Zelena swěca šwedskeho knježerstwa, předać łužisku brunicowu wotnožku koncerna Vattenfall čěskemu koncernej EPH, je dosć wšelake reakcije zbudźiła. Braniborski ministerski prezident Dietmar Woidke (SPD) sej chwali, zo je čas njewěstosće za sobudźěłaćerjow kaž tež za wobydlerjow kónčiny skónčnje nimo. Wobswětoškitarjo a druzy přećiwnicy brunicy porno tomu su zludani. Rěčnik Zeleneje ligi­ Renej Šuster na přikład twjerdźi, zo je rozsud samo na njedobro Łužicy, dokelž bu šansa zapasena, kónc zmilinjenja bru­nicy­ porjadnje zrjadować. Zo je so za za­wrjenymi­ durjemi wo kondicijach jednało a zo su ličby a fakty lědma znate, nje­wě­stosći přidatnje polěkuje. Čěske přede­wza­će je drje přilubiło, zo tarifowe zrěčenja ludźi přewozmje a hač do lěta 2020 nikoho njepušći. Što pak budźe potom? Mamy tuž wuwiće přichodneho časa jara dokładnje wobkedźbować. Marko Wjeńka

Saarbrücken/Berlin (dpa/SN). Šoferojo awtow w Němskej dyrbja swoju jězbnu dowolnosć prawdźepodobnje spěšnišo wuměnić hač dotal planowane. Po informacijach Saarbrückenskeje nowiny chcedźa zwjazkowe kraje „datum spadnjenja“ we wjacorych wotrězkach doprědka sćahnyć. Tole wuchadźa z poručenja, kotrež chcedźa krajam na pjatkownym posedźenju Zwjazkoweje rady přepołožić. Wot lěta 2013 płaća jězbne dowolnosće jenož hišće 15 lět. Do toho wustajene dowolnosće maja poprawom hišće hač do 2033 płaćiwe być. Po nowych planach knježerstwa ma pak so jich płaćiwosć hižo 2024 skónčić. Potrjechenych je ně­hdźe 15 milionow dokumentow z časa do 31. decembra 1998, nowina rozprawja.

Titul swětoweho mištra w nošenju žony dźe lětsa do Ruskeje. Dmitrij Sagal je zhromadnje ze swojej partnerku Anastasiju Loginowej sobotu kuriozne wubědźowanje w finskim Sonkajärvi dobył. Cyłkownje 35 porikow z dwanaće krajow wobdźěli so tam na napřemoběhu přez wodu, pěsk a po lěsu. Při tym dyrbješe muž swoju partnerku cyły čas njesć.

Swoju njewjestu na parkowanišću zabył je 33lětny Mnichowčan. Porik bě sobotu po puću do Danskeje, zo by so tam zmandźelił. Po krótkej přestawce při awtodróze A 1 pak muž sam dale jědźeše. Hakle z pomocu policije a wjacorych telefonatow běštaj wobaj po dwěmaj hodźinomaj zaso zjednoćenaj. Komentar nawoženje: „Hańbuju so jara.“

Ankara (dpa/SN). Němska zakitowanska ministerka Ursula von der Leyen (CDU) je dźensa wojakow Zwjazkoweje wobory w Turkowskej wopytała. Wona přizemi rano na wojerskim lětanišću Incirlik. Tam zaměstnjenych 240 němskich wojakow, podpěruje­ bój přećiwo teroristiskej milicy IS z wuskušowanskimi lětadłami. W běhu dnja chcyše so von der Leyen do turkowskeje stolicy Ankary podać, kaž zakitowanske ministerstwo w Berlinje zdźěli. Poćahi mjez Němskej a Turkowskej su napjate, po tym zo bě zwjazkowy sejm rezoluciju wo ludomordarstwje na Armenjanach před sto lětami přez Osmaniske mócnarstwo schwalił.

Předadźa přistaw Piräusa

Athen (dpa/SN). Přistaw grjekskeho města Piräusa ma so předać. Grjekski parlament je wčera wobzamknył, zo smě chinski łódźniski koncern COSCO na wšě 51 procentow grjekskeje přistawoweje towaršnosće kupić, rozprawjeja statne medije. Chinski koncern ma za to cyłkownje 368 milionow eurow płaćić.

BND ma noweho šefa