Chcedźa załožbu a serbskosć sylnišo spěchować

Podstupim/Budyšin (SN/JaW). Sakska chce Załožbje za serbski lud klětu 260 700 eurow wjac přewostajić, hač je w zrěčenju k jeje financowanju wujednane. Tež w lěće 2018 chce załožbje město 6,2 milionow 6 460 700 eurow přewostajić. To wuchadźa z naćiska sakskeho etata za 2017/2018, kotryž Serbskim Nowinam předleži.

Braniborska předwidźi załožbu dale z 3,1 milionom eurow spěchować, rěka w naćisku etata – tež tón redakciji předleži. Přiwšěm pak planuja za klětu a 2018 cyłkownje 800 000 eurow wjace za serbskosć w kraju wudać, zdźěli mjeńšinopolitiska rěčnica frakcije Lěwicy w Braniborskim krajnym sejmje Renate Harcke. Wjac wudawkow planuja za spěchowanje mjeńšinowych rěčow – tež serbšćiny –, za kubłanske wuwiwanje ABC a dalše wobłuki.

Hižo jako wjesnjanostka je Gertrud Wincarjowa stajnje zaso ze swojej aktiwnosću a wutrajnosću napadnyła. Z Krabatowym młynom pak je sej widźomny pomnik stajiła,­ za čož su ju wčera ze Zwjazkowym zasłužbowym rjadom počesćili. Wona je žiwy dopokaz, zo móžeš ze zasadźenjom a pilnymi sobuwojowarjemi tójšto zdokonjeć, hdyž to woprawdźe chceš. Mjeztym je tójšto ludźi Čorny Chołmc a jeho młyn wopytało, po tym zo běchu so nawigaciski nastroj awta prašeli, kak najlěpje mału wjes na kromje Wojerec docpěješ. Najpozdźišo pak, hdyž podarmo spytaš sej zastupny lisćik za jedne z předstajenjow na Krabatowym swjedźenju skazać, nazhoniš, zo je tam minjene lěta něšto wusahowace nastało. Sym sej wěsty, zo je Gertrud Wincarjowej wulki nawal wopytowarjow runje tajke wulke připóznaće za jeje dźěło kaž wčerawše wuznamje­njenje. Marko Wjeńka

30 000 eurow namakachu dźěći w Gundelfingenje pola Freiburga, jako běchu po puću do šule – a su so jako sprawni namakarjo wopokazali. Kaž policija zdźěli, běchu šulerjo w starobje 12 do 13 lět wčera na kromje wsy wjacore baliki pjenjez namakali a na policajsku stražu donjesli. Tam napisachu jim zastojnicy zamołwjenje, wšako dźěći swojeje sprawnosće dla spočatk wučby zapasechu. Policija dotal njewě, zwotkel pjenjezy pochadźeja.

Tójšto mjerzanja napara sej farar w norwegskim Gjerdrumje, po tym zo je z dźesaćlětnymi šulerjemi pohrjeb „hrał“. Komuna jako nošerka šule je jemu tole mjeztym zakazała. Duchowny bě šulerjow kašć njesć dał. Kritiku wón wotpokazuje: Smjerć je dźensa mnohim wulki tabu. Dźěći pak maja tójšto prašenjow. Wopyt cyrkwje je dźěl wučbneho plana.

Berlin (dpa/SN). Zwjazkowa kanclerka Angela Merkel (CDU) je přećiwo zawěranju Němskeje w zwisku z mjezynarodnymi krizami a njewěstosćemi warnowała. Tak měli zhromadnje z druhimi krajemi za globalizaciju skutkować, rjekny kanclerka dźensa w Berlinje na generalnej debaće zwjazkoweho sejma wo etaće 2017. Klětu přewozmje Němska prezidentstwo 20 wodźacych industrijnych a wuwiwacych so krajow swěta.­ Ćežišćo ma wuše zhromadne dźěło z Afriku być, ale nic jenož na ćěkancow wusměrjene.

Trumpa akceptować

Istanbul (dpa/SN). Turkowski statny prezident Recep Tayyip Erdoğan je přichodneho prezidenta USA Donalda Trumpa před kritikarjemi z Europy a USA­ zaki­tował. „Hdyž někoho za diktatora pomjenuja, je to derje tak“, rjekny Erdoğan dźensa na konferency islamskich statow w Istanbulu. Dale wón Europje wumjetowaše, zo wuslědki wólbow w USA njeakceptuje. „Trump bu demokratisce woleny, respektujće to.“

876 lětow wupadnyło