Do paslow zalězł je sej paduch w Germeringu pola Mnichowa, jako chcyše drasty z kontejnera za staru drastu kradnyć. Při tym zhubi runowahu a suny so přez škałbu do kontejnera, policija zdźěli. 35lětny podarmo spytaše so ze sudobja zaso wudrapać. Hakle jako pěšk spodźiwne zwuki z kontejnera słyšeše a nuzowe čisło zawoła, přińdźe pomoc. Wohnjowi wobornicy zamk při kontejneru přerězachu a jateho wuswobodźichu.

Wjace hač tysac ludźi je so wčera w kostimach něhdyšich wikingow w šotiskim Lerwicku na kóždolětnym festiwalu „Up Helly Aa“ wobdźěliło. Z rjećazowymi košlemi, nahłownikami a brónjemi wuhotowani ćehnjechu wobdźělnicy po městačku hłowneje ze Shetlandskich kupow. Festiwal zarjaduja tam wot lěta 1880 w tradiciji historiskich nowolětnych a swětłowych swjedźenjow.

Washington (B/SN). Narodna cyrkwinska rada USA je wažne personelne rozsudy noweho prezidenta Donalda Trumpa kritizowała. Zastupjerjo 38 protestantskich a ortodoksnych cyrkwjow wumjetuja pomjenowanym wosobam Jeffej Sessioej (minister justicy), Stephenej Bannonej (šefstratega) a Michaelej Flynnej (poradźowar wěstoty), zo podpěruja woni „rasizm, antisemitizm, běłe předprawo, hidu cuzym napřećo a antimuslimske ideologije“. Trump bě Bannona za swojeho wosobinskeho poradźowarja powołał a za to druhich wažnych zamołwitych z najwušeho kruha wuzamknył.

Woblubowane předmjeno

Vatikan (B/SN). Wot spočatka pontifikata bamža Franciskusa je předmjeno Francesco na prěnim městnje najwoblubowanišich italskich hólčich mjenow, wězo tež we Vatikanje. Před tydźenjomaj, na swjatym dnju křćeńcy Knjeza, wukřći bamž 28 dźěći vatikanskich přistajenych. Mjez nimi běchu hnydom štyrjo mali Francesco, štož je italska wersija za Franciskusa.

Tež křesćanow wuswobodźili

Mnichow/Rostock (dpa/K/SN). Woškrot je we wuchodnej Němskej šoferam njemałe starosće načinił. Lodojtych pućow dla je k mnohim njezbožam dóšło. W delnjej Bayerskej měješe policija w nocy 40 zražkow registrować. A 4 do směra na Regensburg je połdra hodźiny zawrjena była. W mnohich šulach wupadny wučba. W Mecklenburgsko-Předpomorskej je 29 njezbožow było. Třo ludźo poćerpichu lóše zranjenja. K zražkam dóńdźe tež w Durinskej a Sakskej.

Železnica trjeba nowy kurs

Düsseldorf (dpa/K/SN). Načolna kandidatka Zelenych Katrin Göring-Eckardt sej po překwapjacym wotstupje šefa Němskeje železnicy Rüdigera Gruby žada, zo změni koncern swój kurs. Naslědnik dyrbjał „być woprawdźity eksperta ze železniskeje branše“. Nastupajo změnu strategije wona naležnje rjekny: „Město nje- trjebawšich prestižnych projektow abo dwělomnych inwesticijow za morjom měła so železnica na solidne jadrowe předewzaća koncentrować.“

Zaso ptača gripa

Berlin/Washington (dpa/K/SN). Kanclerka Angela Merkel (CDU) je raznišo přećiwo prezidentej USA Donaldej Trumpej wustupiła. Jeho „postupowanje spřećiwja so po mojim měnjenju zakładnej ideji mje­zynarodneje pomocy ćěkancam a mjezynarodneje kooperacije“. Trěbny bój přećiwo terorej „nihdynanihdy njewoprawnja k tomu, měć generalny podhlad napřećo ludźom wěsteje wěry, w tym padźe napřećo ludźom muslimskeje wěry“, abo wě­steho pochada, Merkel zwurazni. UNO trochuje, zo je wot Trumpoweho wu­kaza­ zadźěwać ludźom muslimskeje wěry připućowanje do USA, něhdźe 20 000 wosobow potrjechenych, ćeknjenych před wójnu a namocu. Słowa jimał je so eksprezident Barack Obama. Mócne protesty po cyłym kraju přećiwo postupowanju Trumpa napjelnjeja jeho z nadźiju, wón praji. Jako prěni zwjazkowy stat skorži Kaliforniska­ přećiwo wukazej Trumpa. Tón je justicnu ministerku Sally Yates pušćił, dokelž je jeho zakaz kritizowała.