Wopory wobkrućene
To a tamne (19.07.16)
250 kilogramow ćežkeho muža z awta wuswobodźiła je wohnjowa wobora njedaloko Kaiserslauterna w Pfalcy. 60lětny bě sej na parkowanišću w awće wusnył. Při tym suny so ze sedła a so tak zatłusny, zo njemóžeše so hižo sam wuswobodźić. Tež wohnjowa wobora měješe swoju lubu nuzu. Jako mužej strowotne problemy hrožachu, wobornicy třěchu awta wotrězachu. Muža dowjezechu do chorownje. Akcija traješe něhdźe štyri hodźiny.
Wopačne ćěło pochowali su w šwicarskim Sittenje. Prawdźepodobnje běchu ćěło w centralnym instituće zaměnili. Hakle jako chcyše pochowanski institut zemrěteho wotewzać, dyrbjachu zwěsćić, zo je mjeztym druhdźe pochowany. Dyrbjachu kašć tuž zaso wuryć a jón korektnje pochować, kaž nowiny rozprawjeja. Za přiwuznych zemrěteju bě zaměnjenje ćěłow wulki šok.
Transporter po puću k ISS
Cape Canaveral (dpa/SN). Z něhdźe 2 000 kilogramami wšelakich zastaranskich tworow a wědomostneje techniki je priwatny swětnišćowy transporter „Dragon“ k swětnišćowej staciji ISS wotlećał. Raketa typa Falcon-9 je minjenu nóc na swětnišćowym dwórnišću Cape Canaveral w staće USA Florida wuspěšnje startowała, kaž ameriski swětnišćowy zarjad NASA zdźěli. „Dragon“ ma zajutřišim, srjedu, k ISS dolećeć.
Maas njespokojom
Berlin (dpa/SN). Zwjazkowy justicny minister Heiko Maas (SPD) internetnemu portalej Facebook wumjetuje, zo přilubjenja w boju přećiwo hidźe w interneće njedodźerži. W lisće wodźacym zamołwitym komunikaciskeho koncerna w Berlinje a Londonje skedźbnja Maas hišće raz na wuslědki wuradźowanja zhromadneje dźěłoweje skupiny. „Wuslědki wašich napinanjow njewotpowěduja tomu, štož smy sej dorěčeli“, časopis Spiegel Maasa cituje. Wón sej žada, hidypołne komentary dokładnišo wotstronić.
Johnson moderatny był
Na wjacorych městnach pobrjóžneho bulwara w francoskim měsće ...
Pytaja dale za pomocnikami skućićela
Paris/Nizza (dpa/SN). Po atentaće w francoskim měsće Nizzy ze znajmjeńša 84 mortwymi pyta francoska policija dale za pomocnikami skućićela. Wčera wječor bě hišće sydom wosobow w jatbje, kotřiž móhli zwiski k 31lětnemu Tunezičanej Mohamedej Lahouaiejej-Bouhlelej měć. To je powěsćernja AFP zdźěliła. Wjace hač 200 policistow wuhódnoća tuchwilu telefonaty a SMSki skućićela, kiž bě minjeny štwórtk w Nizzy z nakładnym awtom wotpohladnje do syły ludźi jěł a na nich třělał. Policija jeho zatřěli.
Sobotu wječor je so wjace hač tysac ludźi w Pariskej katedrali na žarowanskich kemšach wobdźěliło. Dźensa je wěstotny kabinet kraja w Parisu wuradźował.
Zaso třo policisća w USA morjeni
Kak na podawki reagować
Brüssel (dpa/SN). Wonkowni ministrojo krajow Europskeje unije wuradźuja dźensa wo tym, kak na podawki minjenych dnjow w Turkowskej reagować. Hižo do posedźenja zdźěli Awstriska, zo měł so ćišć na turkowskeho prezidenta Recepa Tayyipa Erdoğana zesylnić. EU njeměła akceptować, zo turkowske knježerstwo po zwrěšćenym puču swojowólnje politiskich přećiwnikow přesćěhuje.
Wćipni su w Brüsselu na Borisa Johnsona. Wulki aktiwist brexita a bywši Londonski měšćanosta wobdźěli so jenož něšto dnjow po pomjenowanju za wonkowneho ministra Wulkeje Britanskeje prěni raz na wurdźowanju EU. W běhu wólbneho boja wo wustupje kraja ze zhromadźenstwa je wón swojich njediplomatiskich wuprajenjow dla napadnył.
K hižo dołho planowanym temam na schadźowanju wonkownych ministrow słušeja tež poćahi EU k Chinje a łaćonskoameriskim statam.
Warnuja Turkowsku
Razne naprawy knježerstwa po poraženju wojerskeho puča
Ankara/Kizilot (dpa/SN/JaW). Po zwrěšćenym wojerskim puču je turkowske knježerstwo 1 800 přidatnych policistow do Istanbula pósłało. Z tankowymi jězdźidłami maja woni strategisce wažne městna najwjetšeho města kraja zawěsćić, kaž statna powěsćernja Anadolu dźensa rozprawja. Nimo toho su minjenu nóc z wojerskimi lětadłami nad wšej Turkowskej patruljowali.
Turkowski ministerski prezident Binali Yıldırım je poraženje wojerskeho puča „swjatk demokratije“ mjenował. W narěči demonstrantam wón minjenu nóc rjekny, zo „njebudźe po 15. juliju w kraju hižo ničo tak kaž do toho“. W tym zwisku Yıldırım namjetowaše, smjertne chłostanje w Turkowskej zaso zawjesć. Pučistow chcył wón „raznje pochłostać“.
Buram pomhać
To a tamne (18.07.16)
Rój wosow je na koparskej hrě w Ekuadorje sudnikow, přihladowarjow kaž tež wobě mustwje wuhnał a tak partiju přetorhnył. Agresiwne wosy lećachu wčera po stadionje přistawneho města Guayaquil, kaž telewizijne wobrazy dokumentuja. Spočatnje ćěkaše sudnik na kromje hrajnišća a biješe wokoło so. Jemu slědowachu koparjo, hłowny sudnik a skónčnje přihladowarjo. Po dwěmaj hodźinomaj so wosy zminychu. Dalša hra po tym wotmě so bjez problemow.
Ze swojim ultralochkim lětadłom znje- zbožił a na dubje wisajo wostał je 91lětny muž we Wulkej Britaniskej. Senior wisaše wčera pjeć metrow wysoko na štomje pola Edenbridga na juhowuchodźe kraja. Wohnjowi wobornicy dyrbjachu lětadło zawěsćić, prjedy hač móžachu 91lětneho z rěblom wuchować a do chorownje dowjezć.
