Wobsedźer złoćaneho pokłada, kotryž běchu dźěći w delnjej Bayerskej při hrajkanju w lěsu našli, je so přizjewił. Na zakładźe dokładnych znajomosćow wo schowje pokłada a jednotliwych pjenjezach móžeše dopokazać, zo pokład woprawdźe­ jemu słuša. Złoto je 250 000 eurow hódne. Muž bě je w lěsu zarył, dokelž boješe so paduchow w by­dlenju. Bankam wón njedowěrješe. Sprawnosć dźěći muž z darom mytowaše.

Na wšě 27 lět bjez jězbneje dowolnosće po puću běše 73lětny muž ze Šwabskeje. Nětko jeho njedaloko Augsburga na traktoru sedźo při wobchadnej kontroli lepichu. Policistam bě alkoholowa wón napadnyła. Test wunjese 1,9 promilow. Jězbnu dowolnosć pak sćazać njemóžachu. Tón běchu jemu podobneho delikta hižo před 27 lětami wotewzali.

London (dpa/SN). Z wulkej napjatosću su dźensa w Londonje narěč wulkobrita­niskeje premierministerki Theresy May wočakowali, w kotrejž chcyše wona plan předstajić, po kotrymž měł kraj Europsku uniju wopušćić. Hižo před tydźenjomaj bě wona „kruty brexit“ připowědźiła. Tak chcyła so Wulka Britaniska z europskeho wikowanskeho pasma dospołnje wróćo sćahnyć. Dotal njejasny je přichodny status z druhich krajow EU pochadźacych wukrajnikow we Wulkej Britaniskej, na přikład Polakow.

Namócnosće w Bukaresće

Bukarest (dpa/SN). Před sydłom knježerstwa w Rumunskej stolicy Bukaresće je wčera wječor k namócnym rozestajenjam dóšło. Spočatnje měrniwa demonstracija přećiwo złahodnjenju antikorupciskich zakonjow bě eskalěrowała, jako so wjacori radikalni, mjez hewak měrniwymi demonstrantami, do policistow dachu. Tući zasadźichu retle a sylzopłun. Na to so měrniwi demonstranća wotsalichu. Opozicija je sej wěsta, zo běchu radikalni w nadawku knježerstwa policiju zaměrnje prowokowali, tak zo móhła wona dalše protesty zakazać.

Žadaja sej wyši mzdu