Wjeršk přepołožili
Berlin (dpa/SN). Tak mjenowany dieselowy wjeršk Zwjazka, krajow a awtotwarcow Němskeje su dźensa na druhe městno přepołožili. Zetkanje njewotmě so, kaž předwidźane, we wobchadnym ministerstwje, ale z wěstotnych přičin w bliskim nutřkownym ministerstwje, kaž dźensa rano zdźělichu. Před wobchadnym ministerstwom, kotrež leži při wjele wužiwanej hłownej dróze, ludźo wot ranja protestowachu. Aktiwisća wobswětoškitneje organizacije Greenpeace běchu na twarjenje ministerstwa zalězli a transparent přećiwo škódnym dusykowym oksidam připrawili, kotrež wosebje dieselowe awta zawinuja.
Wobdźělnicy zetkanja chcychu wuradźować, kak móhli wustork z dusykowych oksidow pomjeńšić. Wo wuslědkach hač do kónca redakciskeho časa žane informacije njepředležachu.
Druha stronka medalje
Socialne wudawki přiběraja
Najebać dobre połoženje na dźěłowych wikach dyrbi stat připłaćić
Berlin (dpa/SN). Němska je loni najebać dobre połoženje na dźěłowych wikach 918 miliardow eurow za socialne naležnosće wudała. Tole wuchadźa ze Socialneje rozprawy 2017 ministerki Andreje Nahles (SPD), kotruž je zwjazkowe knježerstwo dźensa schwaliło.
Socialne wudawki su porno lětu 2015 wo 3,7 procentow přiběrali. Wone wučinjeja mjeztym 29,3 procenty nutřkokrajneho bruttoprodukta. Po wobličenjach fachowcow móhli hač do kónca přichodneje legislaturneje doby hranicu biliona eurow překročić. Tele wudawki su trěbne, zo by towaršnosć socialne njesprawnosće wurunała. Z pjenjezami podpěruje stat na přikład swójby z dźěćimi, zbrašenych, rentnarjow abo hladanja potrěbnych.
Tragiske splećenje
To a tamne (02.08.17)
Z wětřikom wotnjeseny narodninski dar k 70ćinam je muž w Sakskej tola hišće dóstał. Policija je jemu wjacore z cyłkownje 550 eurami pjelnjene powětrowe balony wróćiła. Te bě muž ze Stollberga wot swojich dźowkow dóstał. Z heliumom pjelnjene balony pak přez wotewrjene terasowe durje twochnychu a po 150 kilometrach na kolesowanskej šćežce pola Polenza přizemichu. Tam je 14lětna namaka a policiji woteda.
Zastup do hosćenca wotpokazać chcychu sydom britiskim duchownym w Cardiffje, dokelž mějachu jich za wobdźělnikow fety k zakónčenju nježenjenosće. „Sorry, pola nas njejsu ani předrasćenja ani tajke fety dowolene“, rjekny jim stražnik při durjach. W poslednim wokomiku so manager hosćenca duchownych dohlada a prošeše jich nutř. Z darmotnym piwom bě problem ze swěta.
Wjace mortwych ciwilistow
Kabul (B/SN). W Afghanistanje su prěnje połlěto 2017 po zdźělenju UNO, Wysokeho komisariata za čłowjeske prawa, 1 662 ciwilistow, dwaj procentaj wjace hač loni w samsnym času, morili. Přiběrała je ličba morjenych a zranjenych žonow a dźěći. 174 žónskich su morili a 462 zranili, to je přiróst wo 23 procentow. 436 dźěći je zahinyło, štož je dźewjeć procentow wjace, a 1 141 mjeńšich dźěći bu zranjenych. Byrnjež UNO za swoju rozprawu dosć dokładnje rešeršowała, móhła woprawdźita ličba woporow a ranjenych hišće wjetša być.
Afghaniskich ćěkancow škitać
Drježdźany (B/SN). Caritas biskopstwa Drježdźany-Mišno namołwja sakske krajne knježerstwo, ze swobodneho stata najprjedy jónu žanych ćěkancow do Afghanistana njewotsunyć. Tam su woni w najwjetšim straše, dokelž so połoženje wěstoty w Afghanistanje dale pohubjeńša, wuzběhny direktor Carity Mathias Mitzscherlich. Wěstota nawrótnikow njeje zaručena. Tole wobkrućeja tež pomocnicy Carity international. W žanym druhim kraju njeje telko terorowych nadpadow kaž w Afghanistanje.
Krej na rownym płatnje
Wopak komunikował?
Washington (dpa/K/SN). Po dźesać dnjach skutkowanja jako komunikaciski šef prezidenta Donalda Trumpa dyrbi Anthony Scaramucci zaso hić. Trump chce nowemu šefej staba Johnej Kellyjej njepoćeženy start zmóžnić, rěka k tomu z Běłeho domu. Ameriske medije porno tomu rozprawjeja, zo je sej Kelly žadał šefa komunikacije pušćić. Tón bě za krótki čas swojeje słužby hłownje negatiwnje napadnył, wužiwajo wulgarizmy a ranjo druhich sobudźěłaćerjow.
Dobrindt: Dobre partnerstwo
Berlin (dpa/SN). Do napjeće wočakowaneho dieseloweho wjerška mjez politiku a zastupnikami němskich awtotwarcow wotpokazuje zwjazkowy wobchadny minister Alexander Dobrindt (CSU) wumjetowanja, zo je z awtomobilowej branšu přewusko splećeny. „Za kumpanstwo njejsym k dispoziciji“, rjekny minister w telewiziji ARD. Styki k awtotwarcam su „dobre partnerstwo, kotrež je zakład socialneho wičneho hospodarstwa“.
Z pledoajejom pokročowali
Reichsbyrgarjo wobkedźbowani
Drježdźany (dpa/K/SN). Instancy wustawoškita Zwjazka a krajow su so na to dojednali, tak mjenowanych „reichsbyrgarjow a samo zarjadnikow“ jich wjetšeje strašnosće dla po cyłej Němskej doslědnišo wobkedźbować. Wěsty čas mjeztym obserwuje wosoby tohole podhlada dla tež wustawoškitany zarjad Sakskeje. W swobodnym staće je 718 wosobow přirjadowanych k tak mjenowanym reichsbyrgarjam. Tole wuchadźa z rozprawy wo situaciji, kotruž je nutřkowne ministerstwo kraja dźensa předstajiło. „Pokazujemy, zo mamy tutu scenu na radarje a zo z njeje wuchadźace wohroženje našeho swobodneho a demokratiskeho porjada chutnje bjerjemy“, rjekny sakski nutřkowny minister Markus Ulbig (CDU). Někotři z nich maja „wulki potencial eskalacije, namocy a mobilizowanja“, přede- wšěm napřećo policiji. Podhódnoćić njesmě so tež jich afinita za brónje.
Krizowy staw swinjaceje mrětwy dla
Zlín (dpa/SN). W boju přećiwo wulce natykliwej afriskej swinjacej mrětwje je Čěska republika we wuchodnym zarjadniskim regionje Zlín krizowy staw wukazała. Wokoło potrjecheneje kónčiny chcedźa po dołhosći 45 kilometrow elektriski płót nastajeć, kaž zamołwići wčera zdźělichu. „Je rozsudne natyknjene dźiwje swinje w kónčinje dźeržeć a žane dalše nutř njepušćić“, rjekny prezident regiona Jiří Čunek powěsćerni ČTK. Kóšty za naprawu ma stat přewzać.
We wokolinje industrijneho města Zlína běchu skótni lěkarjo wirus pola 72 zahinjenych dźiwich swini namakali. Za čłowjekow je mrětwa njestrašna. Porno tomu móže chorosć w plahowarnjach swini hoberske škody zawostajić. Medikament přećiwo mrětwje nimaja.
Z přiběracej ličbu padow swinjaceje mrětwy přiběra strach, zo so chorosć tež na Němsku rozšěri. Fachowcy tuž warnuja, žanu kołbasu z Čěskeje sobu njewozyć. Policija chce tole kontrolować.
Waršawa ma měsac chwile
Europska unija oficialne jednanje přećiwo Pólskej zahajiła
Brüssel (dpa/SN). Komisija Europskeje unije je swoje hroženje zwoprawdźiła a oficialne jednanje přećiwo Pólskej ranjenja zrěčenja dla zahajiła. Posledni nastork k tomu bě dał prezident Andrzej Duda ze swojim podpismom pod zakoń, kotryž njewotwisnosć sudnistwow dale wobmjezuje. Zakoń běchu minjeny pjatk w pólskim hamtskim łopjenu wozjewili, z čimž je płaćiwy. Knježerstwo we Waršawje ma nětko měsac chwile, zo by na pisomne hroženje z Brüssela reagowało.
Po mjenowanym zakonju móže justicny minister rozsudźić, hdy smědźa so sudnicy na wuměnk podać. Nimo toho móže minister prezidentow sudnistwow po swojim dobrozdaću pomjenować a wotwołać. Tak móže zdobom ćišć na jednotliwych sudnikow wukonjeć. Tole wšak po nahledźe Europskeje unije njewotwisnosć sudnistwow „podrywa“.
