Sylnje za škit mjeńšin wabili
Stejnišćo mjeńšin na dnju wotewrjenych duri knježerstwa derje wopytane było
Berlin (SN/JaW). Za kulisy statnych zarjadow je kónc tydźenja w Berlinje něhdźe 120 000 zajimcow na dnju wotewrjenych duri zwjazkoweho knježerstwa hladało. Nimo wšitkich ministerstwow bě tež kanclerski zarjad přistupny, hdźež je wčera popołdnju kanclerka Angela Merkel (CDU) wosobinsce wopytowarjow witała.
Tež mjeńšiny Němskeje – Danojo, Frizojo, Serbja a Sintojo a Romojo – běchu na dnju wotewrjenych duri zastupjene. W ministerstwje za nutřkowne naležnosće informowachu wone wo swojim aktualnym połoženju a wabjachu za wobydlersku iniciatiwu Federalistiskeje unije europskich narodnych mjeńšin (FUEN) Minority SafePack, polěpšić škit mjeńšin na europskej runinje.
To a tamne (28.08.17)
Lózysce hladacy wjelči roboter ma w Japanskej dźiwje swinje a sorny z tamnišich rajsowych polow wućěrić. Jeli so dźiwje swinjo abo sorna płoninje bliži, ze sensorami wuhotowany wjelk hnydom reaguje. Tak wón mórči a jeho LED-woči so zybolitej. Agrarny zwjazk města Kisarazu blisko stolicy Tokija tule bicarnu připrawu hišće hač do septembra wupruwuje. Wjelk je 65 centimetrow dołhi, 50 centimetrow wysoki a čini haru 90 decibelow, kaž nakładne awto.
Zesamostatnjene awto pola policije jako pokradnjene přizjewił je šofer minjeny pjatk w Großröhrsdorfje. Tak bě wón jězdźidło na parkowanišću kupnicy wotstajił a po wšěm zdaću na ručne borzdźidło zabył. Awto so zesamostatni a zajědźe do płota. Nětko wšak njepyta policija za pokradnjenym awtom, ale přepytuje wobchadneho njezboža dla.
Přiměr dojednany
Kijew (dpa/K/SN). Hladajo na zahajenje noweho šulskeho lěta 1. septembra płaći wot dźensnišeho w Donbasu nowy přiměr. Na to su so zastupnicy ukrainskeho knježerstwa, ruscy społnomócnjeni a sobudźěłaćerjo Organizacije za wěstotu a zhromadne dźěło w Europje srjedu dojednali. Minjene lěta bě k spočatkej šulskeho lěta stajnje přiměr wujednany był, konfliktnej stronje njejstej pak jón dołho dodźeržałoj. Konflikt na wuchodnej Ukrainje je sej dotal wjac hač 10 000 mortwych žadał.
Steinmeier w Litawskej
Vilnius (dpa/SN). Zwjazkowy prezident Frank-Walter Steinmeier je dźensa wopomnišćo Paneriai blisko litawskeje stolicy Vilniusa wopytał. Paneriai je „za Němcow městnosć hańby, ale tež namołwa so dopominać“. Za čas němskeho wobsadnistwa wot lěta 1941 do 1944 běchu tam nacionalsocialisća 120 000 ludźi morili. Ze swojej mandźelskej Elke Büdenbender je Steinmeier jako prěni najwyši dostojnik němskeho stata wopomnišćo wopytał.
Bager wobsadźili
Po zesunjenju zemje w šwicarskim kantonje Graubünden pytaja dale za ...
Unija by z Merkel wólby jasnje dobyła
Gabriel: Turkowskeje so pasć
Zeleni premiera Tilicha raznje kritizuja
Drježdźany (SN/BŠe). Sakski ministerski prezident Stanisław Tilich (CDU) swoje stejišćo přećiwo nowym wobswětowym směrnicam za brunicowe milinarnje Europskeje unije zakituje. Po jeho słowach měli so nowe směrnicy jeno žadać, su-li dźensa a w přichodźe techniske móžnosće, je tež zwoprawdźić. „Trjebamy brunicu, zo bychmy energijowu změnu zmištrowali“, Tilich wuzběhny.
Hižo tydźenja bě sakski ministerski prezident w mjenje brunicowych krajow Braniborskeje, Sewjerorynsko-Westfalskeje, Sakskeje a Saksko-Anhaltskeje zwjazkowemu hospodarskemu ministerstwu list pisał. W nim sej žadaše, zo měli přećiwo nowym hranicam žiweho slěbra a dusykoweho oksida skoržić. Nowe směrnicy haća planowansku wěstotu brunicowych milinarnjow, šef sakskeho knježerstwa kritizowaše.
Wotewru wrota zajimcam
To a tamne (25.08.17)
Wosebity dźak dóstachu wohnjowi wobornicy tele dny w južnej Jendźelskej. Woni běchu 18 prosatow před wohenjom wuchowali. Šěsć měsacow pozdźišo překwapi jich burowka z čerstwymi grilowanskimi kołbaskami jednoho z prosatkow, kotrež bu nětko zarězane. Mjeztym zo sej wobornicy dobry słód chwalachu, druzy – předewšěm zastupnicy zwěrinoškitnych organizacijow – zadźerženje burowki raznje kritizuja.
Z falšowanymi pjenjezami płaćiłoj staj studentaj dwaj měsacaj dołho w jednej Mnichowskej barje. W tak mjenowanym darkneće wobstarowaštaj sej za to wopačne 50eurowske bankowki. Zo to tak derje dźe, samo jeju překwapi. Zbožo wšak dołho njetraješe. Posłužowarce w klubje Willenlos wobšudnistwo napadny, a wona zawoła policiju. Sudnicy pósłachu 20lětneju do tydźenskeho aresta. Tež falšowarjow policija nětko ma.
Dalši muž zajaty
Rotterdam (dpa/K/SN). Po tym zo běchu wčera rockowy koncert ameriskeje skupiny Allah-Las warnowanja před terorom dla w Rotterdamje wotprajili, je policija w nocy dalšeho muža zajała. 22lětneho su zastojnicy z jeho bydlenja w prowincy Sewjerny Brabant sobu wzali, po tym zo bě policiji hroženje atentata dóšło. Wony w Rotterdamje zajaty šofer transportera z kopicu płunowych blešow je njewinowaty. Monter ze Španiskeje, kiž bě pjany był, móžeše wěc z płunowymi blešemi plawsibelnje wuswětlić.
Zemja so zesunyła
Bondo (dpa/SN). Po zesunjenju zemje w šwicarskim kantonje Graubünden je wosom ludźi zhubjenych. Pječa su mjez nimi tež Němcy a Awstričenjo. Za čas njezboža běchu woni w kónčinje Val Bondasca po puću. Po trochowanjach su so něhdźe štyri miliony kubiknych metrow zemje, błóta a kamjenjow do doła sypnyli. To sta so direktnje pódla wsy Bondo z něhdźe sto wobydlerjemi, kotruž su ewakuowali. Zranił so w Bondźe nichtó njeje, wšako maja tam za tajke pady alarmowu připrawu.
Wudawki jasnje přiběrali
