To a tamne (07.03.17)
Ze žołdka nopawy su skótni lěkarjo w Thailandskej nimale 1 000 twjerdych pjenjez wuoperowali. Tajke mjetaja tam ludźo do hatow, štož ma zbožo a dołhe žiwjenje přinjesć. Kaž uniwersitna klinika Chulalongkorn w Bangkoku zdźěli, je pjeć skótnych lěkarjow w běhu šěsćhodźinskeje operacije z 59 kilogramow ćežkeho zwěrjeća cyłkownje 915 twjerdych pjenjez wuwzało. Po tym zo běchu pjenjezy ze žołdka won, móže nopawa nětko zaso wjele lěpje dychać.
Wulka nakup mineralneje wody je 22lětnemu w badensko-württembergskim Laupheimje pjenježne chłostanje načiniła Ze šěsćstow połdraliterskimi blešemi a hišće dwěmaj sobujěducymaj bě jeho awto prosće přećežke. Policija pak jeho zadźerža a napołoži jemu chłostanku. Wodu bě młody muž tunjeho poskitka dla kupił.
Přirunanje zbudźa rozhorjenosć
Istanbul/Berlin (dpa/K/SN). Po tym zo bě turkowski prezident Recep Tayyip Erdoğan Němskej nacistiske metody wumjetował, je rozhorjenje wulke. Zwjazkowy justicny minister Heiko Maas (SPD) mjenowaše wumjetowanja „infamne, abstrusne a njeakceptabelne“. Generalny sekretar CSU Andreas Scheuer woznamjeni je jako „žałostne misnjenje Bosporuskeho despota“ a žada sej zamołwjenje. Němske komuny běchu turkowskim ministram wotprajili přewjesć wólbnobojowe zarjadowanja, hłownje z wěstotnych přičin.
Wjac rezerwow wutworili
Berlin (dpa/SN). Zakonske chorobne kasy Němskeje su po dotalnych ličbach z lěta 2016 nadbytk něhdźe 1,38 miliardow eurow docpěli. Rezerwy postupichu tak na wjac hač 15,9 miliardow eurow. Tole zdźěli dźensa zwjazkowe strowotne ministerstwo w Berlinje. Přiwšěm wostanje financna situacija jednotliwych kasow jara rozdźělna.
Talibanojo proša wo pomoc
Opel nětko francoski
Zeleni a liberalni kandidatow wuběrali
Drježdźany (dpa/K/SN). Zeleni su na stronskim zjězdźe sobotu w Drježdźanach nominowali kandidatow za nazymske wólby zwjazkoweho sejma. 1. městno na wólbnej lisćinje dowěri přitomnych něhdźe 100 delegatow 49lětnej Lipšćance Monice Lazar, kotraž dósta 76,8 procentow hłosow. Za njej wobsadźi Drježdźanjan Stephan Kühn (39) druhe městno před Kamjeničanskej studentku Meike Roden (25).
W Mittweidźe je na zhromadźiznje zastupnikow strony z cyłeho kraja sakska FDP swojeho generalneho sekretara Torstena Herbsta jako načolneho kandidata postajiła. 43lětny překupc bě so hižo w prěnim wólbnym přechodźe ze 125 hłosami porno dwěmaj riwalomaj přesadźił.
Tónkróć na zjawnym słyšenju
Marja Michałkowa za zastupjerjow serbskich zajimow rěčała
Drježdźany (SN/MiR). Skrótka a jadriwje rysowaše předsydka Rady za serbske naležnosće Sakskeje a čłonka zwjazkoweho sejma Marja Michałkowa (CDU) stejišćo gremija k sakskemu šulskemu zakonjej. Pjatk bě wona jedna z třinaće wěcywustojnych, kotřiž su so na zjawnym słyšenju wuběrka za šule a sport słowa jimali. Mjez nimi běchu předsydźa zwjazkow, zastupjerjo wučerjow, šulerjow a staršich. Swoje stejišćo zwuraznili su dale šulscy nawodźa wšelakich šulskich formow kubłanišćow w nošerstwje stata kaž tež tych w swobodnym nošerstwje.
Potrjebu na změny widźachu wěcywustojni mjez druhim na polu zaručenja wuknjenskich srědkow, socialneho šulskeho dźěła a inkluzije. Zastupjerjej Zwjazka sakskich městow a gmejnow kaž tež zwjazka sakskich wokrjesow kritizowaštaj, zo dóstawaja města a wokrjesy wot stata wjace nadawkow, nic pak personalne a financne srědki. Zasadnje pak zwuraznichu přitomni spokojnosć nastupajo změny zakonja po prěnim naćisku.
Dźak čestnohamtskim pomocnikam ćěkancow
Wojerecy (AK/SN). Sakscy čestnohamtscy pomocnicy ćěkancow dźensniši dźeń njeparujomnje k towaršnosći přinošuja. Tole podšmórny sakski ministerski prezident Stanisław Tilich (CDU) sobotu we Wojerecach. Ewangelska cyrkej Berlin-Braniborska-šleska Hornja Łužica z biskopom dr. Markusom Drögu bě wšitkich pomocnikow ćěkancow tež ze susodnych cyrkwinskich wokrjesow do Wojerec přeprosyła.
„Dźensa trjebaš wjele mocy, so prawidłownje a wobstajnje w pomocy ćěkancam angažować“, wuzběhny biskop Markus Dröge a so čestnohamtsce skutkowacym dźakowaše. „Runje pomocnicy wo ćežach ćěkancow njeposrědnje na městnje zhonja. Woni wědźa wo dołhim puću integracije. Dźensniši dźeń sej dźěłodawarjo praja, zo trjeba ćěkanc přerěznje 22 měsacow, doniž njeje integrowany, zo móhł na dźěłowych wikach wobstać.“ Ćim wažniše je přewod.
To a tamne (06.03.17)
Skerje njezwučenu spansku městnosć je sej 25lětny w delnjofrankskim Sennfeldźe wupytał. Tak nańdźe jeho wohnjowa wobora wčera rano tři metry wysoko na hałzy štoma. Kaž so wukopa, bě wěstotny personal diskoteki młodeho muža sobotu wječor chětro wopiteho z lokala wuzamknył. Kak pak je so na štom dóstał, to muž wčera hižo njewědźeše.
Njezranjeny zražku z awtom přežiwił a samo hišće jako tak mjenowany slepy pasažěr sobu jěł je zajac w badensko-württembergskim Winnendenje. Šoferka jězdźidła bě sobotu na policajskim rewěrje njezbožo z dźiwinu přizjewiła. Jako zastojnicy awto wčera dokładnje za slědami přepruwowachu, nańdźechu zajaca za prědnjej storkawu, hdźež bě so zapopadnył. Skónčnje policisća jeho njezranjeneho wuswobodźichu a na městnje na swobodu pušćichu.
Generalej telefonowałoj
Moskwa (dpa/SN) Wodźacaj zastupnikaj ruskeho wójska a NATO staj prěni króć po wudyrjenju krizy Krimy lěta 2014 dla zaso kontakt nawjazałoj. Kaž zakitowanske ministerstwo w Moskwje zdźěla, staj šef generalneho staba Walerij Gerasimow a předsyda wojerskeho wuběrka NATO, čěski general Petr Pavel, wčera telefonowałoj. Tak rěčeštaj mjez druhim wo wuhladach wožiwjenja prawidłownych wojerskich kontaktow a wo tym, kak hodźało so hrožacym zražkam při wojerskich zasadźenjach zadźěwać.
Bydlenje kandidata přepytali
Paris (dpa/SN). Policija je Pariske bydlenje kandidata za zastojnstwo francoskeho prezidenta Françoisa Fillona přepytała, rozprawja francoska powěsćernja AFP. Konserwatiny kandidat ma mjerzanje z justicu, dokelž jemu wumjetuja, zo je swoju žonu a samo dwě dźěsći ze statnych srědkow za pozdatne sobudźěło płaćił, byrnjež wone scyła za stat njedźěłali. Nahladnosć Fillona mjeztym samo w swójskich rjadach woteběra. Cyły rjad politikarjow Republikanskeje strony jeho namołwja, kandidaturu cofnyć.
Gabriel chce Ukrainje pomhać
