Zynčacy nachribjetnik je so na Nürnbergskim hłownym dwórnišću wo wulkozasadźenje policije postarał. Něhdźe 50 zastojnikow, mjez nimi fachowcy za znješkódnjenje bombow, přijědźe. Potencielne wohroženje pak wukopa so na zbožo jenož jako elektriski truhanski aparat. 85lětny bě nachribjetnik mjez čakacymi pod stólcami wotstajił a so hakle po dobrej hodźinje zaso wróćił. Policija nětko pruwuje, štó ma kóšty zasadźenja zarunać.
Cigarety dla je nan w mecklenburgskim Bad Kleinenje swojej dźěsći samej z ćahom jěć dał. Krótko do wotjězda ćaha bě wón na nastupnišćo šoł, zo by cigaretu kurił. Dźewjeć měsacow stara dźowka we wozyčku a dwulětny synk wostaštaj w ćahu. Naraz so durje začinichu a ćah wotjědźe bjez nana. Zwjazkowa policija so wo dźěsći staraše. Chětro wustróžany je nan z přichodnym ćahom za nimaj přijěł.
Šaštín (dpa/SN). Bamž Franciskus je dźensa posledni dźeń swojeho wopyta Słowakskeje wuznamne putniske městno Šaštín na zapadźe kraja wopytał a tam składnostnje swjedźenja Sydom bolosćow Marije z dźesaćitysacami putnikow Božu mšu swjećił. Šaštín z nimale 5 000 wobydlerjemi je najwažniša putniska městnosć Słowakskeje a nima jenož wulki wuznam za romsko-katolsku, ale tež za grjeksko-katolsku wuchodnu cyrkej. Popołdnju chcyše so swjaty wótc zaso do Roma wróćić.
Awto dale najwažniši srědk
Wiesbaden (dpa/SN). Awto wostanje powołanskim dojězdźowarjam dale najwažniši wobchadny srědk. Dwě třećinje (68 procentow) ludźi jězdźitej po swójskich informacijach z awtom na dźěło, tež krótše čary. Runje 13 procentow wužiwa po informacijach Zwjazkoweho statistiskeho zarjada prawidłownje zjawne wobchadne srědki, kaž bus, nadróžnu, ćah abo podzemsku za puć na dźěło. Kóždy dźesaty dźěławy jězdźi prawidłownje z kolesom na dźěło.
Šćěpjenje wotnětka trěbne
Berlin (dpa/SN). Posłužbowe dźěłarnistwo ver.di je plany wjacorych zwjazkowych krajow kritizowało, přistajenym žanu mzdu njepłaćić, hdyž dyrbja jako nješćěpjeni do karanteny. Z wida dźěłarnistwa je wopak, spytać „winowatosć šćěpjenja přez posleńcu“ přesadźić, rjekny předsyda dźěłarnistwa Frank Werneke nowinarjam.
W někotrych zwjazkowych krajach njesměli nješćěpjeni hižo bórze žane prawo wjace měć, w padźe karanteny dale mzdu dóstać. Wo cyłoněmskim rjadowanju chcedźa strowotniscy ministrojo Zwjazka a krajow přichodny tydźeń srjedu wuradźować. Zwjazkowy infekciski zakoń tajke rjadowanje předwidźi, hdyž hodźało so karantenje přez škitne šćěpjenje zadźěwać.
Frakcija AfD w Sakskim krajnym sejmje chce rjadowanje „3G“ (šćěpjeny, wustrowjeny abo testowany) juristisce přepruwować dać. Z wotpowědnej próstwu chcedźa jeho hnydomne zběhnjenje docpěć, zo bychu „diskriminaciju nješćěpjenych skónčili“.
Z blachowej tyzu bědźacy so jěž je w schleswigsko-holsteinskim Neumünsteru zasadźenje policije zawinił. Wobydlerka bě spodźiwne zwuki na ležownosći susoda słyšała a na zadobywarja tukała. Policija přijědźe z třomi awtami. Zastojnicy prózdnje stejacy dom wobstupichu, přepytachu jón, ale njejsu ničo namakali. Naraz pak woni tohorunja podhladne zwuki słyšachu a wuhladachu „z blachowej tyzu wojowaceho“ jěža.
Zwěrjeći wopyt w Lipšćanskej radnicy: Sobudźěłaćerka socialneho zarjada so njemało wustróži, jako z woknom hladajo šupa (Waschbär) wuhlada, kiž do běrowa hladaše. Městu bě to přičina, přez radnicowy intranet sobudźěłaćerjow pokiwy za wobchad z dźiwimi zwěrjatami dawać: „Na kóždy pad wotstawk dźeržeć a na žadyn pad je njepicować.“ Z fotami šupa su tele warnowanje rozšěrjeli.
Berlin (dpa/SN). Předsyda FDP Christian Lindner je hladajo na woteběracu ličbu přiwisnikow CDU ofensiwnje wo jich hłosy k wólbam zwjazkoweho sejma wabił. We wčera předstajenym hnydomnym programje kanclerskeho kandidata Armina Lascheta (CDU) je wjele sympatiskeho a „nam znateho“, Lindner rjekny, měnjo, zo je program njedospołna kopija strony FDP. „Da móžeće tež original wolić.“ Armin Laschet chce wčera předstajene naprawy hnydom po dobyću wólbow zwoprawdźić.
Branša nowe postajenja wita
Wildau (dpa/SN). Braniborska kulturna branša ma planowane 2G-prawidła krajneho knježerstwa za zmysłapołne. Wone zmóžnjeja wjace swobody pře koronu šćěpjenym a wustrowjenym. Tak móža zarjadowarjo wěsćišo postupować. Braniborski kabinet rozjimuje dźensa nowy naćisk korona-postajenjow. Wjele wobmjezowanjow njeměło potom hižo płaćić. Koaliciske frakcije SPD, CDU a Zeleni su hižo tydźenja za tajki model wabili.
Tež pře gripu so šćěpić dać
Drježdźany (dpa/SN). Wupad miliny wčera w 14 hodź. w Drježdźanach a wokolinje je pad za policiju. Po tuchwilnych dopóznaćach bě balon z metalowej worštu wupad miliny zawinił. Hač bu balon wotpohladnje do wažneho stejnišća přepinarnje wodźeny, ma nětko kriminalna policija přepytować.
Mjeztym so dimensija wupada dale a bóle wujewja. Něhdźe 300 000 domjacnosćow, ale tež industrijne zawody, njeje nachwilnje milinu měło. Mylenja mějachu tež w Radebeulu, Radebergu, Freitalu a dalšich kónčinach. Wokoło 15 hodź. móžeše předewzaće Sachsen-Energie 95 procentow domjacnosćow z milinu zaso zastarać.
Drježdźanska wohnjowa wobora pak měješe ruce połnej dźěła. W běhu dweju hodźin dósta wona 270 nuzowych telefonatow. Tak dyrbješe ludźi z liftow wuchować. Nimo toho su awtomatiske wohnjoškitne přizjewjenske připrawy wopačne alarmy signalizowali. Wuchowanska słužba dyrbješe pacientam doma pomhać, dokelž jich dychanske nastroje njefungowachu. Tež tramwajki w Drježdźanach nachwilnje jězdźić njemóžachu.