To a tamne (01.12.16)
Do kóždeho filma narodnu hymnu spěwać dyrbja wotnětka we wšitkich kinowych žurlach Indiskeje. Nimo toho maja wopytowarjo při tym jako znamjo respekta stanyć. Tole je najwyše sudnistwo kraja w New Delhiju wukazało. Noworjadowanje ma ludźom „začuće angažowaneho patriotizma zašćěpić“. Dotal bě hymna jenož w někotrych statach Indiskeje z wašnjom.
Na kruwjacu pastwu nawróćiło je so dźiwje swinjo Johann w Delnjej Sakskej, po tym zo bě w lěću po lěsu brodźiło. Kruwy běchu so hižo loni z wjele lubosću wo wosamoćene prosatko starali a je do swojeho cyłka přiwzali. Prawdźepodobnje bě Johann swoju mać zhubił. Mjeztym je kundroz chětro narostł. Najebać to bě witanje na kruwjacej pastwje wutrobne: Kruwy swojeho Johanna lizachu a dźělachu z nim swoju picu.
W Holešowje ćěkancow rozžohnowali
Holešow (SN/CoR). Zawčerawšim rano su so durje domu za požadarjow azyla w Holešowje zawrěli. Bus je wšitkich, čejichž azylowe jednanje hišće běži, do domow w Biskopicach a Budyšina dowjezł. Jenož někotři młodźi mužojo tam hišće něšto dnjow přebywaja. Woni su prawo dóstali, přichodne tři lěta w Němskej wostać, a čakaja na to, do swójskeho bydlenja přećahnyć móc. W Holešowje bě w nowembrje hišće 19 ćěkancow zaměstnjenych, spočatk lěta bě jich 45.
Merkel nahlad změniła
Berlin (dpa/K/SN). Němska kanclerka Angela Merkel (CDU) je za to, z Turkowskej wo jeje přistupje k Europskej uniji dlěje njerěčeć. Nowina Bild rozprawja, zo je so Merkel na posedźenju frakcije unije takle wuprajiła. Postupowanje turkowskeho knježerstwa přećiwo opozicionelnym mocam po pospytanym puču žadyn dalši kapitl njedowola. Zapósłancam kanclerka poruči, tole ludźom we wólbnych wokrjesach wuswětlić, su-li prašenja, kak z Turkowskej dale wobchadźeć.
Za lěpše brónjenje
Brüssel (dpa/K/SN). Komisija EU předstaji dźensa plan za zesylnjenje europskeje brónjenskeje industrije. Po nim ma zhromadne dźěło mjez čłonskimi statami přichodnje wuše a skutkowniše być. Po wotpowědnych wobličenjach hodźeli so tak lětnje wjacore miliardy zalutować – pjenjezy, kotrež móhli za wuwiwanje dronow a dalšich bróni wužić. Institut EUISS zwěsći, zo wudachu staty EU loni 203 miliardy eurow za zakitowanje, štož stej dwě třećinje mjenje hač USA.
Bachmann ma pokutu płaćić
Nico Rosberg, nowy swětowy mišter w formuli 1, wopyta dźensa swoje ...
Wubědźowanje klětu nazymu
Podstupim (SN/MkWj). Połny program měješe Rada za serbske naležnosće Braniborskeje na swojim wčerawšim zetkanju w Podstupimskim krajnym sejmje na dnjowym porjedźe. Tole zdźěli předsyda gremija Torsten Mak na naprašowanje Serbskich Nowin. Na posedźenje přeprosyli běchu sej noweho direktora Załožby za serbski lud Jana Budarja, přechodneho direktora Budyskeho Serbskeho instituta dr. Hauke Bartelsa a nawodu Choćebuskeho měšćanskeho muzeja Steffena Krestina, zo bychu jich zeznali.
Čłonojo rady zaběrachu so tež z planowanym komunalnym wubědźowanjom „Rěči přichilena gmejna – serbska rěč je žiwa“. W tym zwisku so dojednachu, zo měło so wubědźowanje w Braniborskej hakle klětu nazymu zahajić. Hłowna přičina je tuchwilny proces, w kotrymž móža gmejny wo to prosyć, zo by so jich přisłušnosć k serbskemu sydlenskemu rumej zwěsćiła. Wuslědki toho měli so wočaknyć. W Sakskej chcedźa wubědźowanje hižo nalěto zahajić.
Razna ataka na Hariga
Stawizny město fyziki wučić
Pólske knježerstwo šulski system zasadnje přerjaduje
Waršawa (dpa/SN). Miliony pólskich młodostnych so tuchwilu prašeja, hdźe klětu do šule póńdu. Woni tež njewědźa, z kotrych wučbnicow budu wuknyć. Wěste jenož je: Wšitko budźe hinak. Z razantnej spěšnosću nowe pólske narodnokonserwatiwne knježerstwo šulski system přerjaduje. Wučbny plan za přichodne šulske lěto hišće nima. Najebać to chce zakoń, kotryž hakle tutón tydźeń do parlamenta přińdźe, hižo 2017 zwoprawdźić. Z absolutnej wjetšinu knježaca strona Prawo a sprawnosć (PiS) chce z reformu šulstwa tajke struktury wutworić, kaž běchu wone za čas komunizma. Protesty dźesaćitysacow wučerjow, staršich a šulerjow knježacych njewottrašeja.
Snano cyrkej pomha
Hišće tójšto prašenjow
To a tamne (30.11.16)
Praktikum pola queen w Londonje? Młodym hotelownikam z Karibiki móhło so tole zmóžnić. Princ Harry bě tam na dwutydźenskej jězbje wosebity program předstajił. Tak pytaja dźewjeć praktikantow w Buckinghamskim palasće a na hrodźe Windsor, kaž britiski kralowski dom zdźěla. Šěsć tydźenjow trajacy praktikum měri so na zajimcow karibiskich statow Jamaiki, Grenady a Santa Lucije, hdźež je queen hłowa stata.
Njetrjebachu woheń hašeć, ale dyrbjachu sej z klockami hrajkać: wohnjowi wobornicy w Mnichowje. Nan dwulětneho hólca dyrbješe problemow dychanja dla nuznje do chorownje. Dokelž njebě mać hišće doma, so wohnjowi wobornicy tak dołho wo hólčka starachu, kiž wopokaza so „jara kooperatiwny“. Maćeri móžachu skónčnje wšelake „wotdźěłane hry“ a wulki twar z lego-klockami přepodać.
