Paris (dpa/SN). Po tym zo bu přepytowanje k masowemu znjewužiwanju dźěći w katolskej cyrkwi Francoskeje předstajene, je biskopska konferenca kraja konsekwency připowědźiła. „Hladajo na wulku ličbu skóncowanych, často zničenych žiwjenjow so hańbujemy a smy zludani“, rjekny předsyda Francoskeje biskopskeje konferency Éric de Moulins-Beaufort wčera w Parisu. Biskopja chcedźa wšitke trěbne kročele zahajić, zo njeby so tajki skandal wjace wospjetował. Na posedźenju cyrkwinskich gremijow w nowembru chcedźa prěnje naprawy wobzamknyć.

Po informacijach njewotwisneje komisije znjewužiwanja w cyrkwi dla bě so we wobłuku katolskeje cyrkwje Francoskeje wot 1950tych lět 216 000 dźěći a mło­dostnych z woporom znjewužiwanja stało. Po zapřijeću wot cyrkwje wudźeržowanych institucijow liča z 330 000 woporami. „Ličbje stej poražacej a njemóžetej bjez sćěhow wostać“, rjekny předsyda komisije Jean-Marc Sauvé. Połojca woporow hač dodźensa na sćěhi znjewužiwanja ćerpi. Zwjazki woporow sej žadaja: „Cyrkej ma za wšitke złóstnistwa płaćić.“ Při tym póńdźe wo miliardy eurow.

Drježdźany (dpa/SN). Němski zwjazk dźěłarnistwow (DGB) w Sakskej žada sej spěšnu reformu dotalnych zakonjow nastupajo zadołženje stata. Tuchwilny „kołwrótnje krótki čas wróćenja kreditow“ měli na 50 lět podlěšić, potwjerdźi předsyda DGB Markus Schlimbach wčera w Drježdźanach. Nětko započinaja nowe etaty nastajeć. Tuž je noworjadowanje nuznje trěbne, hewak su ministerstwa k raznemu lutowanju we wšěch wobłukach nuzowane, rjekny Schlimbach. Sakska­ pak trjeba zmužitu inwesticisku ofensiwu, zo móhła njedostatki w kubłanju, digitalizaciji, socialnym zawěsćenju a strowotnistwje wotstronić. Runočasnje maja transformaciju industrije, škit klimy, strukturnu změnu a demografiju zmištrować. Sakska bě loni koronapandemije dla šěsć miliardow eurow nowych kreditow brała. Po wustawje maja je w běhu wosom lět wróćo płaćić. Prěnja přepokazanka je hižo lěta 2023 trěbna – nimale 300 milionow eurow. Koaliciskej partneraj, Zeleni a SPD, stej za to, dobu wróćenja kreditow na 30 lět podlěšić. Za to pak dyrbja wustawu změnić, z wjetšinu dweju třećinow.

Dokelž njebě 13lětny do šule přišoł, je jeho kubłanišćo póndźelu rano w delnjofrankskim Oberstreuju policiju informowało. Zastojnicy podachu so tuž k swójbje, hdźež jim nan powědaše, zo njebě syna z łoža dóstał. Kaž so wukopa, bě so tón hač do nocy widejowym hram wěnował a njebě wězo hišće wuspany. Policija tuž chutne słowčko z hólčecom porěča, a nan jeho na to do šule dowjeze.

Zo maja we Wulkej Britaniskej wulke ćeže z personalom w logistiskim wobłuku, bě minjene tydźenje wobkedźbować. We wjele wobłukach je jara mało fachowcow, předewšěm w předźěłanju mjasa mnozy rěznicy pobrachuja. Tak maja burja swoju lubu nuzu swoje swinje zarězać dać. Ći prěni su tuž hižo započeli sami swój skót rězać. Rězarnje njemóža njedostatka fachowych dźěłowych mocow dla buram skót k rězu wotewzać.

Berlin (dpa/SN). 20 lět trajace zasadźenje němskich wojakow a wuwićowych pomocnikow w Afghanistanje je wjace hač 17,3 miliardy eurow płaćiło. Najwjetši dźěl z toho běchu wojerske wudawki dobrych dwanaće miliardow. To wuchadźa z wotmołwy knježerstwa na naprašowanje frakcije FDP w zwjazkowym sejmje. Wudawki wonkowneho a wuwićoweho ministra wučinjeja 2,5 mrd. eurow. Kajku z němskimi pjenjezami natwarjenu infrastrukturu nětko talibanojo wužiwaja, w Berlinje njepraja.

Techniski zmylk wina był

Menlo Park (dpa/SN). Techniski zmylk w nastajenju ličakow je wčerawši hodźiny trajacy wupad socialnych syćow Facebook, WhatsApp a Instagram zawinił. Zmylk sta so na routerach, kotrež wu­mě­nu datow mjez ličenskimi centrumami Facebooka rjaduja, kaž syć informuje. Jako­ sćěh bě komunikacija mjez ličen­skimi centrami přetorhnjena. Dotal nimaja pokazki na to, zo běchu tež daty wužiwarjow potrjechene.

Najwjetši dźěl šćěpjeny