njestara. „Njesměmy so tuž dźiwać, zo sej runje ludźo strony pytaja, wot kotrychž maja znajmjeńša zaćišć, zo so wo to staraja“, Kramp-Karrenbauer měnješe. „To je zaprajenje minjenych lět, hdyž chcemy to tak mjenować. Tu dyrbimy a budźemy so polěpšić.“

Přiwšěm dósta jeje kontrahent w boju wo zastojnstwo předsydy CDU, Friedrich Merz, na zetkanju najwjace přikleska. Merz, kiž ma na hospodarsce sylnym juhozapadźe­ wjele přiwisnikow, sej žadaše, zo měła CDU zjawnje přiznać, zo njeje so minjene lěta „njepřijomnym prašenjam“ towaršnosće dosahajcy wěnowała a zo njeje so wo ludźi starała.

Škrěčenje za wójnu abo „warnowanje“ před njej funguje stajnje zaso po samsnym wašnju: Dyrbiš to tak dołho wospjetować, doniž wšitcy do toho njewěrja. Nětko warnuje Ukraina před wójnu z Ruskej, kotraž je pječa jednotki na ukrainsku mjezu přepołožiła. Mjeztym jewja so samo na zapadźe hłosy, kotrež nimaja wójnsku retoriku ukrainskeho prezidenta Porošenka za ničo druhe hač ryzy wotwodźenski manewer hladajo na problemy kraja a na jeho woteběracu nahladnosć mjez ludźimi. By-li Ruska Ukrainu woprawdźe nadpadnyła, by to wšěm njepřećelam Ruskeje najwjetši dar był: Moskwa by skónčnje jako zły agresor wohańbjena była a NATO móhła to nałožić, štož je runje­ hakle w Norwegskej zwučowała: wotwobarać ruski nadpad. A němske tanki, kotrež hižo w Litawskej steja, njebychu daloko měli. Potom bychu Němcy a Ru­sojo zaso na so třěleli. Njewěrju, zo Ruska to chce. Marko Wjeńka

Berlin/Magdeburg (dpa/SN). Zwjazk a zwjazkowe­ kraje chcedźa natwar jednotneje internetneje syće za wšitke policajske zarjady ze zhromadnym etatom financować. Do njeho maja Zwjazk a jednotliwe kraje wotpowědnje swojim financnym móžnosćam přinošować. To je saksko-anhaltski nutřkowny minister Holger Stahlknecht (CDU) powěsćerni dpa zdźělił. Natwar jednotneje datoweje banki a internetnych syćow je wulke wužadanje, kotrež drje budu hišće lěta dołho zwoprawdźeć, wón doda.

Na kóncu ma tuchwilna njepřewidna syć jednotliwych policajskich systemow, kotrež njejsu mjez sobu zwjazujomne, wotstronjena być. By-li so plan poradźił, móhli zastojnicy na přikład při pytanju za skućićelemi a w podobnych padach daty z druhich zwjazkowych krajow widźeć a wužiwać.

Nadrobnosće financowanja zhromadneje internetneje syće chce Holger Stahlknecht na dźensa zahajacej so konferency nutřkownych ministrow ze swojimi kolegami wobrěčeć. Ministrojo wuradźuja hač do pjatka w Magdeburgu. Stahlknecht je předsyda konferency.