Washington (dpa/SN). Běły dom we Washingtonje je dźensa w nocy lisćinu 78 terorowych nadpadow wozjewił, wo kotrychž běchu žurnalisća njedosahajcy rozprawjeli. Mjez mjenowanymi su tež atentaty w Parisu, Nizzy a Berlinje.

Z wozjewjenej lisćinu chce knježerstwo USA wuprajenja prezidenta Donalda Trumpa podkłasć. Před zastupjerjemi wójska bě wón na to pokazał, zo „zełžani nowinarjo scyła wo tajkich nadpadach rozprawjeć nochcedźa“. Trump chce z wuprajenjom swoje stejišćo nastupajo rozkory zakaza zapućowanja muslimow do USA dla zesylnić.

Lisćinu, kotraž wopřijima nadpady we wjacorych krajach wot septembra 2014 do decembra 2016, je mjeztym tež nowina Washington Post wozjewiła. Tak mjenuja tam tohorunja atentat 16lětneje Safije­ S. na zastojnika w Hannoveru. Někotre njeskutki prawicarskoradikalnych w USA, při kotrychž buchu mnozy ludźo morjeni, wšak lisćina njewobkedźbuje.

Angela Merkel na oficialnym wopyće w susodnej Pólskej

Waršawa (dpa/SN). Zwjazkowa kanclerka Angela Merkel (CDU) je dźensa z wodźacymi zastupnikami pólskeho knježerstwa přichod Europskeje unije po wu­stupje Wulkeje Britaniskeje rozjimała. Za to bě so wona na přeprošenje ministerskeje prezidentki Beaty Szydło do Waršawy podała. Tam wočakowaštaj ju nimo Szydło­ tež statny prezident Andrzej Duda­ a předsyda knježaceje strony Prawo a sprawnosć (PiS) Jarosław Kaczyński. Zhromadnje wuradźowachu wo prašenju migracije a wěstoty. Zwjazkowej kanclerce je wuski zwisk k Pólskej přewšo wažny, dokelž chcyła po rozsudźe Britow, EU wopušćić, zbywace 27 krajow do kruteho cyłka skować.

Po nastupje knježerstwa PiS lěta 2015 běchu poćahi mjez Pólskej a Němskej stajnje zaso poćežene. Tak je PiS politiku Merkel ćěkancam napřećo raznje kriti­zowała. W Němskej porno tomu su rjad antidemokratiskich reformow w Pólskej šwikali. Politologojo su sej wěsći, zo stej Pólska a Němska w swojej europskej politice na so pokazanej. Tak stej sej w kri­tiskim nastajenju Ruskej napřećo pře­zjednej.