Merz žada sej hnydomne prašenje dowěry
Berlin (dpa/SN). Dotalny hospodarski poradźowar zwjazkoweho kanclera Olafa Scholza (SPD) Jörg Kukies, ma so z naslědnikom pušćeneho financneho ministra Christiana Lindnera stać. Tole je powěsćernja dpa z knježerstwowych kruhow w Berlinje zhoniła.
Socialdemokrat Kukies je statny sekretar w kanclerskim zarjedźe a najwažniši poradźowar Scholza. Wón je jeho fachowc za hospodarstwo a financy a zastupuje Scholza nimo toho na wažnych mjezynarodnych zarjadowanjach w hospodarskich naležnosćach.
Scholz bě wčera po dotal njewidźanej rozkorje financneho ministra Christiana Lindnera (FDP) pušćił. Zwjazkowy prezident Frank-Walter Steinmeier je Lindnerej dźensa popołdnju wopismo pušćenja přepodał a po tym Kukiesa do zastojnstwa powołał.
Dale je zwjazkowy wobchadny minister Volker Wissing připowědźił, zo jako jedyn ze štyrjoch ministrow FDP w zastojnstwje wostanje, zo pak z FDP wustupi. Po pušćenju Lindnera bě zwjazkowa FDP swojich ministrow wotwołała.
Rozmołwy ze sakskej BSW zwrěšćili
Drježdźany (dpa/SN). Po zwrěšćenych sonděrowanskich rozmołwach mjez CDU, BSW a SPD k wutworjenju zhromadneje koalicije njeje jasne, kak při pytanju za nowym knježerstwo nětko dale dźe. Zwjazk Sahry Wagenknecht bě rozmołwy wčera skónčił.
Přewulke běchu diferency w centralnych prašenjach kaž w měrowej politice, w migraciji a financach. Plan tak mjenowaneje koalicije ćernjowki, kaž ju tež w Durinskej a Braniborskej přihotuja, je tuž z blida. Krajna předsydka BSW Sabine Zimmermann připowědźi, zo chcyła BSW nětko w opoziciji dale dźěłać.
Sakski ministerski prezident Michael Kretschmer (CDU) rěčeše po zwrěšćenju rozmołwow z BSW wo „wulkim přesłapjenju“. Zo so BSW nětko wróćo sćehnje, „je jara škoda za Saksku“, wón rjekny.
Nětko dźe wo to, knježerstwo wutworić. Po wustawje dyrbi krajny sejm pjeć měsacow po wólbach noweho ministerskeho prezidenta wuzwolić. Doba so spočatk februara 2025 skónči. Po tym bychu nowowólby trěbne byli. Tomu pak chcył Kretschmer na kóždy pad zadźěwać. „Mamy Sakski krajny sejm, kiž je woleny. Tute wjetšinowe poměry dyrbimy nětko wobkedźbować.“
Skónčnje je nimo!
Zwjazkowy kancler Olaf Scholz (SPD) je sej dale swěrny. Wčera wječor wumjetowaše na swojej nowinarskej konferency w Berlinje zwjazkowemu financnemu ministrej Christianej Lindnerej (FDP), zo je njedowěrliwy a njehódny taktěrowar. Runočasnje je sebi samomu na ramjeni klepał. To bě woprawdźe hubjene dźiwadło. Tak skedźbni Scholz na wuspěchi, kotrež su pod jeho nawodnistwom docpěli, a zwurazni, zo je Němska sylny kraj. Tomu pak dawno tak njeje. Skerje knježa chaotiske poměry. Stajnje zaso dožiwjachmy ćahańcy a njedorozumjenja w koaliciji. Wo tym swědča tepjenski zakoń, etat, migracija, dezolatna infrastruktura, wobydlerski pjenjez, deindustrializacija a tak dale.
Na zbožo je bórze nimo. Zwjazkowe knježerstwo chce klětu w měrcu nowe wólby přewjesć. Prašenje dowěry chce kancler pak hakle 15. januara stajić. Čehodla tak dołho čakać? Trjebamy w Němskej jasnosć a spěšne rozrisanja. Dyrbimy wědźeć, kak dale dźe. Bianka Šeferowa
Wosuški zhromadnje woptali
Za lěpši škit w cyberowym rumje
Freital (dpa/SN). Sakska chce so lěpje přećiwo cyberowym nadpadam škitać a zepěra so při tym na kompetencu Zwjazkoweho zarjada za wěstotu informaciskeje techniki (BSI). Na wopyće we wotnožce BSI w Freitalu chwaleše ministerski prezident Michael Kretschmer (CDU) dobry zwisk ze zarjadnišćom. Jedna so wo swět wopřijace wohroženje, přećiwo kotremuž dyrbjeli wšitke zwjazkowe kraje zhromadnje dźěłać. BSI je Sakskej při tym z dobrym partnerom, wšako trjebaja krute a wěste komunikaciske puće.
Kretschmer informowaše so hladajo na to wo techniskich móžnosćach za sposrědkowanje tajnych informacijow. W Freitalu předstajichu jemu we wosebitej rumnosći wulce wěsty system. BSI chce w swojej rumnosći tež druhim partneram tajke techniske móžnosće předstajić. „Wohroženje ze stron cyberoweho ruma je dale strašne, njejsmy pak bjez škita“, rjekny Kretschmer po zarjadowanju. Wón skedźbni na wopyt zwjazkoweho kanclera Olafa Scholza (SPD) w Drježdźanach. Jako chcyše wón telefonować, mějachu to zamołwići za wěstotu problem. „Tole so wjace njestanje“ měni Kretschmer.
To a tamne (07.11.24)
Konjace wubědźowanja wotprajili su dźensa po wšej Francoskej. Po tutym puću demonstruje konjaca branša přećiwo planowanemu zwyšenju dawkow na konjace wjety. Stawki w konjacym sporće su w Francoskej přewšo rědke. Tamniše knježerstwo chce z raznymi naprawami 60 miliardow eurow w etaće zalutować. Nimo nowych kreditow planuja tež wyše dawki. Branša pak z tym liči, zo wohrožuja dawki dźěłowe městna.
Seriju wjace hač 50 zadobywanjow do domow wuslědźiła je policija w Saksko-Anhaltskej. Tam su mjeztym 14lětneho młodostneho a 25lětnu žonu zajeli. Wobaj běštaj cwólbu nawjedowałoj, kotraž bě we wjacorych zwjazkowych krajach aktiwna. Paduši wurumowachu domske wodnjo, jako njebě nichtó tu. Při tym zawostajichu wulku wěcnu škodu.
Knježerstwo přilubja pomoc
Valencia (dpa/SN). Tydźeń po zahubnym „njewjedru lětstotka“ na wuchodźe Španiskeje z wjace hač 200 smjertnymi woporami skići katastrofowa kónčina přeco hišće zrudny napohlad. Najebać mjeztym zahajene rumowanske dźěła je wjace hač 60 gmejnow w kónčinje Valencije hišće z błótom pokryte. Wšudźe leži njerjad, skóncowane meble a nastaplowane awta. Za 89 ludźimi hišće pytaja. Knježerstwo připowědźa nuzowu pomoc 10,6 miliardow eurow.
Terorisća w přepytowanskej jatbje
Karlsruhe (dpa/SN). Po zajeću wosom pozdatnych čłonow militantneje skupiny neonacijow su šesćoch z nich do přepytowanskeho jastwa tyknyli. Hdy tamneju sudnikej předstaja, hišće njewědźa, zwjazkowe statne rěčnistwo zdźěla. To bě wosom muži w Pólskej a Sakskej zajeć dało. Jim wumjetuja čłonstwo w teroristiskim zjednoćenstwje. Mjez zajatymi je po informacijach powěsćernje dpa tež lokalny politikar AfD ze Sakskeje.
Lěpši škit woporam namocy
