FPÖ wólby w Awstriskej dobyła
Wien (dpa/SN). Prawicarska FPÖ je wólby parlamenta w Awstriskej ze 29,2 procentomaj hłosow dobyła. Tole zdźěla nutřkowne ministerstwo kraja jako dotalny kónčny wuslědk wólbow. Dotalna strona zwjazkoweho kanclera ÖVP dyrbi so ze 26,5 procentami z druhim městnom spokojić. Konserwatiwna ÖVP je jědnaće procentow přirunujo z wólbami lěta 2019 přisadźiła. Samsny čas je FPÖ wo 13 procentow rozrostła.
Třeća najsylniša strona w Narodnej radźe, wulkej komorje parlamenta, je přichodnje SPÖ ze 21,1 procentom (-0,1). Liberalna strona Neos dósta dźewjeć procentow (+0,9). Zeleni, kotřiž su dotal z konserwatiwnymi knježili, docpěchu tónkróć jenož wosom procentow (-5,9). Małe strony kaž Piwowa strona abo komunistiska KPÖ wostachu jasnje pod w Awstriskej płaćacej mjezu štyrjoch procentow a njejsu tak hižo w parlamenće zastupjene. Předsyda dobyćerskeje FPÖ Herbert Kickl je tamne strony do koalicije namołwjał. Zwjazkowy kancler Karl Nehammer (ÖVP) tole wotpokazuje.
Pozbudźowacy signal
CSD měrnje wotběžał
Zhorjelc (dpa/SN). Wot prawicarskich protestow přewodźene su sta ludźi mjeztym třeći Christopher Street Day (CSD) w Zhorjelcu swjećili. Pod hesłom „Samsne prawa za wšěch!“ ćehnjechu woni zawčerawšim po hraničnym měsće tež do Pólskeje. W socialnych syćach běchu němscy a pólscy prawicarjo namołwjeli, přećiwo přiwisnikam CSD protestować. Po informacijach policije wobdźěli so wjace hač 700 ludźi na zarjadowanju CSD, při napřećiwnym protesće bě jich něhdźe 460.
Němska kaž tež pólska policija běštej wjetše zasadźenje přihotowałoj. Po informacijach policije su zastojnicy direktnemu zetkanju wobeju zhromadźiznow zadźěwali. „Ćahaj smy w rozdźělnych časach dowolili, najprjedy přećah CSD a potom napřećiwny protest“, rěčnik policije wuswětli. Po informacijach policije je wšitko poměrnje měrnje wotběžało a njedóńdźe k wukročenjam abo namócnym rozestajenjam. Na spočatku napřećiwneje zhromadźizny pod hesłom „Domiznu a tradiciju wobchować“ někotři wobdźělnicy zakazane prawicarske parole pokazachu. Přećiwo potrjechenym je policija přepytowanje zahajiła.
To a tamne (30.09.24)
Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.
Turistaj z Vietnama staj tele dny spytałoj z sportowymi črijemi a ćeńkimaj cholowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.
Iran njebudźe přihladować
Teheran (dpa/SN). Iran njewostanje w padźe wobšěrneje wójny Israela přećiwo Libanonej neutralny. Tole je wonkowny minister Abbas Araghchi na zetkanju wonkownych ministrow wjacorych krajow w New Yorku připowědźił. Araghchi žadaše sej zdobom brónjowe a hospodarske sankcije přećiwo Israelej. Mjezynarodnemu zjednoćenstwu statow wumjetowaše wón njekmanosć a zaprajenje hladajo na přiměr na Bliskim wuchodźe.
Braniborska CDU nochce z BSW
Podstupim (dpa/SN). Braniborska CDU nochce w móžnej koaliciji SPD ze Zwjazkom Sahry Wagenknecht (BSW) sobu dźěłać. Po sonděrowanskej rozmołwje wólbneho dobyćerja SPD z CDU wobě stronje zdźělištej, zo njejstej žadyn dalši termin rozmołwow dojednałoj. Tuž zwostanje SPD jenož hišće jenička móžnosć wutworjenja knježerstwa, dokelž nochce nichtó z AfD koaliciju wutworić. SPD zetka so tuž přichodny tydźeń z BSW.
Za wjace solara na balkonach
Składnostnje 10. róčnicy zawlečenja 43 studentow w Mexiku su ...
Klingbeil namołwja FDP
Zelenskyj zetka so z Trumpom
New York (dpa/SN). Bywši prezident USA Donald Trump je připowědźił, zo chcył so z ukrainskim statnym šefom Wolodymyrom Zelenskym zetkać. „Zelenskyj je wo to prosył, so ze mnu zetkać“, rjekny Trump na nowinarskej konferency. Zeńdźenje wobeju politikarjow bě dźensa popołdnju w New Yorku planowane.
Trump bě so hakle předwčerawšim, srjedu, na wólbnym bojowym zarjadowanju w staće North Carolina chětro wothódnoćejo wo Zelenskym wuprajił, kritizujo masiwnu pjenježnu a wojersku pomoc USA na dobro Ukrainy. Zelenskemu wón wumjetuje, zo njeje zwólniwy, z Ruskej „deal“ wujednać.
Ukrainski prezident bě so wčera z prezidentom USA Joewom Bidenom zetkał. Tón přilubi jemu krótko do zakónčenja zastojnstwa dalšu wojersku pomoc wjacorych miliardow dolarow. Wiceprezidentka Kamala Harris chce Ukrainu přichodnje tohorunja podpěrować.
Baerbock: Žane dalše přiwótřenje
Prěnje posedźenje sejma chaotiske
Erfurt (dpa/SN). Po chaotiskim prěnim posedźenju Durinskeho krajneho sejma dyrbi krajne wustawowe sudnistwo nětko wo dalšim postupowanju rozsudźić. Parlament w Erfurće je tak nachwilnje w krizy, dokelž njeje bjez prezidenta krajneho sejma štyri tydźenje po wólbach hišće jednanja kmany. Štož je so wčera w Erfurće stało, wospjetne přetorhnjenje posedźenje krajneho sejma a skazanje wustawoweho sudnistwa, je fachowcam parlamentarizma „njewšědny podawk“.
Prěnje posedźenje krajneho sejma je so po wjacorych přetorhnjenjach, wołanjach a werbalnych rozestajenjach z eklatom skónčiło. Při tym dóńdźe k raznym diskusijam mjez zastupnikami AfD a frakcijemi CDU, BSW, Lěwicy a SPD. Parlamentej so ani njeporadźi, zwěsćić, hač je wobzamknjenja kmany.
Mjeztym sej amtěrowacy nutřkowny minister Durinskeje Georg Maier (SPD), žada, AfD zakazać. Strona je po jeho měnjenju dopokazała, zo agresiwnje a bojownisce přećiwo parlamentej postupuje. Druzy namołwjeja, so zaso změrować.
